ចូលឆ្មាំថ្មី៣ថ្ងៃ ខេត្តស្វាយរៀង មានភ្ញៀវទេសចរជិត៤ម៉ឺននាក់ទៅលេងកម្សាន្ត

ភ្ញៀវទេសចរជិត៤ម៉ឺននាក់ បានដើរលេងកម្សាន្តតាមតំបន់ទេសចរណ៍នៅទូទាំងខេត្តស្វាយរៀង រមណីយដ្ឋាន សង្ក្រាន្តតាមវត្ត តាមសាលារៀន ភោជនីយដ្ឋាន និងអាងហែលទឹក និងគោលដៅទេសចរណ៍ផ្សេងៗទៀត។ គេសង្កេតឃើញថា មានយុវវ័យលេងកម្សាន្តច្រើនជាងគេ ក្នុងឱកាសបុណ្យចូលឆ្នាំថ្មី២០២២នេះ។

របាយការណ៍របស់មន្ទីរទេសចរណ៍ខេត្តស្វាយរៀង បានបង្ហាញឲ្យដឹងថា ក្នុងរយៈពេល៣ថ្ងៃនេះ ភ្ញៀវទេសចរក្នុងឱកាសបុណ្យចូលឆ្មាំថ្មីប្រពៃណីជាតិខ្មែរ ចាប់ពីថ្ងៃទី១៤,១៥,១៦ ខែមេសា ឆ្នាំ២០២២  មានចំនួនភ្ញៀវទេសចរមកកម្សាន្តនៅក្នុងខេត្តស្វាយរៀង មានសរុប ៣៩.០៤៤នាក់ ស្រីចំនួន១៦.៧៨៤នាក់ ក្នុងនោះ នៅរមណីយដ្ឋានសរុបប្រមាណ ៣.៣១៤នាក់ ភោជនីយដ្ឋាន និងអាងហែលទឹក សរុបប្រមាណ ៤.៣៧០នាក់ សង្ក្រាន្តតាមវត្ត សរុបប្រមាណ ១១.៦០០នាក់ សង្ក្រាន្តតាមសាលា សរុបប្រមាណ ១៤.៧៦០នាក់ និងកម្សាន្តតាមមាត់ទន្លេ (ទន្លេវ៉ៃគោ) សរុបប្រមាណ ៥.០០០នាក់ ។

ចំពោះតាមមូលដ្ឋាន សហគមន៍  និង នៅតាមបណ្ដាវត្តអារាមនានាក៏មានការរៀបចំល្បែងប្រជាប្រិយ និង ល្បែងកម្សាន្តផ្សេងៗជាច្រើនផងដែរ  ដើម្បីឲ្យពលរដ្ឋ និងភ្ញៀវទេសចរ ទៅលេងកម្សាន្ត ប្រកបដោយសន្តិសុខ ល្អប្រសើរតាមរយៈការប្រចាំការយាមកាមតាមគោលដៅ និងជួយសម្រួលចរាចរពីសំណាក់កម្លាំងមានសមត្ថកិច្ចទាំងអស់៕

ដោយ ៖ ភក្ដី