ក្រសួងសាធារណការ ពន្យល់អំពីអត្ថន័យ និងរបៀបប្រើប្រាស់គន្លងផ្លូវធ្វើចរាចរណ៍ នៅតាមដងផ្លូវ

ក្រសួងសាធារណការ និងដឹកជញ្ជូន បានពន្យល់អំពីអត្ថន័យ និងរបៀបប្រើប្រាស់គន្លងផ្លូវធ្វើចរាចរណ៍ នៅតាមដងផ្លូវ។ តាមរយៈទំព័រហ្វេសប៊ុករបស់ខ្លួន នៅព្រឹកថ្ងៃទី ១៩ ខែមេសានេះ ក្រសួងសាធារណការ និងដឹកជញ្ជូន បានឲ្យដឹងថា ផ្លាកសញ្ញាបង្ហាញពីគន្លងផ្លូវធ្វើចរាចរណ៍ ( COMPULSORY LANES )៖ ផ្លាកសញ្ញានេះប្រើសម្រាប់ផ្ដល់ដំណឹង ដល់អ្នកប្រើប្រាស់ផ្លូវអំពីគន្លងផ្លូវធ្វើចរាចរណ៍ តាមប្រភេទអ្នកប្រើប្រាស់ផ្លូវ ដូចមានបង្ហាញក្នុងផ្លាកសញ្ញា។

សូមបញ្ជាក់ថា ដោយរាប់លើផ្លាកសញ្ញាពីខាងឆ្វេងទៅខាងស្ដាំ គន្លងទី ១ដល់ទី ៣ ជាគន្លងផ្លូវសម្រាប់រថយន្ត និងគន្លងទី ៤ ជាគន្លងផ្លូវសម្រាប់ទោចក្រយាន និងទោចក្រយានយន្ត។

ជាមួយគ្នានេះក្រសួងសាធារណការ និងដឹកជញ្ជូន បានស្នើឲ្យប្រជាពលរដ្ឋ ចូលរួមគោរពច្បាប់ចរា​ចរណ៍ឲ្យបានខ្ជាប់ ខ្ជួន។ ក្រសួងក៏បានស្នើសុំការសហការពីប្រជាពលរដ្ឋ ក្នុងការរាយការណ៍ករណីឃើញមានផ្លាកសញ្ញាមានការបាក់បែក ឬដួលរលំ តាមរយៈកម្មវិធីថែទាំផ្លូវ (ROAD CARE Mobile App) ដើម្បីអាចឲ្យមន្រ្តីជំនាញចាត់វិធានការទាន់ពេលវេលា៕