ពលរដ្ឋស្នើឱ្យមន្ទីរធនធានទឹកពន្លឿនការចាក់ដីលប់ក្បាលលូដើម្បីសម្រួលដល់ការធ្វើដំណើរ

ប្រជាពលរដ្ឋនៅឃុំកំភុន ស្រុកសេសាន ខេត្តស្ទឹងត្រែង ប្រមាណ១.០០០គ្រួសារ ស្នើសុំឱ្យមន្ទីរធនធានទឹកពន្លឿនការចាក់ដីលុបនៅចំណុចក្បាលស្ពាន និងលូដែលបានធ្វើហើយ  ដើម្បីស្រួលដល់ការធ្វើចរាចរណ៏ដល់សិស្សានុសិស្សទៅសាលារៀន ព្រោះនៅចំណុចនោះ ពេលមានភ្លៀងធំទឹកហូរកាត់ផ្តាច់ផ្លូវវាងធ្វើដំណើរទៅមិនរួចឡើយ។   

លោក ចាន់ ដោក មេភូមិនេះបានបញ្ចាក់ថា បញ្ហានេះអាជ្ញាធរបានផ្លាស់ប្តូរយុទ្ធសាស្ត្រស្ថាបនាលូស៊ីម៉ងត៍មុខកាត់ជាបេតុងជំនួសស្ពានឈើបានល្អរឹងម៉ាំ តែជិតមួយ​ខែមកហើយ​ផ្នែកជំនាញមិនចាក់ដីលប់ក្បាលស្ពាន និងលូនេះទេ បង្កភាពលំបាកការធ្វើដំណើរដល់ប្រជាពលរដ្ឋនិងសិស្សានុសិស្សទៅមក ។

លោកបន្តថា ប្រជាពលរដ្ឋនៅក្នុងភូមិការតូត ភូមិសេសាន និងភូមិកំភុន សុំឱ្យលោកប្រធានមន្ទីរធនធានទឹកពន្លឿនការរៀបចំកិច្ចការងារនេះឱ្យបានឆាប់ ព្រោះពេលភ្លៀងធំម្តងៗ​ទឹកហូរកាត់ផ្តាច់ផ្លូវវាងនេះខ្លាំងហើយជ្រៅឆ្លងកាត់មិនបានទេ សូម្បីតែសិស្សសាលាក៍ត្រូវខកខានមិនបានទៅរៀនសូត្រដែរ។

លោក សុវណ្ណ ពិសេដ្ឋ អភិបាលស្រុកសេសាន បានទទួលស្គាល់ថា ផ្លូវមួយខ្សែនេះប្រជាពលរដ្ឋចេញចូលប្រចាំថ្ងៃទៅមកទទួលយកសេវាសាធារណៈគ្រប់បែបយ៉ាងនៅសាលា​ស្រុក​និងសាលាឃុំ និងទៅមណ្ឌលសុខភាព ហើយកសិករភាគច្រើនទៅធ្វើស្រែចម្ការតាមផ្លូវនេះដែរ។

លោកថា កន្លងមកអាជ្ញាធរស្រុកឃុំបានសាងសង់ស្ពានឈើស្រួលធ្វើចរាចរណ៍ម្តងរួចមកហើយ ក្រោយមកមន្ទីរធនធានទឹករៀបចំដាក់លូតាមគម្រោងផែនការអភិវឌ្ឍប្រឡាយទឹក ឱ្យមានភាពរឹងមាំ​ដើម្បីធានាដល់ការប្រើប្រាស់ តែមន្ទីរធនធានទឹកមិនធ្វើឱ្យឆ្លើយតបទៅតាមតម្រូវការប្រជាពលរដ្ឋចង់បានទេ គឺមានភាពយឺតយ៉ាវ។  

លោក ប៉ាង ប៉េង ប្រធានមន្ទីរធនធានទឹក បានបញ្ជាក់ថា លោកទទួលស្គាល់នៅភាពយឺតយ៉ាវនេះ ព្រោះក្រុមកាងារបានឈប់សម្រាកថ្ងៃចូលឆ្នាំប្រពៃណីជាតិខ្មែរមិនទាន់បានត្រឡប់មកធ្វើការវិញ។ លោកបន្តថា កិច្ចការងារចាក់ដីលក់នេះ លោកនិងហៅគ្រឿងចក្រទៅធ្វើនៅចុងសប្តាហ៍នេះ ទៅតាមសំណូមពររបស់ប្រជាពលរដ្ឋយើងដើម្បីបានធ្វើចរាចរណ៏ទៅមកស្រួល។

សូមបញ្ចាក់ថា ផ្លូវមួយខ្សែនេះ តភ្ជាប់ពីផ្លូវជាតិលេខ០៧៨ ទៅតាមផ្លូវកៅស៊ូតាមជួរដងទន្លេសេសាន ដែលបងប្អូនប្រជាពលរដ្ឋប្រមាណជាង១.០០០គ្រួសារ ធ្វើដំណើរចេញចូលទំនាក់ទំនងគ្នា ពិសេសបងប្អូនជនជាតិព្រៅនៅភូមិការតូត ប្រើប្រាស់ផ្លូវនេះដឹកកសិផល ទៅកាន់ទីផ្សារផងដែរ ៕

អត្ថបទ៖ ងិនលីម