សម្តេច​តេជោ ហ៊ុន សែន៖ ​ការ​កាត់​បន្ថយទំនាក់ទំនងសង្គម-សេដ្ឋកិច្ច ដោយសារពីដំបូង​ ពិភពលោកមិនទាន់ស្គាល់កូវីដ​​​​

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា ការ​កាត់​បន្ថយទំនាក់ទំនងសង្គម-សេដ្ឋកិច្ច រហូត​​បង្ខំ​ចិត្ត​បិទព្រំប្រទល់​​ ដោយសាតែពីដំបូង​ ពិភពលោកមិនទាន់ស្គាល់កូវីដ​​​​។

សម្ដេចតេជោថ្លែងបែបនេះ នៅ​ក្នុងពីធី​ប្រគល់-ទទួលអំណោយដ៏ថ្លៃថ្លា វ៉ាក់សាំងកូវីដ-១៩ (AstraZeneca) ពីប្រជាជន និងរដ្ឋាភិបាល នៃសាធារណរដ្ឋអ៊ីតាលី​ ចំនួន ​១ ០៥៦ ០០០ (មួយលានប្រាំម៉ឺនប្រាំមួយពាន់) ដូស ​នៅវិមានសន្តិភាព នា​ព្រឹក​ថ្ងៃទី២៥ ខែមេសា ឆ្នាំ២០២២នេះ។​

សម្តេច​តេជោ ហ៊ុន សែន​ បញ្ជាក់ថា៖ “ការផ្ទុះឡើងដំបូងនៃជំងឺកូវីដ-១៩ បានសាកល្បងវាយប្រហារចំណងមិត្តភាពសកល ដោយនៅពេលនោះ យើងមិនទាន់ស្គាល់ច្បាស់អំពីជំងឺនេះ ដែលជាហេតុនាំឱ្យបណ្តាប្រទេសនានាត្រូវ​បង្ខំចិត្តបិទព្រំប្រទល់ និងកាត់បន្ថយទំនាក់ទំនងសង្គម-សេដ្ឋកិច្ច វិនិយោគ និងពាណិជ្ជកម្ម​។ ទោះជាយ៉ាងនេះក្តី ចំណងមិត្តភាពដ៏រឹងមាំជាមួយនឹងស្មារតីរួបរួម សាមគ្គី និងការជួយគ្នាទៅវិញទៅមក ទាំងក្នុងប្រទេស តំបន់ និងសាកលលោកទាំងមូល បានធ្វើឱ្យសកម្មភាពសង្គម-សេដ្ឋកិច្ច វិនិយោគ និងពាណិជ្ជកម្ម ក្នុងក្របខណ្ឌ តំបន់ និងសាកល បានងើបឡើងវិញយ៉ាងឆាប់រហ័ស ប្រកបដោយកំណើនវិជ្ជមានគួរឱ្យកត់សម្គាល់ ទោះបីជាការឆ្លងរាលដាលនៃជំងឺកូវីដ-១៩ នៅតែបន្តកើតមាន​ក៏ដោយ”។​

សម្ដេចតេជោ មានប្រសាសន៍បន្តថា ចំណែកនៅកម្ពុជា​ វិបត្តិនៃជំងឺកូវីដ-១៩ បានបណ្ដាលឱ្យមានការចាត់វិធានការតឹងរឹង និងឈាន​ទៅដល់​ការសម្រេចបិទព្រំប្រទល់ ក៏ដូចជាបិទខ្ទប់តំបន់សេដ្ឋកិច្ចសំខាន់ៗ ក្នុងទ្រង់​ទ្រាយ​ធំមិនធ្លាប់មានផងដែរ​ ប៉ុន្តែសេដ្ឋកិច្ច​កម្ពុជាបានងើបឡើងវិញនៅក្នុងឆ្នាំ២០២១ ជាមួយអត្រាកំណើនវិជ្ជមានប្រមាណ ​៣ ភាគរយ ក្រោយពីទទួលរងនូវ​ឥទ្ធិពលធ្ងន់ធ្ងរនៅក្នុងឆ្នាំ២០២០។

សម្តេចតេជោ មានប្រសាសថា ការងើបឡើងវិញនេះ ឆ្លុះបញ្ចាំងឱ្យឃើញពីការចូលរួមយ៉ាងសកម្មរបស់​ប្រជាជនកម្ពុជា អង្គការជាតិ និងអន្តរជាតិដៃគូអភិវឌ្ឍន៍ ព្រមទាំងបណ្តាប្រទេសជាមិត្ត ជាមួយនឹងកិច្ចខិតខំ ប្រឹងប្រែងរបស់រាជរដ្ឋាភិបាលកម្ពុជា ជាពិសេសក្នុងយុទ្ធនាការជាតិចាក់វ៉ាក់សាំង សំ​ដៅ​​បង្កើតភាពស៊ាំសហ​គមន៍​ក្នុង​ក្របខណ្ឌទូទាំងប្រទេស ដែល​បាន​អនុញ្ញាតឱ្យកម្ពុជាអាចបើកប្រទេស និងដំណើរការសកម្មភាព​សង្គម-សេដ្ឋកិច្ច ពេញលេញឡើងវិញ លើគ្រប់វិស័យ ហើយជាក់ស្ដែង​ នៅថ្ងៃទី១៧ ខែមីនា ឆ្នាំ២០២២​ កម្ពុជា​បានបោះជំហានទៅមុខបន្ថែមទៀត ក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី ដោយរាជរដ្ឋាភិបាល បានសម្រេ​ច​លុបចោលនូវលក្ខខណ្ឌតម្រូវទាំងអស់ សម្រាប់អ្នកដំណើរមកពីបរទេស ដែលបានចាក់វ៉ាក់សាំងពេញលេញ ក្នុងគោលដៅស្តារវិស័យទេសចរណ៍ ដែលជាវិស័យចម្បងចុងក្រោយ ដែលមិនទាន់ត្រូវបានស្ដារ និងងើបឡើងវិញ​។​ ទន្ទឹមគ្នា​នេះ ជាមួយ​ភាព​បុរេសកម្ម និង​​ចក្ខុវិស័យ​វែងឆ្ងាយ​ រាជរដ្ឋាភិបាល​​មិនដែល​បាន​បន្ថយ​ល្បឿន​​នៃការងារកែទម្រង់របស់ខ្លួននោះឡើយ​។​

សម្រាប់ទិសដៅទៅមុខ ស្របពេលដែលជំងឺកូវីដ-១៩ នៅតែបង្កឱ្យមាននូវភាពមិនប្រាកដប្រជា​ រាជរដ្ឋាភិបាលនឹង​បន្តជំរុញ​យុទ្ធនាការជាតិចាក់វ៉ាក់សាំង ដែលអំណោយវ៉ាក់សាំងកូវីដ-១៩ ដ៏ថ្លៃថ្លាពីប្រជា​ជន និងរដ្ឋាភិបាលអ៊ីតាលី នាថ្ងៃនេះ នឹងចូលរួមចំណែកយ៉ាងសំខាន់ផងដែរ។ រាជរដ្ឋាភិបាលក៏បាន និង​កំពុងតាមដានការវិវត្តនៃជម្លោះរវាងអ៊ុយក្រែន និងរុស្ស៊ី ដែលបាន និងកំពុងបង្កើតជាបញ្ហាប្រឈមជាច្រើន ជាពិសេសបញ្ហាកង្វះថាមពល ការកើនឡើងខ្ពស់នៃតម្លៃប្រេងឆៅ និងកំណើននៃអត្រាអតិផរណា ដែលអាច​ជះឥទ្ធិពលអវិជ្ជមានដល់ការវិនិយោគ ការធ្វើពាណិជ្ជកម្ម និងខ្សែច្រវាក់ផលិតកម្មតំបន់ និងសកល​។ បន្ថែម​លើនេះ រាជរដ្ឋាភិបាល ក៏មិនបំភ្លេច និងបានកំពុងគិតគូរដោះស្រាយបញ្ហាចម្បងផ្សេងទៀត ដូចជាបញ្ហាបម្រែបម្រួលអាកាសធាតុ បរិស្ថាន គាំពារសង្គម និងភាពក្រីក្រ ជាដើមនោះឡើយ​។​

សម្តេច​តេជោ ហ៊ុន សែន​ ​​បាន​អំពាវនាវឱ្យប្រជាជនកម្ពុជា បន្តជឿជាក់លើប្រសិទ្ធភាព នៃការចាក់វ៉ាក់សាំង និង​អនុវត្តឱ្យបានខ្ជាប់ខ្ជួននូវវិធានការសុខាភិបាល ជាពិសេសវិធានការ “៣ការពារ និង៣កុំ” ដើម្បីធានាឱ្យ​បាននូវការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី ប្រកបដោយសុវត្ថិភាព និងចីរភាព​៕

អត្ថបទ៖ កោះកែវ