ប្រទះឃើញគ្រាប់មិនទាន់ផ្ទុះទម្ងន់ជាង២០០គីឡូ​ក្រាមក្នុងការដ្ឋានមួយកន្លែងក្បែរក្រុងដូនកែវ

ការដ្ឋានអាជីវកម្មអាចម៍ដីមួយកន្លែងត្រូវបានគ្រឿងចក្រកាយប្រទះឃើញគ្រាប់មិនទាន់ផ្ទុះមួយគ្រាប់យ៉ាងធំសល់ពីសម័យសង្គ្រាមស្ថិតនៅភូមិត្រពាំងសាលាខាងត្បូង សសង្កាត់រកាក្រៅ ក្រុងដូនកែវ  ខេត្តតាកែវ។

ក្រោយការប្រទះឃើញគ្រាប់មិនទាន់ផ្ទុះនៅថ្ងៃទី២៦ ខែមេសា ឆ្នាំ២០២២ ម្ចាស់ការដ្ឋានអាចម៍ដីបានរាយការទៅសមត្ថកិច្ចភ្លាមៗចៀសវាងទុកយូរនាំកើតគ្រោះភ័យ។ ស្របពេលនោះកម្លាំងការិយាល័យគ្រប់គ្រងអាវុធ គ្រឿងផ្ទុះ ជាតិពុល នៃស្នងការដ្ឋាននគរបាលខេត្តតាកែវ បានសហការ ជាមួយមជ្ឈមណ្ឌលសកម្មភាពកំចាត់មីនកម្ពុជា (CMAC )ក៏ចុះទៅយកគ្រាប់ដែលបានប្រទះឃើញ។

សមត្ថកិច្ចបានបញ្ជាក់ថា នេះជាគ្រាប់បែកទម្លាក់ពីយន្តហោះម៉ាកMK៨២ ទម្ងន់២២៧គីឡូក្រាម ប្រវែង២,២០ម៉ែត្រ។ បច្ចុប្បន្នក្រោយការចុះពិនិត្យកម្លាំងជំនាញCMAC  បានយកទៅរក្សាទុកនៅកន្លែងសុវត្ថិភាព ដើម្បីត្រៀមកំទេចចោលនៅពេលក្រោយ៕

អត្ថបទ៖ វីរៈ