លោកបណ្ឌិត អាំង ជូលាន ទទួលបានគ្រឿង​ឥស្សរិយយសនិទាឃរដូវឆ្នាំ២០២២ ពីរដ្ឋាភិបាលជប៉ុន

នៅថ្ងៃទី២៩ ខែមេសា​ ឆ្នាំ២០២២នេះ ទីស្តីការគណៈរដ្ឋមន្រ្តីនៃរដ្ឋាភិបាលជប៉ុន បានប្រកាសឈ្មោះ​អ្នកដែលត្រូវទទួលគ្រឿងឥស្សរិយយសសម្រាប់និទាឃរដូវឆ្នាំ២០២២ ក្នុងនោះមានលោកបណ្ឌិត អាំង ជូលាន ជានរវិទូ និងសាស្រ្តាចារ្យនៃសកលវិទ្យាល័យភូមិន្ទ វិចិត្រសិល្បៈ នឹងទទួលគ្រឿងឥស្សរិយយស “The Order of the Rising Sun, Gold Rays with Neck Ribbon”ផងដែរ។
បើតាមសេចក្តីប្រកាសព័ត៌មាន របស់ស្ថានទូតជប៉ុនប្រចាំកម្ពុជា នៅថ្ងៃទី២៩ មេសានេះ បានឱ្យដឹងថា ការផ្តល់គ្រឿងឥស្សរិយយសដល់លោក បណ្ឌិត អាំង ជូលាន គឺជាការទទួលស្គាល់ការចូលរួមវិភាគទានរបស់លោក ក្នុងកិច្ចការជំរុញការផ្លាស់ប្តូរផ្នែកសិក្សាស្រាវជ្រាវ និងការយល់ដឹងពីគ្នាទៅវិញទៅមក រវាងប្រទេសជប៉ុន និងកម្ពុជា។  

 ស្ថានទូតជប៉ុនប្រចាំកម្ពុជា ក៏បានសូមចូលរួមអបអរសាទរចំពោះការទទួលស្គាល់ដល់ការចូលរួមចំណែករបស់​លោកបណ្ឌិត អាំង ជូលាន ក្នុងកិច្ចការសាធារណៈ និងសមិទ្ធិផលដ៏លេចធ្លោក្នុងកិច្ចការស្រាវជ្រាវ ព្រមទាំងវិស័យអភិរក្ស និងជួសជុលទីតាំងបុរាណវិទ្យានានា។

លោកបណ្ឌិត អាំង ជូលាន ជានរវិទូខ្មែរមួយរូប ដែលបានបញ្ចប់ការសិក្សាថ្នាក់បណ្ឌិតនរវិទ្យាពីប្រទេសបារាំងនៅឆ្នាំ​១៩៨២។ លោកសាស្ត្រាចារ្យ មានស្រុកកំណើត នៅកំពង់ឃ្លាំង  ខេត្តសៀបរាប ។ លោកបណ្ឌិត ជា​សាស្ត្រាចារ្យនៅសាកលវិទ្យាល័យភូមិន្ទចិនចិត្រសិល្បៈ និងជាអតីតប្រធាននាយកដ្ឋានវប្បធម៌នៃអាជ្ញាធរអប្សរា៕