អភិបាលខេត្តកំពង់ស្ពឺ ប្រកាសអាសន្នពីការខ្វះពលករជាង ១ ម៉ឺននាក់ នៅតាមរោងចក្រ

លោក វ៉ី សំណាង អភិបាលខេត្តកំពង់ស្ពឺ សម្ដែងការព្រួយបារម្ភអំពីកង្វះកម្លាំងពលកម្មនៅក្នុងខេត្ត ប្រមាណជាង ១ ម៉ឺននាក់ ខណៈការវិនិយោគក្នុងវិស័យកាត់ដេរ និងរោងចក្រកែច្នៃជាច្រើន កំពុងមានការកើនមាននៅក្នុងខេត្តកំពង់ស្ពឺ។

ថ្លែងនៅក្នុងពិធីជួបសំណេះសំណាលជាមួយកម្មករ កម្មការិនី និងនិយោជិត កំពុងធ្វើការក្នុងរោងចក្រ មីងហ្វៃ នៅថ្ងៃទី២៩ ខែមេសា ឆ្នាំ២០២២ ក្នុងឱកាស ទិវាពលកម្មអន្តរជាតិ ខួបទី១៣៦ នៅខេត្តកំពង់ស្ពឺ លោកអភិបាលខេត្ត លើកឡើងថា រហូតមកទល់ពេលនេះ រោងចក្រនៅក្នុងខេត្តកំពង់ស្ពឺនៅខ្វះកម្លាំងពលកម្មប្រមាណជាង ១០ ០០០ នាក់ឯណោះ។ ចំនួននេះនឹងមានកែប្រែច្រើនទៀត ខណៈរោងចក្រ និងសហគ្រាសផ្សេងៗទៀតបើកទ្វារជាបន្តបន្ទាប់។

លោក វ៉ី សំណាង មានប្រសាសន៍ប​ន្តថា ដោយសារលក្ខខណ្ឌនេះ ទើបរដ្ឋបាលខេត្តមានការព្រួយបារម្ភថា រកកម្មករមកធ្វើការឱ្យគេមិនបាន។ លោកបានអំពាវទៅកម្មករ និយោជិត មានប្រជាពលរដ្ឋដែលបានបញ្ចប់ការសិក្សា ឬឈប់រៀន ហើយចង់រកការងារធ្វើ អាចទៅធ្វើការនៅខេត្តកំពង់ស្ពឺដោយទាក់ទងទៅមន្ទីរការងារបណ្តុះបណ្តាលវិជ្ជាជីវៈ ដើម្បីទទួលបានឱកាសការងារនៅក្នុងខេត្តកំពង់ស្ពឺ។

លោកអភិបាលខេត្តបានលើកឡើងថា​ ខេត្តកំពង់ស្ពឺនៅតែខ្វះកម្លាំងពលកម្មសម្រាប់ធ្វើការងារ ខណៈរោងចក្រក្នុងខេត្តបន្តកើនឡើង។ លោកបន្តថា ការណ៍នេះដោយសារមានការរីកដុះដាលលើវិស័យរោងចក្រ សហគ្រាសតូចធំ បានដាក់ទុនវិនិយោគនៅក្នុងខេត្ត ដោយផ្អែកលើភាពអំណោយផល និងសក្តានុពលរបស់ខេត្ត។

លោក វ៉ី សំណាង បានបញ្ជាក់ថា បច្ចុប្បន្នខេត្តកំពង់ស្ពឺមានរោងចក្រសហគ្រាសសរុបចំនួន ៣៣៤ កន្លែងដែលមានកម្មករនិយោជិត សរុបចំនួន ១៤៤ ៧៩៧ នាក់ ស្រី ១០៦ ៩៨២ នាក់ ក្នុងនោះផ្នែកវាយនភ័ណ្ឌកាត់ដេរ និងផលិតស្បែកជើងមានចំនួន ១៥១ កន្លែង មានកម្មករសរុប ១៣៩ ៦៧៨ នាក់ ស្រី១០៥ ០០១ នាក់។ ទន្ទឹមនឹងនេះមានរោងចក្រសហគ្រាសជាច្រើនកន្លែងទៀតដែលបាន និងកំពុងសាងសង់ និងមានរោងចក្រខ្លះបានបើកទ្វាររើសកម្មករឱ្យចូលបម្រើការងារដែលមានតម្រូវការកម្មករច្រើន៕

អត្ថបទ៖ ណារី