សម្ដេចតេជោ ហ៊ុន សែន អំពាវនាវដល់អ្នកសារព័ត៌មាន ត្រូវអនុវត្តការងារប្រកបដោយវិជ្ជាជីវៈ

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានអំពាវនាវដល់អ្នកសារព័ត៌មានជាតិ និងអន្តរ ជាតិ ដែលកំពុងបំពេញបេសកកម្មលើវីស័យព័ត៌មាន នៅក្នុងប្រទេសកម្ពុជា និងនៅលើសកលលោក ត្រូវ យកចិត្តទុកដាក់អនុវត្តភារកិច្ច ឲ្យបានត្រឹមត្រូវតាមវិជ្ជាជីវៈ។ ការអំពាវនាវបែបនេះរបស់សម្ដេចនាយករដ្ឋមន្ត្រី ធ្វើឡើងតាមរយៈសារលិខិត អបអរសាទរទិវាសេរីភាពសារព័ត៌មានសកលលោក ០៣ ឧសភា ឆ្នាំ ២០២២។

សម្ដេចតេជោ ហ៊ុន សែន បានបន្ថែមថា អ្នកសារព័ត៌មាន ក៏ត្រូវខិតខំអភិវឌ្ឍន៍សមត្ថភាពរបស់ខ្លួន ទាំងផ្នែកជំនាញបច្ចេកទេស ទាំងការផលិតព័ត៌មាន និងការផ្សព្វផ្សាយព័ត៌មាន ដើម្បីបង្កើនជំនឿទុកចិត្តដល់សាធារណជន និងឆ្លើយតបទៅនឹងការវិវត្ត នៃបច្ចេកវិទ្យាប្រព័ន្ធផ្សព្វផ្សាយ ព័ត៌មានឌីជីថល ដើម្បីធ្វើការប្រកួតប្រជែងទីផ្សារ ឲ្យមានសក្តានុពល។  

ទន្ទឹមនឹងនេះ សម្ដេចតេជោ បានស្នើឲ្យអ្នកសារព័ត៌មាន ចៀសវាងការផ្សាយព័ត៌មានបំភ្លៃការពិត ដែលធ្វើឲ្យសាធារណជនបាត់បង់ជំនឿ និងធ្វើឲ្យប៉ះពាល់ដល់តម្លៃ កិត្តិយស សេចក្តីថ្លៃថ្នូររបស់អ្នកសារព័ត៌មាន និងតម្លៃរបស់សា្ថប័នសារព័ត៌មានទាំងមូល ផងដែរ៕

អត្ថបទ ៖ ធឿន វ៉ាន់សុង