ពលរដ្ឋនៅភូមិព្រែកថ្មី ទទួលបានតម្លៃខ្ពស់ពីការដាំផ្កាម្លិះ

កសិករដែលមានដីធំរស់នៅក្នុងភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បានចាប់យកអាជីពដាំផ្កាម្លិះលក់ព្រោះមានតម្លៃខ្ពស់ ចាប់ពី១គីឡូក្រាម១០មុឺនរៀល ដល់១៥មុឺនរៀលឯណោះ។

យោងតាមប្រភពពីលោក លីវ វណ្ណថេង ចៅសង្កាត់ព្រែកថ្មី បានឲ្យ «កម្ពុជាថ្នី» ដឹងនៅថ្ងៃទី៥ ខែឧសភានេះថា ចាប់តាំងពីដូនតាមក គឺប្រជាពលរដ្ឋរស់នៅភូមិព្រែកថ្មី បានចាប់យកអាជីពដាំផ្កាម្លិះលក់ព្រោះពួកគាត់បានទទួលតម្លៃខ្ពស់ហើយពុំចេះសល់ក្នុងចម្ការឡើយ។ លោកចៅសង្កាត់បានបញ្ជាក់ថា លោកសប្បាយចិត្តព្រោះឃើញកសិករក្នុងភូមិព្រែកថ្មីបានទទួលកម្រៃខ្ពស់ដោយសារតែការលក់ផ្កាម្លិះរហូតដល់ពួកគាត់មានលុយសង់បានផ្ទះថ្មរគ្រប់ៗគ្នា។

ក្នុងពេលជួបជាមួយភ្នាក់ងារ«កម្ពុជាថ្មី» លោក គឿន សារុន ជាកសិករដាំផ្កាម្លិះបានឲ្យដឹងថា សព្វថ្ងៃពួកគាត់រស់រានមានជីវិតដោយសារតែមុខរបរដាំផ្កាម្លិះនេះឯង។ អ្វីដែលមិនព្រួយបារម្មណ៍នោះ គឺឈ្មួញចុះមកទិញដល់ចម្ការដោយមិនខ្វល់នឹងដឹកជញ្ជូនយកទៅលក់នៅផ្សារ។ ចំពោះការទទួលផលវិញ គឺក្នុងអំឡុងពេល៣ថ្ងៃគឺត្រូវបេះម្តងហើយម្តងៗបានទទួលប្រាក់កម្រៃមិនតិចជាង១លានរៀលដែរ។

បើតាមការអះអាងពីអ៊ុំស្រី វ៉ាន់ គឿន វិញបានឲ្យដឹងថា គ្មានអ្វីស្រួលជាងដាំផ្កាម្លិះលក់ទេ ព្រោះដំណាំនេះមិនទាមទារស្រោចជីឬខ្លាចងាប់ដូចដំណាំដទៃទៀត។ ហើយផ្កាមួយគុម្ពអាចរស់បានយ៉ាងតិច៣ទៅ៤ឆ្នាំ ហើយកសិករភាគច្រើនដាក់ជីធម្មជាតិទើបផ្ការស់បានយូហើយមានក្លឹនក្រអូបជាងដាក់ជីគីមីបានតែសម្រស់ប៉ុន្តែគ្មានក្លិនក្រអូបនោះ។ អ៊ុំស្រីបញ្ជាក់ថា ក្រុមគ្រួសារអ៊ុំបាននាំគ្នាដាំផ្កាម្លិះទុកលក់តាំងពីដូនតាមមកលើកលែងតែរបប ខ្នែរក្រហម ប៉ុល ពត ដែលពួកគេមិនចាយលុយ៕

អត្ថបទ៖ នរា