ជីវប្រវត្តិ​សង្ខេប​របស់​ឯកឧត្តម ហ៊ុន ណេង បងប្រុស​សម្តេច​តេ​ជោ ហ៊ុន សែន

ឯកឧត្តម​ព្រឹទ្ធាចារ្យ ហ៊ុន ណេង ប្រធាន​គណៈកម្មការ​ទី​៤ នៃ​រដ្ឋសភា ដែល​បានទទួល​មរណភាព នៅ​ម៉ោង​៦ និង​២៥ នាទី​ល្ងាច ថ្ងៃទី​០៥ ខែឧសភា ឆ្នាំ​២០២២ ក្នុង​ជន្មាយុ​៧២​ឆ្នាំ ហើយ​សព​របស់ ឯកឧត្តម ហ៊ុន ណេង នឹងត្រូវ​តម្កល់​ធ្វើបុណ្យ​នៅ​គេហដ្ឋាន ដែល​ស្ថិតនៅ​ភូមិ​ទី​៧ សង្កាត់​កំពង់ចាម ក្រុង​កំពង់ចាម ខេត្តកំពង់ចាម ទៅតាម​ប្រពៃណី​ព្រះពុទ្ធសាសនា ហើយ​នៅ​ថ្ងៃ​ចន្ទ ទី​០៩ ខែឧសភា ឆ្នាំ​២០២២ សព​ឯកឧត្តម ហ៊ុន ណេង នឹងត្រូវ​ដង្ហែ​ទៅ​បញ្ចុះ​នៅ​វត្ត​សុវណ្ណ​គិរី​រតនៈ ដែល​ស្ថិតនៅ​ភ្នំ​ប្រុស ភូមិ​ត្រពាំង​ចារ ឃុំ​ក្រឡា ស្រុក​កំពង់សៀម ខេត្តកំពង់ចាម​។

កុមារភាព

យោងតាម​ជីវប្រវត្តិ​សង្ខេប​របស់​ឯកឧត្តម ហ៊ុន ណេង ដែល​ទទួលបាន ឲ្យ​ដឹងថា ឯកឧត្តម ហ៊ុន ណេង មានឈ្មោះ​ដើម ហ៊ុន ឡុង​សេង កើត​នៅ​ថ្ងៃទី ​២ ខែ មេសា ឆ្នាំ ១៩៥០ នៅ​ភូមិ​ពាម​ក្រៅ ឃុំ​ពាម​កោះ​ស្នា ស្រុក​ស្ទឹងត្រង់ ខេត្តកំពង់ចាម នៅក្នុង​គ្រួសារ​កសិករដែលមាន ឪពុក​ឈ្មោះ ហ៊ុន នាង និង​ម្តាយ​ឈ្មោះ ឌី ប៉ុក។ លោក​ជា​កូន​ទី​២ ក្នុងចំណោម​បងប្អូន ៦​នាក់ ក្នុងនោះ​ស្រី ៣ នាក់​។

អាពាហ៍ពិពាហ៍

លោក​បាន​រៀប​អាពាហ៍ពិពាហ៍​ជាមួយលោកជំទាវ លាង វួ​ច​ឆេង នៅ​ឆ្នាំ​១៩៧១ និង​មាន​បុត្រាបុត្រី​ចំនួន ៦ នាក់ ក្នុងនោះ​ស្រី ៣​នាក់​។

ប្រវត្តិសិក្សា

​ក្នុងនាម​ជា​កូន​កសិករ​ម្នាក់ នៅមុន​ឆ្នាំ ១៩៧០ លោក​បាន​តស៊ូ​សិក្សា​រៀនសូត្រ​នៅ​សាលា​បឋមសិក្សា​ពាម​កោះ​ស្នា និង​បន្ត​នៅ​អនុវិទ្យាល័យ​ស្ទឹងត្រង់​។ ជា​បន្តបន្ទាប់ លោក​បាន​ខិតខំ​បន្ត​ការសិក្សា​រៀនសូត្រ ​រហូតដល់​ចប់​ថ្នាក់អនុបណ្ឌិត​ផ្នែក​គ្រប់គ្រង​សេដ្ឋកិច្ច និង​រដ្ឋបាលនៅ​ឆ្នាំ ១៩៩៧​។

មិនតែប៉ុណ្ណោះ លោក​ក៏បាន​ទទួល​នូវ​សញ្ញាបត្រ​បណ្ឌិត​កិត្តិយស​ពី​ស្ថាប័ន​សាកលវិទ្យាល័យ​ជាតិ និង​អន្តរជាតិ​មួយចំនួន ផងដែរ​។

ការ​ចូលរួមចលនារំដោះជាតិ

ក្នុង​ចន្លោះ​ឆ្នាំ ១៩៧០ ដល់​ឆ្នាំ ១៩៧៥ លោក​ស្ថិតនៅក្នុង​តំបន់​រំដោះ​នា​ស្រុកកំណើត និង​ក្រោយ ពេល​ប្រទេសជាតិ​ធ្លាក់​ក្នុង​របប​ប្រល័យពូជសាសន៍​ប៉ុលពត លោក​បាន​ចូល​បម្រើ​ក្នុង​កងទ័ព​នៃ​រណសិរ្សសាមគ្គី​សង្គ្រោះ​ជាតិ​កម្ពុជា​។

តួនាទីការងារ

ដោយសារ​លោក​មាន​បញ្ញា​ឈ្លាសវៃ និង​មាន សមត្ថភាព លោក​ក៏ត្រូវ​បានតែងតាំង​ក្នុង​មុខនាទី​ជា​បន្តបន្ទាប់ រួមមាន ៖ ជា​ប្រធាន​មន្ទីរ​ខេត្តកំពង់ចាម​នៅ​ឆ្នាំ​១៩៧៩ ជា​ប្រធាន​មន្ទីរ​ផែនការ​ខេត្តកំពង់ចាម​នៅ​ឆ្នាំ​១៩៨១ ជា​អភិបាលស្រុក​ក្រូចឆ្មារ​នៅ​ឆ្នាំ​១៩៨២ ជា​អភិបាល​ខេត្តកំពង់ចាម​នៅ​ឆ្នាំ​១៩៨៤ ជា​អភិបាល​ខេត្តស្វាយរៀង​នៅ​ឆ្នាំ ១៩៩៩ និង​វិល​ត្រឡប់​មក​ធ្វើ ជា​អភិបាល​ខេត្តកំពង់ចាម​វិញ​នៅ​ឆ្នាំ​២០០៥ លោក​បាន​ចូល​និវត្ត​នៅ​ឆ្នាំ​២០១៣ និង​ត្រូវ​បាន​ឈរឈ្មោះ និង​ជាប់ឆ្នោត​ជា​អ្នកតំណាងរាស្ត្រ​មណ្ឌល​ខេត្តកំពង់ចាម និង​ត្រូវ​បាន​ជ្រើសតាំង​ជា​សមាជិក​គណៈ ក​ម្មា​ធិ​ការ​អចិន្ត្រៃយ៍​រដ្ឋសភា និង​ជា​ប្រធាន​គណៈកម្មការ​មហាផ្ទៃ ការពារជាតិ និង​មុខងារសាធារណៈ រដ្ឋ​សភាព​ជាតិ​រហូត​មកដល់​បច្ចុប្បន្ន​។

សមិទ្ធផល​

ក្នុង​ពលិកម្ម​ដើម្បី​ជាតិ សាសនា និង​ព្រះមហាក្សត្រ លោក​ក៏​ត្រូវបាន​ប្រទាន​នូវ​គ្រឿង​ឥស្សរិយយស​ជាច្រើន​ពី​ព្រះមហាក្សត្រ ក្នុង​នោះគ្រឿង​ឥស្សរិយយស​ខ្ពស់បំផុត​របស់​ព្រះរាជាណាចក្រ​កម្ពុជា គឺ​ថ្នាក់​ជា​តូប​ការ​។

ពេញ​មួយជីវិត​របស់​ឯកឧត្តម ហ៊ុន ណេង ពិសេស​ពេលវេលា​ដែល​លោក​បានមក​ដឹក​នាំនៅ ខេត្តកំពង់ចាម លោក​តែងតែ​បំពេញការងារ​សង្គម ការងារ​មនុស្សធម៌ ជា​អ្នក​កសាង​មូលដ្ឋាន​នៃ​ការអភិវឌ្ឍ នៅ​ខេត្តកំពង់ចាម ក្រោម​ការដឹកនាំ​របស់​រាជរដ្ឋាភិបាល ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​។

តាមរយៈ​សកម្មភាព​ទាំងអស់​នេះ បានធ្វើ​ឲ្យ​លោក​ទទួលបាន​នូវ​ការ គោរព​ស្រឡាញ់​ពី​មន្ត្រីរាជការ កងកម្លាំងប្រដាប់អាវុធ ព្រះសង្ឃ និង​ប្រជាពលរដ្ឋ​គ្រប់​មជ្ឈដ្ឋាន​៕

ដោយ ៖ កោះ​កែវ