អ្នកនេសាទ ចាប់បានត្រីបបែលយក្សទឹកសាប ទម្ងន់ ជិត ២០០ គីឡូក្រាម

នៅថ្ងៃទី៩ ខែឧសភា ឆ្នាំ ២០២២នេះ គេហទំព័រ អច្ឆរិយទន្លេមេគង្គ (the Wonders of the Mekong) បានឱ្យដឹងថា​ កាលពីពេលថ្មីៗនេះ សត្វបបែលយក្សញីទឹកសាបមួយក្បាល ទម្ងន់ ១៨០ គីឡូក្រាម ត្រូវបានអ្នកនេសាទចាប់បានដោយចៃដន្យនៅក្នុងទន្លេមេគង្គ ស្ថិតនៅភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង។

ត្រីបបែលយក្សញីទឹកសាបនេះ មានទទឹងប្រវែង ១៨៥ សង់ទីម៉ែត្រ ដងខ្លួនប្រវែង ២០០ សង់ទីម៉ែត្រ និងសរុបពីក្បាលដល់ចុងកន្ទុយ មានប្រវែង ៣៩៣ សង់ទីម៉ែត្រ។

អ្នកនេសាទប្រើទំពក់ដើម្បីចាប់ត្រី ដែលជួនកាល អាចចាប់ត្រីបបែលទឹកសាបយក្សបានដោយចៃដន្យដោយទំពក់ចាប់ត្រី ខណៈវាកំពុងចាប់ត្រីជាចំណី។

អ្នកនេសាទ បានលើកឡើងថា គាត់ចង់ជួយអភិរក្សសត្វបបែលទឹកសាបយក្ស ដែលជាប្រភេទសត្វជិតផុតពូជនៃទន្លេមេគង្គ។ គាត់​បាន​ទាក់ទង​ទៅ​ក្រុម​គម្រោង ​អច្ឆរិយៈ​ទន្លេ​មេគង្គ​ ភ្លាមៗ ហើយ​សុំ​ឱ្យ​ក្រុមការងារ​ដាក់​ស្លាក វាស់វែង និង​ដោះលែង​ត្រីបបែលយក្សទឹកសាបញីនេះ​ត្រឡប់​ទៅទន្លេធម្មជាតិ​វិញ៕