ព័ត៌មានជាតិ

មិនប្រកាសពិន្ទុ សិស្សជាច្រើនភ័យរើសជំនាញរៀននៅមហាវិទ្យាល័យ

បានផុស

៤ years មុន

នៅ

ថ្ងៃសុក្រ ១៨ ធ្នូ ២០២០

ដោយ

ការប្រឡងសញ្ញាបត្រទុតិយភូមិ ត្រូវបានក្រសួងប្រកាសលុបចោល និងសម្រេចឲ្យសិស្សជាប់ដោយស្វ័យប្រវត្តិ។ ការសម្រេចដោយមិនប្រកាសនិទ្ទេស បានធ្វើឲ្យសិស្សមួយចំនួនព្រួយបារម្ភ លើការជ្រើសរើសជំនាញសិក្សានៅមហាវិទ្យាល័យ។

យុវជន រឿន បូរិន វ័យ១៧ ឆ្នាំ រៀននៅវិទ្យាល័យមិត្តភាពខ្មែរជប៉ុននៅស្រុកព្រះស្តេចឲ្យដឹងថា ការប្រកាសលុបចោលការប្រឡងឆ្នាំនេះ គួរឲ្យសោកស្តាយ។ យុវជនដែលចង់រៀនជំនាញពេទ្យបន្តក្រោយចប់ថ្នាក់ទី ១២ រំពឹងបានលទ្ធផលល្អ បើសិនមានការប្រឡង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“ខ្ញុំរំពឹងបាននិទ្ទេស B ដោយសារខ្ញុំបានត្រៀមខ្លួនពេញមួយឆ្នាំ”។ យុវជនរូបនេះទទួលព័ត៌មានថា តាមមហាវិទ្យាល័យមួយចំនួន គេត្រូវការនិទ្ទេសពិន្ទុខ្ពស់ទើបអាចចូលរៀនបាន តែមិនដឹងឆ្នាំនេះនឹងមានការកែសម្រួលយ៉ាងណានោះទេ។

ចំណែកយុវតីរៀននៅវិទ្យាល័យសន្ធរម៉ុកមួយរូបប្រាប់ថា ការលុបចោលការប្រឡងឆ្នាំនេះមានទាំងផលល្អនិងអាក្រក់។ យុវតីកូនអ្នកទីក្រុងភ្នំពេញប្រាប់ថា មួយឆ្នាំពេញនេះ សិស្សជាច្រើនរៀនមិនបានដិតដល់ គុណភាពក៏ធ្លាក់ចុះ។ ការប្រឡងមិនអាចកំណត់លទ្ធផលសិស្សខ្លាំងឬខ្សោយ។

គ្រឹះស្ថានឧត្តមសិក្សាមួយចំនួនបានកំណត់លក្ខខណ្ឌសម្រាប់ការជ្រើសរើសជំនាញសិក្សា ដោយផ្អែកលើនិទ្ទេសពិន្ទុប្រឡង។ អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានឆ្លើយតបថា ករណីនេះក្រសួងនៅមិនទាន់មានការសម្រេចនៅឡើយទេ។ យោងតាមសេចក្តីជូនដំណឹងលេខ៨៣ អយក.សជណ ក្រសួងនឹងជម្រាបជូនដំណឹងបន្ថែមក្នុងពេលឆាប់ៗនេះ។

អ្នកនាំពាក្យឲ្យដឹងបន្តថា ការផ្ទុះព្រឹត្តិការណ៍ ២៨ វិច្ឆិកា និងការបន្តអូសបន្លាយវិបត្តិកូវីដ ១៩ ទើបមានការសម្រេចលុបចោលការប្រឡង និងប្រកាសឲ្យសិស្សជាប់ដោយស្វ័យប្រវត្តិ។ សិស្សដែលជាប់ទាំងអស់ មិនមានន័យថាជាទីបញ្ចប់នៃការសិក្សា ពួកគេនៅតែត្រូវជ្រើសរើសជំនាញសិក្សាបន្តនៅមហាវិទ្យាល័យ។

គួរបញ្ជាក់ថា បេក្ខជនដែលបានដាក់ពាក្យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២០នេះ មានចំនួនជាង១២១ ១០៨នាក់ (ស្រី៦៣,៩០៨នាក់)។ ក្នុងចំណោមនោះ បេក្ខជនថ្នាក់វិទ្យាសាស្ដ្រ ៤០,៧៤៦នាក់ (ស្រី២៣,៦២៩នាក់) និងថ្នាក់វិទ្យាសាស្ដ្រសង្គម ៨០,៣៦២នាក់ (ស្រី៦៦.៣៥នាក់)៕

Related Topics: