ព័ត៌មានជាតិ

ស្ថាប័នធនាគារ និងមីក្រូហិរញ្ញវត្ថុ ឆ្លើយតបអង្គការសង្គមស៊ីវិលចំនួនពីរ ជុំវិញបណ្តឹងពីបទរំលោភសិទ្ធិមនុស្ស

បានផុស

៣ years មុន

នៅ

ថ្ងៃអង្គារ ១០ ឧសភា ២០២២

ដោយ

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញសេចក្តីថ្លែងការណ៍ ឆ្លើយតបទៅនឹងពាក្យបណ្តឹងរបស់អង្គការសង្គមស៊ីវិលចំនួនពីរ ពាក់ព័ន្ធពីបទរំលោភសិទ្ធិមនុស្សធ្ងន់ធ្ងរ ទៅកាន់ការិយាល័យអនុលោមភាព ទីប្រឹក្សាដោះស្រាយវិវាទដែលជាយន្តការគណនេយ្យភាព និងឯករាជ្យ នៃសាជីវកម្មហិរញ្ញវត្ថុអន្តរជាតិ(IFC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញសេចក្តីថ្លែងការណ៍រួម នៅថ្ងៃនេះ ក្នុងខ្លឹមសារដូច្នេះថា« ទោះជាយើងមិនទាន់បានទទួលការទំនាក់ទំនងដោយផ្ទាល់ពីសាជីវកម្មហិរញ្ញវត្ថុអន្តរជាតិ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា កំពុងយកចិត្តទុកដាក់យ៉ាង ខ្លាំងពីការចោទប្រកាន់របស់ អង្គការសង្គមស៊ីវិលទាំងពីរ មកលើវិស័យធនាគារ និងហិរញ្ញវត្ថុ»។

សេចក្តីថ្លែងការណ៍ដដែល បានបន្តថា គ្រឹះស្ថានធនាគារ និងហិរញ្ញវត្ថុ បាននឹងកំពុងខិតខំប្រឹងប្រែងក្នុងការបម្រើ និងជួយដល់ប្រជាជនកម្ពុជា។ ប៉ុន្តែវាគួរឱ្យសោកស្តាយដែលកិច្ចខិតខំប្រឹងប្រែង ការលើកកម្ពស់បរិយាបន្នហិរញ្ញវត្ថុ ការកាត់បន្ថយភាពក្រីក្រ និងកំណើនសេដ្ឋកិច្ចទាំងអស់នេះ មិនត្រូវបានឱ្យតម្លៃ ឬមើលរំលង ដោយអង្គការសង្គមស៊ីវិលទាំងពីរនេះ។

សូមរំលឹកថា អង្គការសង្គមស៊ីវិលក្នុងស្រុកចំនួនពីរ តំណាងឱ្យអ្នកខ្ចីប្រាក់នៅកម្ពុជា បានដាក់ពាក្យបណ្ដឹងទៅកាន់ស្ថាប័នហិរញ្ញវត្ថុអន្តរជាតិ ដោយចោទប្រកាន់គ្រឹះស្ថានមីក្រូហិរញ្ញវត្ថុ និងធនាគារចំនួន៦ពីបទរំលោភសិទ្ធិមនុស្សធ្ងន់ធ្ងរ។ ម្ចាស់បណ្ដឹងអំពាវនាវឱ្យទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិ ចាប់ផ្ដើមស៊ើបអង្កេតជាបន្ទាន់ ទៅលើការខូចខាតបង្កឡើងដោយការវិនិយោគជាមួយ គ្រឹះស្ថានមីក្រូហិរញ្ញវត្ថុនិងធនាគារចំនួន៦។ នេះបើតាមសេចក្ដីថ្លែងការណ៍របស់អង្គការលីកាដូ កាលពីថ្ងៃទី៣ខែឧសភា កន្លងទៅ។

បើតាមសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា កិច្ចការពារអតិថិជន និងអ្នកប្រើប្រាស់ គឺជាកាតព្វកិច្ចរបស់គ្រឹះស្ថានធនាគារ និងហិរញ្ញវត្ថុ ដែលបានចូលរួមយ៉ាងសកម្ម និងផ្សារភ្ចាប់ទៅនឹងយុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥។ បន្ថែមលើនេះ យន្តការទទួលបណ្តឹង និងគ្រប់គ្រងបណ្តឹងអតិថិជន ក៏ត្រូវបានអនុវត្តផងដែរ តាមរយៈមធ្យោបាយផ្សេងៗ ធ្វើឡើងដោយគ្រឹះស្ថានធនាគារនិងហិរញ្ញវត្ថុ។

យុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥ សកម្មភាពជាច្រើនត្រូវបានដាក់ចេញ ដើម្បីធានានូវការគោរពចំពោះគោលការណ៍ការពារអតិថិជន។

សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុ និងបច្ចេកវិទ្យាកម្ពុជា បានដាក់ឱ្យប្រើប្រាស់ជាផ្លូវការនូវក្រមប្រតិបត្តិសម្រាប់វិស័យធនាគារ និងហិរញ្ញវត្ថុ និងការកែសម្រួលឡើងវិញនូវវិធានផ្តល់ឥណទាន កាលពីថ្ងៃទី០៤ ខែមីនា ឆ្នាំ២០២២កន្លងទៅនេះ បន្ទាប់ពីដាក់ឱ្យអនុវត្តជាបណ្តោះអាសន្នរយៈពេល៦ខែមក។

ក្នុងអំឡុងពេលកូវីដ-១៩ គ្រឹះស្ថានធនាគារ និងហិរញ្ញវត្ថុ បានជួយសម្រួលបន្ទុកដល់អតិថិជនរបស់ខ្លួនដែលរងផលប៉ះពាល់ដោយសារជំងឺកូវីដ១៩ តាមរយៈការធ្វើឥណទានរៀបចំឡើងវិញ ប្រមាណជាង ៦២ម៉ឺនគណនី ជាមួយនឹងសមតុល្យសាច់ប្រាក់សរុបប្រមាណជាង ៧ពាន់លានដុល្លារគិតត្រឹមខែមីនាឆ្នាំ២០២២នេះ៕