​គ.ជ.ប ត្រៀមប្រើ​​ទឹកខ្មៅលុបលាងមិនជ្រះ​​ជាង ៥​ម៉ឺន​ដប ​​តម្លៃសរុប ជិត ១ លានដុល្លារ

មន្រ្តីជាន់ខ្ពស់ គ.ជ.ប​ បាន​ឱ្យដឹងថា នៅក្នុងដំណើរការ​បោះឆ្នោតជ្រើសរើសក្រុមប្រឹក្សាឃុំ  សង្កាត់ អាណត្ដិទី៥​​នេះ​ គ.ជ.ប​ គ្រោងប្រើប្រាស់ទឹកខ្មៅលុបលាងមិនជ្រះ​ប្រមាណជាង​ ៥ម៉ឺនដប​ ដែលត្រូវចំណាយ​ថវិកាប្រមាណ ១​លានដុល្លារ​សហរដ្ឋអាមេរិក។​

លោក សោម សូរីដា អគ្គលេខាធិការរង និងជា​អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ​បានបញ្ជាក់​ប្រាប់ “កម្ពុជាថ្មី” នារសៀលថ្ងៃទី១១ ខែឧសភា ឆ្នាំ២០២២ នេះថា ទឹកខ្មៅលុបលាងមិនជ្រះ ដែលត្រូវប្រើនៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្ដិទី៥ ឆ្នាំ២០២២នេះ ​ត្រូវបាន​បញ្ជាទិញពីប្រទេសឥណ្ឌា ក្នុងចំនួនជាង ៥ម៉ឺនដប ហើយទឹកថ្នាំនេះនឹងត្រូវប្រើចំនួន ២ដប ក្នុង​១​ការិយាល័យ ​និង​មានរក្សាបម្រុងទុក​នៅគណៈកម្មការរាជធានី ខេត្ត រៀបចំការបោះឆ្នោត និងនៅ គ.ជ.ប​។

បើតាមលោក សោម សូរីដា ទឹកខ្មៅនេះក្នុងមួយដបតម្លៃ ១៨,១៥ ដុល្លារ ដែល​គ្រោងចំណាយ​​ថវិកាប្រមាណ ១ លានដុល្លារសហរដ្ឋអាមេរិក ដែលចំនួន ១លានដុល្លារនេះ គិតទាំងតម្លៃទិញ និងសេវាដឹកជញ្ជូន។ លោកបញ្ជាក់ថា ទឹកខ្មៅលុបលាងមិនជ្រះនេះ បាន​មក​ដល់ប្រទេសកម្ពុជាហើយ និងត្រូវបានតម្កល់ទុកនៅក្នុងឃ្លាំងរបស់ គ.ជ.ប សម្រាប់ប្រើប្រាស់ក្នុងការ​បោះឆ្នោតនាពេលខាងមុខ ហើយនៅថ្ងៃទី១៣ ខែឧសភា ខាងមុខនេះ គ.ជ.ប នឹងរៀបចំពិធីបង្ហាញទឹកខ្មៅលុបលាងមិនជ្រះនេះ​ជូនដល់ភាគីពាក់ព័ន្ធផងដែរ។​

សូមបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ​នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខ​ ដោយមាន​គណបក្ស​ន​យោបាយ​សរុបចំនួន ១៧​ គណបក្ស​ បាន​ដាក់បេក្ខជន​ចូលរួម​ប្រកួតប្រជែង ហើយក្នុងចំណោម​គណបក្សទាំងអស់ មានតែគណបក្សប្រជាជនកម្ពុជា​មួយទេ ដែលបាន​ដាក់​បេក្ខជន​​បានគ្រប់ឃុំ សង្កាត់ ទាំងអស់៕

អត្ថបទ៖ កោះកែវ