ព័ត៌មានជាតិ

គ្រឹះស្ថានមីក្រូហិរញ្ញវត្ថុ បាយ័ន ក្រេឌីត ប្រកាសប្តូរម្ចាស់ភាគហ៊ុនថ្មីជាផ្លូវការ

បានផុស

៣ years មុន

នៅ

ថ្ងៃចន្ទ ១៩ តុលា ២០២០

ដោយ

នាព្រឹកថ្ងៃទី១៩ ខែតុលា ឆ្នាំ២០២០ គ្រឹះស្ថានមីក្រូហិរញ្ញវត្ថុបាយ័នក្រេឌីត បានប្រកាសប្តូរម្ចាស់ភាគហ៊ុនថ្មីជាផ្លូវការ បន្ទាប់ពីស្ថាប័នក្នុងស្រុកមួយនេះលក់ភាគហ៊ុន១០០%ទៅឲ្យក្រុមហ៊ុនCHENG FUNG INVESTMENT(CFI) និងក្រុមហ៊ុនNETGOLD INVESTMENT (NETGOLD ) ដែលការទិញលក់នេះធ្វើឡើងតាំងពីថ្ងៃទី០២ ខែមីនា ឆ្នាំ២០២០ និងបានបិទបញ្ចប់ការទិញលក់នៅថ្ងៃទី ០១ខែ តុលា ឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានក្រុមប្រឹក្សាភិបាលថ្មី លោកស្រី ប៊ុត កេរ៉ាឌី បានសម្តែងចំណាប់អារម្មណ៍ថា៖ ការសម្រេចវិនិយោគលើវិស័យហិរញ្ញវត្ថុនាពេលនេះ គឺដោយមើលឃើញពីតម្រូវការទីផ្សារខ្ពស់ និងមានសុខុមាលភាពអាជីវកម្មល្អ ក៏ដូចជាដើម្បីរួមចំណែកលើកកម្ពស់ជីវភាពប្រជាជនកម្ពុជា ទាំងទីក្រុង និងជនបទ ដែលកំពុងមានតម្រូវការហិរញ្ញវត្ថុយកទៅពង្រីក ឬបង្កើត មុខរបររបស់ពួកគាត់ ពិសេសជាងនេះទៅទៀត ដើម្បីរួមចំណែកជាមួយរាជរដ្ឋាភិបាល ក្នុងការរក្សាស្ថិរភាពសេដ្ឋកិច្ចជាតិផងដែរ។ លោកស្រីប្រធានក្រុមប្រឹក្សាភិបាលបានបន្តទៀតថា សម្រាប់ឆ្នាំ២០២១ខាងមុខនេះ ក្រុមហ៊ុនគ្រោងបន្ថែមដើមទុនវិនិយោគ២៥លានដុល្លារអាមេរិកបន្ថែមទៀត។

លោក ញាណ វីរៈ ប្រធានអគ្គនាយក របស់គ្រឹះស្ថានបាយ័ន ក្រេឌីត ម.ក បានមានប្រសាសន៍ ជាមួយនឹងភាពប៉ិនប្រសប់និងគុណវឌ្ឍរបស់បុគ្គលិក ក្នុងវិស័យហិរញ្ញវត្ថុជាច្រើនឆ្នាំ អាចធ្វើឲ្យគ្រឹះស្ថានមានសមត្ថភាពប្រកួតប្រជែងនៅលើទីផ្សារសម័យទំនើបនៃវិស័យហិរញ្ញវត្ថុដូចបច្ចុប្បន្ន។ សម្រាប់គ្រឹះស្ថានបាយ័នក្រេឌីត គឺផ្តោតយកចិត្តទុកដាក់ខ្លាំងលើការបម្រើសេវាកម្មអតិថិជន ក្នុងការប្រកួតប្រជែង ស្របតាមពាក្យស្លោករបស់ខ្លួន គឺ “ ផ្តល់ជូនលោកអ្នកនូវសេវាកម្មជាទីគាប់ចិត្ត” (BRING THE BEST) ដោយផ្អែកលើការរចនាផលិតផលតាមតម្រូវការអតិថិជន បំពាក់បច្ចេកវិទ្យាធនាគារថ្មីទំនើបៗ គឺធ្វើយ៉ាងណា បំពេញតាមការចង់បានរបស់អតិថិជន និងផ្តល់លទ្ធផលជាវិជ្ជមានជូនម្ចាស់ភាគហ៊ុននិក ដោយអនុលោមតាមច្បាប់ ជាពិសេសការប្រកាន់ភ្ជាប់ និងអនុវត្តតាមសេចក្តីណែនាំរបស់ធនាគារជាតិ ដែលជាអាណាព្យាបាលរបស់យើង។ លោកប្រធានអគ្គនាយក បានបន្ថែមដោយសុទិដ្ឋិនិយមទៀតថា “ គ្រឹះស្ថាន បាយ័ន ក្រេឌីត បានរចនានូវពាណិជ្ជសញ្ញាថ្មី ដែលជាអត្តសញ្ញាណមួយយ៉ាងជាក់លាក់ដល់សាធារណជន ជាមួយនឹងបេសកកម្មនិងចក្ខុវិស័យយូរអង្វែង ផែនការអាជីវកម្មច្បាស់លាស់ ការសហការគ្នារវាងបុគ្គលិក និងបុគ្គលិកគ្រប់ឋានៈ ព្រមទាំងគោលការណ៍អភិបាលកិច្ចល្អ នឹងធ្វើឲ្យស្ថាប័នមួយនេះដណ្តើមបានការគាំទ្រយ៉ាងខ្លាំងនៅពេលដ៏ខ្លីខាងមុខ។

ស្របពេលជាមួយគ្នានេះដែរ គ្រឹះស្ថាន បាយ័ន ក្រេឌីត ក៏បានធ្វើពិធីសូត្រមន្ត ក្រុងពាលី ឡើងអាគារការិយាល័យថ្មី ដែលមានអាសយដ្ឋានស្ថិតនៅអគារលេខ ៣៤២មហាវិថី ព្រះមុនីវង្ស កែងផ្លូវលេខ២៨៨ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។ អគារថ្មីនេះមានកម្ពស់ ១៩ជាន់ សាងសង់ឡើងតាមបទដ្ឋានស្តង់ដារត្រឹមត្រូវ ហើយកន្លែងបម្រើអតិថិជនធំទូលាយប្រកបដោយផាសុកភាព និងសុវត្ថិភាព ប្រកបដោយភាពទាក់ទាញខ្ពស់ អគារថ្មីនេះបានចំណាយទឹកប្រាក់ជិតមួយលានដុល្លារអាមេរិកក្នុងការរចនា។

សូមបញ្ជាក់ថាៈ គ្រឹះស្ថានមីក្រូហិរញ្ញវត្ថុ បាយ័ន ក្រេឌីត ម.ក បានបង្កើតតាំងពីឆ្នាំ២០១១ដោយទទួលបានអាជ្ញាប័ណ្ណប្រកបអាជីវកម្មហិរញ្ញវត្ថុ និងទទួលបានអាជ្ញាប័ណ្ណប្រកបអាជីវកម្ម ភតិសន្យា នៅឆ្នាំ២០១៧ ពីធនាគារជាតិនៃព្រះរាជាណាចក្រកម្ពុជា។ គិតមកទល់សព្វថ្ងៃ មានការិយាល័យសាខាប្រតិបត្តិការចំនួន៦កន្លែង នៅតាមបណ្តាលខេត្តសំខាន់ៗ ដែលមានអតិថិជនប្រាក់កម្ចីជាង២.៩៣២នាក់ និងមានបុគ្គលិកកំពុងបម្រើការងារជិត១០០នាក់ មានដើមទុនចុះបញ្ជីថ្មី ៣លានដុល្លារអាមេរិក។

អត្ថបទពាណិជ្ជកម្ម

Related Topics:អត្ថបទពាណិជ្ជកម្ម

Up Next

មិត្តហ្វូន អ៊ី-ម៉ាន់នី និងព្រូដិនសលកម្ពុជា ចុះកិច្ចព្រមព្រៀង សហប្រតិបត្តិការរយៈពេលវែង ដើម្បីផ្ដល់សេវាទូរគមនាគមន៍ ធានា រ៉ាប់រងអាយុជីវិត និងគណនីតាមទូរស័ព្ទចល័ត

Don't Miss

គ.ជ.ប ព្រមានគណបក្សមួយ បើនៅតែធ្វើឲ្យប៉ះពាល់ដល់ដំណើរការចុះឈ្មោះបោះឆ្នោត នឹងមានវិធានការតាមច្បាប់