សម្ដេចតេជោ៖ បាតុករមីយ៉ាន់ម៉ា​ធ្វើបាតុកម្ម​ប្រឆាំងប្រធានអាស៊ាន​ស្មើនឹង​សម្លាប់​ពលរដ្ឋ​ខ្លួនឯង

សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងផ្តាំទៅបាតុករ​មីយ៉ាន់​ម៉ាថា បើធ្វើបាតុកម្មប្រឆាំងប្រធានអាស៊ាន ស្មើនឹងសម្លាប់ប្រជាពលរដ្ឋពលរដ្ឋខ្លួនឯង។

បើតាមសម្តេចនាយករដ្ឋមន្ត្រី បញ្ហាមីយ៉ាន់ម៉ា កម្ពុជាបានខិតខំបំពេញតួនាទីក្នុងថ្នាក់ជាសមាជិក និងជាប្រធានអាស៊ាន ដែលមានការទទួលខុសត្រូវ។ ជាមួយគ្នានោះ សម្ដេចបានធ្វើទស្សនកិច្ច​នៅមីយ៉ាន់ម៉ា ក្រោយមកក៏មានការជួបតាមអន​ឡាញជាបន្តបន្ទាប់ ដើម្បីបើកច្រកឱ្យមានទស្សនកិច្ច​របស់ប្រេសិតពិសេសប្រធានអាស៊ាន ក៏ដូចជាដើម្បីបើកច្រកឲ្យមានកិច្ចសន្ទនា ក្នុងការផ្ដល់ជំនួយ​សម្រាប់ប្រជាជនមីយ៉ាន់ម៉ា។

សម្តេចតេជោ ហ៊ុន សែន អះអាងថា អ្វីដែលប្រធានអាស៊ានចង់បាននៅពេលនេះគឺកុងសង់ស៊ីស៥ ចំណុច ប៉ុន្តែចំណុចដែលចង់បានធំបំផុត គឺមានតែ៣ទេ គឺទី១ បំបាត់អំពើហិង្សា បទឈប់បាញ់ ទី២ ជំរុញឲ្យបើកផ្លូវដើម្បីផ្ដល់ជំនួយមនុស្សធម៌ និងទី៣ បង្កើតឲ្យមានបរិយាកាសសន្ទនានយោបាយសម្រាប់ភាគីទាំងអស់។ 

មានប្រសាសន៍ដល់ចំណុចនេះ សម្តេចតេជោ ហ៊ុន សែន បានលើកឡើងថា “ខ្ញុំសូមអំពាវ​នាវ​ដល់​បាតុករ​មីយ៉ាន់ម៉ា ដែលមានគម្រោងធ្វើបាតុកម្មប្រឆាំងជាមួយខ្ញុំ អ្នកអាចភាន់ច្រឡំធំហើយ អ្នក​ធ្វើ​បាតុកម្មប្រឆាំងខ្ញុំ មានន័យមានតម្លៃស្មើនឹង​បំផ្លាញប្រទេសរបស់អ្នក។ មិនត្រឹមតែផ្ដាំទៅបងប្អូនមីយ៉ាន់ម៉ានៅអាមេរិកទេ បងប្អូនមីយ៉ាន់ម៉ានៅគ្រប់ទីកន្លែងទាំងអស់ អ្នក​ប្រឆាំងជាមួយប្រធានអាស៊ាននៅពេលនេះ មានតម្លៃស្មើនឹងកំពុងសម្លាប់ប្រជាជនខ្លួនឯង​ហើយ​សូមផ្ដាំទៅក្រុមខ្មែរប្រឆាំងមួយ ចំនួន តើកុំស៊ីពេ មីយ៉ាន់ម៉ាបានដែរទេ?”។

សម្ដេចតេជោនាយករដ្ឋមន្ត្រីបានមានប្រសាសន៏ទៀតថា មានវិទ្យុអន្តរជាតិនិយាយភាសាខ្មែរមួយ​កំពុងរៀបចំការថតពីការផ្គុំគ្នារវាងបាតុករខ្មែរប្រឆាំងជាមួយសម្តេច និងបាតុករមីយ៉ាន់ម៉ាប្រឆាំង​ជា​មួយសម្តេច តែសម្តេចថា ការធ្វើបែបនេះវាហាក់ដូចជាអន់ពេក។

សម្ដេចតេជោ​បានលើកឡើងពីការធ្វើបាតុកម្ម កាលពី២០១៦ ដែលពេល នោះ សម្ដេចបានទៅ​ចូលរួម​កិច្ចប្រជុំអាស៊ាន-អាមេរិក ជំនាន់ប្រធានាធិបតីអូបាម៉ា។

សម្តេចថា នៅពេលនោះ គេបាន​ទៅចូលរួមជាមួយបាតុករថៃ និងបាតុករផ្សេងៗទៀត ដើម្បីថតយករូបភាពឲ្យបានច្រើន ហើយដែល​សូម្បីតែសិល្បករខ្មែរឆោម ឆវិន ក៏ត្រូវបានគេថតផ្សាយថា ជាអ្នកឡើងមកធ្វើបាតុកម្មប្រឆាំង ហ៊ុន សែន ផងដែរ៕

អត្ថបទ៖ កោះកែវ

​