មន្ត្រីជាន់ខ្ពស់បរិស្ថាន អំពាវនាវពលរដ្ឋ បញ្ឈប់ការទទួលទាន និងជាវសត្វព្រៃជាបន្ទាន់

មន្ត្រីជាន់ខ្ពស់ក្រសួងបរិស្ថានអំពាវនាវដល់ប្រជាពលរដ្ឋសូមបញ្ឈប់ការទទួលទានសត្វព្រៃ និងជាវផលិតផលពីសត្វព្រៃដទៃទៀតជាដាច់ខាត ដើម្បីចូលរួមការពារ និងថែរក្សាសត្វព្រៃ និងធនធានធម្មជាតិឱ្យបានគង់វង្សសម្រាប់ក្មេងជំនាន់ក្រោយ។

ថ្លែងក្នុងសន្និសីទកាសែតនៅថ្ងៃទី១៥ ខែឧសភា ឆ្នាំ២០២២ នៅស្នាក់ការដែនជម្រកសត្វព្រៃគូលែន-ព្រហ្មទេព ខេត្តព្រះវិហារ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានអំពាវនាវយ៉ាងទទូចដល់ប្រជាពលរដ្ឋទាំងអស់នៅក្នុងប្រទេសកម្ពុជានិយាយថា “ទេចំពោះសាច់សត្វព្រៃ និងចូលរួមក្នុងសកម្មភាពអភិរក្សធនធានធម្មជាតិរបស់ព្រះរាជាណាចក្រកម្ពុជាឱ្យនៅស្ថិតស្ថេរគង់វង្ស”។

លោក នេត្រ ភក្ត្រា បានអំពាវនាវ សូមឱ្យអាជ្ញាធរមានសមត្ថកិច្ចគ្រប់ជាន់ថ្នាក់ចូលរួមទប់ស្កាត់ និងបង្ក្រាបបទល្មើសនៃការចាប់ ដាក់អន្ទាក់ ប្រមាញ់ និងប្រមូលពងសត្វព្រៃគ្រប់ប្រភេទ និងបទល្មើសនៃការជួញដូរសត្វព្រៃ និងសំណាកសត្វព្រៃដើម្បីចូលរួមការពារ និងអភិរក្សសត្វព្រៃ និងជីវៈចម្រុះគ្រប់ប្រភេទឱ្យបានគង់វង្ស និងរីកចម្រើន សម្រាប់បន្សល់ទុកដល់មនុស្សរាប់ជំនាន់ទៀត។

ខេត្តព្រះវិហារជាខេត្តទិសដៅទី២ បន្ទាប់ពីខេត្តស្ទឹងត្រែងក្នុងការរៀបចំ យុទ្ធនាការអន្ទាក់សូន្យនៅក្នុងតំបន់ការពារធម្មជាតិកម្ពុជា ដែលផ្តួចផ្តើមគំនិត និងដឹកនាំដោយក្រសួងបរិស្ថាន និងមានការចូលរួមពីអង្គការដៃគូអភិរក្សនានាដែលយុទ្ធនាការនេះប្រារព្ធឡើងនៅថ្ងៃទី១៦ ខែឧសភា ឆ្នាំ២០២២ នៅក្នុងសហគមន៍ទេសចរណ៍ធម្មជាតិត្មាត ប៉ើយធឿនក្រសាំង ស្ថិតក្នុងដែនជម្រកសត្វព្រៃគូលែន-ព្រហ្មទេព ភូមិសាស្ត្រស្រុកជាំក្សាន្ត ខេត្តព្រះវិហារ ក្រោមអធិបតីភាពលោក នេត្រ ភក្ត្រា រដ្ឋលេខាធិការក្រសួងបរិស្ថាន។

លោក នេត្រ ភក្ត្រាបានមានប្រសាសន៍ថា ក្នុងក្របខណ្ឌនៃយុទ្ធនាការអន្ទាក់សូន្យរយៈពេល ៦ខែ ក្នុងខេត្ត ៦ ភាគខាងកើតទន្លេមេគង្គរួមមាន ខេត្តស្ទឹងត្រែង ក្រចេះ មណ្ឌលគិរី រតនគិរី ព្រះវិហារ និងកំពង់ធំ ផ្តួចផ្តើម និងដឹកនាំធ្វើដោយក្រសួងបរិស្ថាន និងអង្គការដៃគូ សហការក្នុងការងារអភិរក្ស។

លោករដ្ឋលេខាធិការបានបន្តថា ការកំណត់យកខេត្តទាំង៦ ជាគោលដៅនៃយុទ្ធនាការ ព្រោះខេត្តទាំងនោះមានផ្ទៃដីភាគច្រើនគ្របដណ្តប់ដោយតំបន់ការពារធម្មជាតិដែលមានវត្តមានព្រៃឈើ និងសត្វព្រៃ និងខេត្តទាំង ៦នេះមានសកម្មភាពលក់សាច់សត្វព្រៃដោយខុសច្បាប់នៅតាមទីផ្សារ និងនៅតាមតំបន់នានានាពេលកន្លងមកដែលចាំបាច់ត្រូវធ្វើការអប់រំផ្សព្វផ្សាយ ទប់ស្កាត់ និងបង្ក្រាបឱ្យបានមានប្រសិទ្ធភាពខ្ពស់ ក៏ដូចជាកែប្រែឥរិយាបថប្រជាពលរដ្ឋមួយ ចំនួនដែលនិយមហូបសាច់សត្វព្រៃបញ្ឈប់ការហូបសាច់សត្វព្រៃ និងបញ្ឈប់ការដាក់អន្ទាក់សត្វព្រៃ។

លោករដ្ឋលេខាធិការមានជំនឿថា យុទ្ធនាការនេះនឹងចូលរួមក្នុងការកែប្រែឥរិយាបថពលរដ្ឋមួយចំនួនដែលនិយមហូបសាច់សត្វ និងចូលរួមរកដំណោះស្រាយបញ្ចប់វិបត្តិអន្ទាក់នៅក្នុងតំបន់ការពារធម្មជាតិកម្ពុជា និងមិនត្រឹមតែផ្តល់ជម្រក កន្លែងរកចំណី និងប្រភពទឹកសម្រាប់សត្វព្រៃរស់នៅនោះទេ ក៏ដើម្បីផ្តល់សុវត្ថិភាពដល់សត្វព្រៃ និងជីវៈចម្រុះក្នុងរស់នៅ។

លោក នេត្រ ភក្ត្រា បានបន្តទៀតថា ធនធានសត្វព្រៃរបស់ប្រទេសកម្ពុជាកំពុងប្រឈមនឹងហានិភ័យខ្ពស់ដោយសារវិបត្តិនៃការបរបាញ់ និងការដាក់អន្ទាក់ដែលបាន និងកំពុងកើតឡើងបណ្តាលមកពីការប្រើប្រាស់ និងជួញដូរសត្វព្រៃដោយខុសច្បាប់។ លោកបានបន្ថែមថា ដើម្បីដោះស្រាយវិបត្តិនេះ ស្ថាប័ននៃរាជរដ្ឋាភិបាលពាក់ព័ន្ធ និងអង្គការអន្តរជាតិជាដៃគូក្នុងវិស័យបរិស្ថានបានរួមគ្នាដើម្បីបើកយុទ្ធនាការអន្ទាក់សូន្យ នៅក្នុងតំបន់ការពារធម្មជាតិកម្ពុជា។ គោលដៅ​ចម្បងនៃ​យុទ្ធនាការ​នេះ គឺការឈានទៅ​លុបបំបាត់​ការប្រើអន្ទាក់​គ្រប់​ប្រភេទ​ក្នុង​តំបន់​ការពារធម្មជាតិ​របស់​កម្ពុជា។

លោក កែន សិរីរដ្ឋា ប្រធានអង្គការសមាគមអភិរក្សសត្វព្រៃកម្ពុជា WCS តំណាងឱ្យអង្គការដៃគូអភិរក្សជាមួយក្រសួងបរិស្ថាន បានអបអរសាទរគំនិតផ្តួចផ្តើមដ៏មានសារៈសំខាន់របស់ក្រសួងបរិស្ថានក្នុងការរៀបចំយុទ្ធនាការអន្ទាក់សូន្យនៅក្នុងតំបន់ ការពារធម្មជាតិ ដែលបានដើរតួនាទីសំខាន់នៅក្នុងការងារអភិរក្សធនធានជីវៈចម្រុះ និងធនធានធម្មជាតិ បញ្ឈប់​តម្រូវការសាច់សត្វព្រៃក្នុងក្របខណ្ឌខេត្តក៏ដូចជាក្នុងក្របខណ្ឌប្រទេសទាំងមូល។ តាមរយៈយុទ្ធនាការនេះ យើងនឹងអាចឈានដល់ការរៀបចំលិខិតបទដ្ឋានបន្ថែមដើម្បីកំណត់លើការប្រើប្រាស់អន្ទាក់សម្រាប់ដាក់សត្វព្រៃ និងជំរុញទៅលើការអនុវត្តច្បាប់ និងការផ្សព្វផ្សាយពីផលប៉ះពាល់ពីការដាក់អន្ទាក់ក្នុងតំបន់ការពារធម្មជាតិ។

លោករដ្ឋលេខាធិការបានរំលឹកថា ក្នុងឆ្នាំ ២០២១ ក្រសួង បរិស្ថាន និងស្ថាប័នអង្គការដៃគូរបស់ខ្លួនបានដកអន្ទាក់សរុបចំនួន ៦១ ៦១១ អន្ទាក់ ចេញពីតំបន់ការពារធម្មជាតិចំនួន ៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។ ជាមធ្យម ក្នុងមួយឆ្នាំមានអន្ទាក់សរុបចំនួនប្រមាណជាង ៤០ ០០០ ត្រូវបានដកចេញពីតំបន់ការពារធម្មជាតិទាំងនេះ៕

អត្ថបទ៖ សំអឿន