រដ្ឋបាលខេត្តតាកែវ ដាក់បញ្ជាម៉ឺងម៉ាត់ទប់ស្កាត់ ឈ្មួញនាំជ្រូកខុសច្បាប់ ពីប្រទេសវៀតណាម

នៅព្រឹកថ្ងៃទី១៦ ខែឧសភា ឆ្នាំ២០២២នេះ អាជ្ញាធរខេត្តតាកែវ បានបើកកិច្ចប្រជុំ ស្តីពី វិធានការទប់ស្កាត់ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ផ្សេងៗ ពីប្រទេសវៀតណាម តាមច្រករបៀង ចូលខេត្តតាកែវ បន្ទាប់ពីមានសេចក្តីនាំណែនាំពីលោកអភិបាលខេត្ត។

កិច្ចប្រជុំនេះដឹកនាំដោយ លោក ខាន់ សុខា អភិបាលរងខេត្តតាកែវ និងមានការចូលរួមពី លោកស្នងការរងខេត្ត លោកមេបញ្ជាការងអាវុធហត្ថខេត្ត លោកអនុប្រធានមន្ទីរកសិកម្ម រុក្ខាប្រមាញ់និងនេសាទខេត្ត អភិបាលស្រុកជាប់ព្រំដែន និងសមត្ថកិច្ចដែលឈរជើងនៅតាមបន្ទាត់ព្រំដែន។

លោក ខាន់ សុខា បានដាក់បញ្ជាដល់មន្ទីរជំនាញ និងអាជ្ញាធរពាក់ព័ន្ធទាំងអស់ ត្រូវទប់ស្កាត់ឱ្យបានរាល់ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ផ្សេងៗ ពីប្រទេសវៀតណាមតាមច្រករបៀង ចូលក្នុងភូមិសាស្ត្រ ខេត្តតាកែវ។

លោកអភិបាលរងបានសង្កត់ធ្ងន់លើមន្ទីរកសិកម្ម រុក្ខាប្រមាញ់ និងនេសាទខេត្ត និងការិយាល័យបសុពេទ្យ ត្រូវតែចុះធ្វើការតាមដានសង្កេត ប្រសិនបើមានករណីនាំចូល សត្វជ្រូក សាច់ជ្រូក និងផលិតផលសាច់ជ្រូកផ្សេងៗ ដោយខុសច្បាប់ទៀតនោះ ត្រូវសហការជាមួយអាជ្ញាធរដែនដីមានសមត្ថកិច្ចពាក់ព័ន្ធ នៅតាមបណ្តាច្រកទ្វារអន្តរជាតិ ច្រកទ្វារទ្វេរភាគី ច្រកទ្វារតំបន់ និងច្រករបៀងផ្សេងៗ ហើយបើចាប់បានត្រូវតែសិក្សាជ្រាវឱ្យច្បាស់ថា ប្រភពមកពីណា ក្រុមហ៊ុនណា ដែលលួចនាំចូល ដើម្បីចាត់វិធានការតាមផ្លូវច្បាប់។

លោក ខាន់ សុខា បានទទួលស្គាល់ថា កន្លងមករដ្ឋបាលខេត្តបានសង្កេតឃើញពិតជាមានជនខិលខូចមួយចំនួនលួចនាំសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ផ្សេងៗ ពីប្រទេសវៀតណាម ដោយគ្មានច្បាប់អនុញ្ញាត ចូលតាមច្រករបៀងក្នុងភូមិសាស្ត្រខេត្តតាកែវប្រាកដមែន៕

អត្ថបទ៖ វីរៈ