សម្ដេចតេជោ ហ៊ុន សែន ថា មិនយូរប៉ុន្មានទៀតនោះទេ សម្ដេចនឹងចាក់វ៉ាក់សាំងដូសទី ៥

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា មិនយូរប៉ុន្មានទៀតនោះទេ សម្ដេចនឹងអាចចាក់វ៉ាក់សាំងបង្ការជំងឺកូវីដ-១៩ ដូសទី ៥បន្តទៀត។ ការថ្លែងរបស់សម្ដេចតេជោខាងលើនេះ បានធ្វើឡើងក្នុងពិធីជួបសំណេះ សំណាល ជាមួយក្រុមគ្រូពេទ្យសម្តេចតេជោប្រឆាំងកូវីដ-១៩ នាព្រឹកថ្ងៃទី ១៧ ខែឧសភា ឆ្នាំ ២០២២នេះ។

សម្ដេចតេជោនាយករដ្ឋមន្ត្រី បានថ្លែងបន្តថា «ហើយខ្ញុំមិនយូរប៉ុន្មានទេ ទាមទាររកអាដូសទី ៥ដែរ ហើយឥឡូវគ្រូពេទ្យត្រៀមទុកឲ្យហើយទៅ អាដូសទី ៥សម្រាប់ខ្ញុំគឺស្អី ព្រោះខ្ញុំបានចាក់រួចហើយ astrazeneca ដូសទី ១ ដូសទី ២ ដូសទី ៣ pfizer ដូសទី ៤ ហើយនៅមានស្អី សម្រាប់ដូសទី ៥សម្រាប់ខ្ញុំ»។

សម្ដេចតេជោ ហ៊ុន សែន បានបន្តលើកឡើងថា មានតែវ៉ាក់សាំងទេ ដែលជាអាវក្រោះការពារខ្លួន ពីការឆ្លងនៃជំងឺកូវីដ -១៩ ហើយសម្ដេចបានណែនាំឲ្យក្រសួងសុខាភិបាល និងសមាគមគ្រូពេទ្យពាក់ព័ន្ធ ត្រូវបន្តយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋឲ្យបានកាន់តែច្រើនបន្ថែមទៀត៕