គ្រោះថ្នាក់ចរាចរណ៍ ធ្វើឱ្យកម្ពុជាខាតបង់ថវិកា​ប្រមាណជាង ៤៦០លានដុល្លារ

កម្ពុជា ខាតបង់ប្រាក់ប្រមាណ ៤៦៧លានដុល្លារ ដោយសារគ្រោះថ្នាក់ចរាចរណ៍ គិតត្រឹមឆ្នាំ២០១៩។ នេះបើតាមយោងតាមការសិក្សាស្រាវជ្រាវរបស់អង្គការមូលនិធិបង្ការរបួសអាស៊ីប្រចាំកម្ពុជា (AIP)។

លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានឱ្យដឹងថា បើទោះបីជាអត្រាគ្រោះថ្នាក់ចរាចរណ៍រយៈពេលចុងក្រោយមានការថយចុះយ៉ាងណាក្តី តាមការសិក្សាស្រាវជ្រាវមួយរបស់អង្គការ UNDP ដោយបានសហការជាមួយក្រសួងសាធារណការនិងដឹកជញ្ជូន ក៏ដូចជាគណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា គិតត្រឹមឆ្នាំ២០១៩ ក្នុងពេលដែលកម្ពុជាមានអ្នកស្លាប់រហូតដល់ជាង ២ពាន់នាក់ និងរងរបួសជាច្រើពាន់នាក់ ជាលទ្ធផលរកឃើញថា កម្ពុជាខាតបង់ជិត ៤៦៧លានដុល្លារ។

លោក គឹម បញ្ញា បានឱ្យដឹងបែបនេះ នៅក្នុងកិច្ចសម្ភាសន៍ជាមួយអ្នកសារព័ត៌មាន ក្រោយសិក្ខាសាលាជាមួយថ្នាក់ដឹកនាំសហជីពកម្មករ ស្តីពីការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា នៅថ្ងៃទី១៨ ឧសភា ឆ្នាំ២០២២។

លោក គឹម បញ្ញា បានបន្តថា ជារៀងរាល់ថ្ងៃនៅកម្ពុជា មានកម្មករនិយោជិតក្នុងវិស័យកាត់ដេរសម្លៀកបំពាក់ និងផលិតស្បែកជើងប្រមាណជាង ៧០ម៉ឺននាក់ ដែលប្រថុយប្រថានអាយុជីវិតខ្លួននឹងហានិភ័យក្នុងការធ្វើដំណើរទៅមកកន្លែងការងារនៅលើផ្លូវដែលមានចរាចរណ៍កកស្ទះ និងប្រឈមគ្រោះថ្នាក់ ដើម្បីស្វែងរកចំណូលផ្គត់ផ្គង់ដល់គ្រួសារ៕

​

​