រដ្ឋបាលរាជធានី ត្រៀមបើកការដ្ឋានសាងសង់ស្ថានីយ ប្រព្រឹត្តកម្មសំណល់ភក់បង្គន់ ថ្ងៃស្អែក

រដ្ឋបាលរាជធានីភ្នំពេញបើកការដ្ឋានសាងសង់ស្ថានីយ ប្រព្រឹត្តកម្មសំណល់ភក់បង្គន់ក្នុងរាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២ ស្អែកនេះ។

លោក ហួត ហៃ អភិបាលរង និងជាតំណាងលោក ឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ជើញជាអធិបតីក្នុង ពិធីក្រុងពាលីតាមបែបសាសនា នារសៀលថ្ងៃទី២៣ ខែឧសភានេះ ដើម្បីសុំម្ចាស់ទឹកម្ចាស់ដីត្រៀមបើកការដ្ឋានសាងសង់ស្ថានីយ ប្រព្រឹត្តកម្មសំណល់ភក់បង្គន់ របស់គម្រោងគ្រប់គ្រងសំណល់ភក់បង្គន់ក្នុងរាជធានីភ្នំពេញ ក្រោមជំនួយរបស់សមាគមAIMF ។

ពិធីបើកការដ្ឋានសាងសង់ជាផ្លូវការនឹងធ្វើឡើងនៅថ្ងៃទី២៤ ខែឧសភា ស្អែកនេះ ក្រោមអធិបតីភាពលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ព្យែរ បៃយ៉េ។​ ទីតាំងស្ថានីយប្រព្រឹត្តកម្មនេះស្ថិតនៅប៉ែកខាងជើងឈៀងខាងលិច ក្នុងសង្កាត់ភ្លើងឆេះរទេះ ខណ្ឌកំពូល។

ស្ថានីយនេះជាការរួមចំណែកកាត់បន្ថយជាតិពុលធ្វើឱ្យប៉ះពាល់ដល់បរិស្ថានជុំវិញ និងជីវភាពរស់នៅប្រចាំថ្ងៃ ក៏ដូចសុខមាលភាពរបស់ប្រជាពលរដ្ឋក្នុងទីក្រុង មុននឹងបង្ហូរចូលទៅបឹង ទន្លេធម្មជាតិ។

រដ្ឋបាលរាជធានីភ្នំពេញទើបបានចុះហត្ថលេខាជាមួយសមាគម AIMF លើការងារផែនការត្រៀមបម្រុងសម្រាប់ឆ្លើយតបសង្គ្រោះបន្ទាន់ គ្រោះមហន្តរាយ យុទ្ធសាស្ត្រ គ្រប់គ្រងសំណល់ភក់បង្គន់ និងផែនទីបង្ហាញផ្លូវយុទ្ធសាស្ត្រ ស្ដីពីទីក្រុងឆ្លាតវៃ និងមានចិរភាព៕

អត្ថបទ៖ ស្រីរ័ត្ន