បង្រ្កាប​បទល្មើស​នៅរដូវបិទ​នេសាទ​ដកហូត​មងជិត១ម៉ឺនម៉ែត្រ​យកទៅ​ដុតបំផ្លាញចោល

កម្លាំងជលផល​សហការជាមួយឆ្មាំទន្លេ​ចុះបង្ក្រាបបទល្មើស​នេសាទនៅ​រដូវត្រីពងកូន​ដកហូត​មង​បាន​៩៤៦០ម៉ែត្រ ​និងហៅអ្នកនេសាទ​ចំនួន ៨៥ នាក់ មកអប់រំ​ និងឱ្យធ្វើកិច្ចសន្យា​បញ្ឈប់ការដាក់​មងតាមអន្លុងអភិរក្ស ឧបករណ៍នេសាទខុសច្បាប់ត្រូវបានដុតបំផ្លាញចោល។

​លោក ស្រី សំវិចិត្រ​ នាយខណ្ឌជលផលស្តីទី​បានបញ្ជាក់ថា៖ ដើម្បីការពារត្រីមេពូជ​ក្នុងរដូវបិទ​នេសាទ​ កម្លាំងជលផលបាន​សហការជាមួយជំនាញ​ពាក់ព័ន្ធ​បានចុះបង្ក្រាប​បទល្មើសជលផល ​នៅ​ក្នុងតំបន់គ្រប់គ្រង​អភិរក្សត្រីមេពូជ​ គឺបង្ក្រាបផង​ធ្វើការ​អប់រំផង​។ 

​លោកបន្តថា​៖ នៅក្នុងការចុះល្បាត​យប់ថ្ងៃទី ២៦ ខែឧសភានេះ​ កម្លាំងចំរុះរបស់យើង​បានរឹបអូសយក​មងសរុបបានចំនួន ៩.៤៦០ម៉ែត្រ សន្ទូចរនង៧៥០ផ្លែ ក្បាលឆក់ចំនួន២ អាគុយ១ ថ្នង១ និងតម្រូវ​ឱ្យ ​ប្រជានេសាទចំនួន​ ៨៥នាក់ធ្វើកិច្ចសន្យាបញ្ឈប់ការលួច​ចូលធ្វើ​នេសាទ​ក្នុងតំបន់ហាមឃាត់​។

​លោក កាញ់ អ៊ី អ្នកនេសាទនៅចំណុចសាឃូនភូមិហាងឃូបានទទួលស្គាល់ថា៖​ នៅមុនចុះអនុវត្តវិធានការ​នេះ អាជ្ញាធរនិងសហគមន៍ក៏បានផ្សព្វផ្សាយសេចក្ដីជូនដំណឹង​ ស្ដីពីរដូវ​បិទនេសាទ ឆ្នាំ២០២២ នៅខេត្តស្ទឹងត្រែង តាមមេក្រូនៅក្នុងភូមិ និងតាមភូមិសាស្ត្រផ្សេងៗទៀតរួចមកហើយដែរ តែដោយសារតែកត្តាខ្វះខាតពួកគាត់ចេះ​តែមកធ្វើនេសាទ​ដើ់ម្បីរកប្រាក់​ដោះ​ស្រាយ​ជីវភាពមិនមែនថាមិនដឹងខុសនោះទេ។

​សូមបញ្ចាក់ថា​៖ក្នុងរដូវបិទនេសាទនេះក្រុមការងារ​អភិរក្សមិនបន្ធូរដៃទេ ដូចនេះសូមបងប្អូន​ប្រជាអ្នកនេសាទទាំងអស់ត្រូវចូលរួមថែរក្សាធនធានជលផលរបស់យើងបើមិនដូច្នេះទេ និងធ្វើការ​ផាកពិន័យតាមច្បាប់ផលផលប្រសិនបើបងប្អូនធ្វើកិច្ចសន្យាហើយ ទៅធ្វើនេសាទ​ក្នុងអន្លុងអភិរក្សទៀតនោះ ជាក់ស្តែងមងសន្ទូចដែលដកហូតបាននេះ ត្រូវបានដុតបំផ្លាញចោលភ្លាមៗដែរ៕

អត្ថបទ៖ ងិនលីម