ប្រធានមន្ទីរពេទ្យព្រះអង្គឌួងអំពាវនាវដល់អាណាព្យាបាលកុមារមានបញ្ហាភ្នែកប្រញាប់មកព្យាបាល

ប្រធានមន្ទីរពេទ្យព្រះអង្គឌួង បានអំពាវនាវដល់មាតាបិតាអាណាព្យាបាល ដែលមានកូនចៅមានបញ្ហាភ្នែក ត្រូវរួសរាន់នាំមកពិនិត្យនិងព្យាបាលឱ្យបានទាន់ពេលវេលា ដើម្បីកាត់បន្ថយភាពពិការភាព។

សាស្រ្តាចារ្យ លូ លីឃាង នាយកមន្ទីរពេទ្យព្រះអង្គឌួងបានមានប្រសាសន៍ប្រាប់កម្ពុជាថ្មីនៅ​រសៀលថ្ងៃទី២៨ឧសភានេះថា មន្ទីរពេទ្យទើបតែបង្កើតបន្ទប់ព្យាបាលជំងឺភ្នែកកុមារដែលមានគ្រូពេទ្យឯក​ទេសខ្ពស់ផ្នែកកុមារ និងមានបំពាក់ឧបករណ៍ទំនើបៗ ដែលអាចជួយក្នុងការរុករករបកគំហើញបានទាន់ពេលវេលា។

លោកសាស្ត្រាចារ្យបានបន្តថា«នៅពេលដែលយើងរកឃើញរបកគំហើញបានទាន់ពេលនោះ វានឹងអាចកាត់បន្ថយនូវពិការភាពរបស់កុមារបានច្រើនផដែរ ខណៈបច្ចុប្បន្នក្នុង១ថ្ងៃគិតជាមធ្យមមានកុមារប្រហែល២០ភាគរយ ក្នុងចំណោមអ្នកមានបញ្ហាភ្នែក៣០០ទៅ៣៥០នាក់ មកពិគ្រោះជំងឺនៅមន្ទីរពេទ្យព្រះអង្គឌួង»។

ជាមួយគ្នានេះ លោកស្រី វេជ្ជបណ្ឌិត កូសម៉ា ឯកទេសផ្នែកជំងឺភ្នែកកុមារនៅមន្ទីរពេទ្យព្រះអង្គឌួងបានមានប្រសាសន៍ថា កុមារដែលមកពិគ្រោះនិងព្យាបាលនៅមន្ទីរពេទ្យព្រះអង្គឌួងភាគច្រើនមានជំងឺកំហុសកំណុំ បន្ទាប់មកជំងឺភ្នែកខ្ជិល ជំងឺភ្នែកស្រលៀង ជំងឺឡើងបាយពីកំណើត ភាពមិនធម្មតាពីកំណើត និងពិនិត្យភ្នែកចំពោះក្មេងកើតមិនគ្រប់ខែ និង

 ជំងឺផ្សេងៗទៀត។

ទន្ទឹមនឹងនេះ លោកសាស្ត្រាចារ្យ លូ លីឃាង បានថ្លែងអំណរគុណចំពោះអង្គការ សាយ ហ្វ អល ដែលបានផ្តល់សម្ភារបរិក្ខាវេជ្ជសាស្រ្តទំនើបៗនិងទាន់សម័យ ដល់មន្ទីរពេទ្យសម្រាប់ពិនិត្យនិងព្យាបាលជំងឺភ្នែកជូនអ្នកជំងឺពិសេសសម្រាប់ជំងឺភ្នែកកុមារប្រកប ដោយគុណភាពនិងប្រសិទ្ធភាពខ្ពស់៕សំអឿន