មន្ទីរ​សាធារណការ​ព្រះវិហារ​​ជួសជុល​ផ្លូវជាតិ​លេខ​ ៩ ​ពីស្ទឹងត្រែង​ដល់ក្រុង​ព្រះវិហារ​ប្រវែងជិត ៧០​ គីឡូម៉ែត្រ

បើទោះបីជាប់មមាញឹកខ្លាំងក្នុងយុទ្ធនាការនៃការឃោសនាបោះឆ្នោតក្រុមប្រឹក្សា ឃុំ សង្កាត់ក្តី ក៏​លោកសំ លាងទ្រី ប្រធានមន្ទីរសាធារណការ និងដឹកជញ្ជូនដឹកជញ្ជូនខេត្តព្រះវិហារមិនភ្លេចពី​ការជួសជុល​ផ្លូវដើម្បីសម្រួលចរាចរជូនប្រជាពលរដ្ឋដែរ។​

ជាក់ស្តែងនៅពេលនេះកំណាត់ផ្លូវជាតិលេខ ៩ មួយខ្សែ ​មានប្រវែងជិត ៧០គីឡូម៉ែត្រ​ ពីព្រំប្រទល់​ខេត្តស្ទឹងត្រែង​ ដល់ក្រុងព្រះវិហារ​ ត្រូវបានរមន្ទីរសាធារណការ និងដឹក​ជញ្ជូនខេត្តធ្វើ​ការជួសជុល​ឡើងវិញដើម្បីសម្រួលដល់ការធ្វើដំណើររបស់ប្រជាពលរដ្ឋ។​

លោក សំ លាងទ្រី បានឱ្យដឹងថា៖ ថ្ងៃទី ៣០ ខែឧសភា ឆ្នាំ២០២២ នេះ ក្រុមការងារថែទាំផ្លូវថ្នល់ នៃមន្ទីរសាធារការនិងដឹកជញ្ជូនខេត្តព្រះវិហារ​ធ្វើការ​ជួសជុល​ថែទាំ​ កំណាត់ផ្លូវជាតិលេខ៩​ ប្រវែង​ ៦៩.៨២ គីឡូម៉ែត្រ​ ចាប់ពីព្រំប្រទល់ខេត្តស្ទឹងត្រែង​ ដល់ក្រុងព្រះវិហារ​ ខេត្តព្រះវិហារ​ ដោយធ្វើ​ការ​សៀល​កៅស៊ូ​ កន្លែងចោះ​ កន្លែងស្រុត​ និងលុបសំបុកមាន់​ ដើម្បីសម្រួលដល់​ការធ្វើដំណើរ និង​ដឹកជញ្ជូនទំនិញផ្សេងៗរបស់ប្រជាពលរដ្ឋមាន​ភាពងាយស្រួល។

លោក សំ លាងទ្រី ក៏បានសូមបងប្អូនប្រជាពលរដ្ឋត្រូវចូលរួមថែរក្សា​ផ្លូវថ្នល់របស់​យើងប្រយោជន៍​ឱ្យ​ការប្រើ​ប្រាស់បានយូរអង្វែង​ ដោយមិនត្រូវយកចំណីផ្លូវធ្វើអាជីវកម្ម​គ្រប់ប្រភេទ មិនត្រូវចាក់​ដីខ្ពស់​ជាងផ្លូវ​ មិនត្រូវដឹកជញ្ជូនទំនិញ​លើស​ទម្ងន់ដែលច្បាប់បានកំណត់​ ពិសេសសូមចូលរួម​គោរព​ច្បាប់ស្តីពីចរាចរណ៍ផ្លូវគោកទាំងអស់គ្នា៕

អត្ថបទ៖ ស្រីរ័ត្ន