ចេកណាំវ៉ា របស់អ្នក​ព្រែកថ្មី មានទីផ្សារ ដោយសារផ្លែចេកអ្នកតាមខេត្តមានការយឺតយ៉ាវ

អ្នកចម្ការនៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បាន​សម្រុក​កាប់ផ្លែចេកណាំវ៉ា យក​មកលក់ផ្សារច្បារអំពៅ និងតាម​បណ្ដា​ផ្សារនានា ខណៈតម្លៃក៏គ្រាន់បើជាងមុន។

កសិករឈ្មោះ វ៉ាន់ នុន បាននិយាយថា ផ្លែចេកណាំវ៉ា ដែលពួកគាត់ដាំនៅចម្ការ គឺពីមុនមកមិនសូវ​មាន​ម៉ូយ​រង់ចាំទទួលទិញទេ ដោយសារឈ្មួញច្រើននាំចូលពីតាមបណ្តាខេត្ត ដូច្នេះហើយទើបផ្លែចេកនៅក្បែរ​ក្រុងត្រូវបាត់បង់ម៉ូយ។ប៉ុន្តែប៉ុន្មានខែនេះ ​ឈ្មួញអាក់ខានដឹកយកមកលក់ភ្នំពេញ ទើបចេករបស់​ពួកគាត់​ត្រូវមានហាងឆេងឡើងវិញ។

កសិករដដែលបន្តថា ចេកណាំវ៉ា ដែលឈ្មួញចុះទៅទិញដល់ចម្ការ គឺក្នុង​១ស្និត​ ថ្លៃ២០០០រៀល ហើយ​មក​ដល់ផ្សារ គេលក់រាយក្នុង១ស្និត ថ្លៃ៣០០០រៀល។

ដោយឡែកអាជីវករលក់ផ្លែចេក នៅផ្សារច្បារអំពៅ ឈ្មោះ សិន សាវី ​បានឲ្យដឹងថា មុខរបរលក់ផ្លែចេក​គឺបានប្រាក់ចំណេញគួរសម ​។អាជីវកររូបនេះ លើកឡើងថា ​ប្រជាពលរដ្ឋនិយមទិញចេកណាំវ៉ា យកទៅ ក៏ព្រោះតែជាដំណាំក្នុងស្រុក និងគ្មានសារជាតិគីមី​។

​យ៉ាងណាក៏ដោយ អាជីវករសំណូមពរដល់កសិករក្នុងស្រុក ត្រូវនាំគ្នាដាំដំណាំ ដោយប្រើប្រាស់ជីធម្មជាតិ ជៀសវាង​ដាក់​ជីគីមី នាំឲ្យប៉ះពាល់ដល់សុខភាពអ្នកទទួលទាន៕

អត្ថបទ ៖ នរា