ក្រុមអ្នកសង្កេតការណ៍អន្តរជាតិ ចុះ​ពិនិត្យដំណើរការបោះឆ្នោតនៅមណ្ឌលវិទ្យាល័យវត្តកោះ 

នៅព្រឹកថ្ងៃទី០៥ ខែមិថុនា ឆ្នាំ២០២២ នេះ ដែលជាថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នេះ ក្រុមអ្នកសង្កេតការណ៍អន្តរជាតិជាច្រើន នៅតាមបណ្ដាប្រទេសផ្សេងៗដែលបានអញ្ជើញមកពិនិត្យដំណើរការបោះឆ្នោត ពួកគាត់បានអញ្ជើញបុកពិនិត្យដំណើរការបោះឆ្នោតនៅមណ្ឌលបោះឆ្នោតវិទ្យាល័យវត្តកោះ ដែលស្ថិតនៅក្នុងសង្កាត់បឹងរាំងខណ្ឌដូនពេញរាជធានីភ្នំពេញ។ ក្នុងនោះក្រុមអ្នកសង្កេតការណ៍អន្តរជាតិ បានចូលទៅពិនិត្យ ការិយាល័យលេខ០២៣០ និង០២៣១ និងបានដើរមើលតាមការិយាល័យផ្សេងៗ នៅក្នុងវិទ្យាល័យវត្តកោះ។ 

នៅក្នុងសកម្មភាព នៃការពិនិត្យដំណើរការបោះឆ្នោតដែរ គេឃើញក្រុមក្រុមអ្នកសង្កេតការណ៍អន្តរជាតិ បានពិនិត្យទៅលើបញ្ជីបោះឆ្នោត ពិនិត្យហិបឆ្នោត ពិនិត្យបន្ទប់សម្ងាត់ ពិនិត្យប៊ិចសម្រាប់គូសសន្លឹកឆ្នោត និងបានសួរអំពីតិវិធីផ្សេងៗនៅក្នុងការគូសសន្លឹកឆ្នោត ជាពិសេសទាក់ទងទៅនឹងជនពិការភ្នែកដែលគាត់អញ្ជើញមកបោះឆ្នោត តើពួកគាត់ត្រូវធ្វើដូចម្ដេច ? ។

នៅក្នុងដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ដែលបានចាប់ផ្ដើមលាបម៉ោង៧ ព្រឹក ថ្ងៃទី ០៥ ខែមិថុនា នេះ នៅមណ្ឌលបោះឆ្នោតវិទ្យាល័យវត្តកោះ មិនមានបញ្ហាអ្វីមួយកើតឡើង ដែលនាំអោយមានការរាំងស្ទះដល់ដំណើរការបើកការិយាល័យបោះឆ្នោតនេះនោះទេ៕ កោះកែវ