លោកស្រី ឱ វណ្ណឌីន៖ ស្ថានភាពឆ្លងរាតត្បាតជំងឺកូវីដ-១៩ នៅកម្ពុជាធូរស្បើយ ប៉ុន្ដែលើសកលលោកនៅមិនទាន់

លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ មានប្រសាសន៍ថា ថ្វីដ្បិតតែ ស្ថានភាពនៃការឆ្លងរាតត្បាតនៃជំងឺកូវីដ១៩ នៅកម្ពុជាមានភាពធូរស្បើយល្អប្រសើរក៏ពិតមែន ប៉ុន្ដែយើងទាំងអស់គ្នាមិនត្រូវភ្លេចខ្លួន ដោយសារនៅលើសកលលោកនេះ ស្ថានភាពឆ្លងរាតត្បាតនៃជំងឺកូវីដ១៩ នៅមានសភាពមិនទាន់ ធូរស្បើយនៅឡើយ។

ប្រសាសន៍នេះ បានលើកឡើងនៅថ្ងៃទី០៦ ខែមិថុនា ឆ្នាំ២០២២នេះ ក្នុងសារជាសំឡេងក្រើនរំលឹក ស្តីពី យុទ្ធនាការចាក់វ៉ាក់សាំងកូវីដ-១៩ ដូសទី៥ ជូនដល់មន្រ្តីជួរមុខ និងក្រុមគោលដៅអាទិភាព ចាប់ពី ថ្ងៃទី០៩ ខែមិថុនា  ឆ្នាំ២០២២។

លោកស្រី ឱ វណ្ណឌីន មានប្រសាសន៍ថា ការទទួលយកនូវវ៉ាក់សាំងកូវីដ-១៩ ដូសទី៥នេះ គឺជាការជួយបង្កើននូវភាពស៊ាំនៅក្នុងសរីរាង្គរបស់បុគ្គលផង និង រក្សានូវភាពរឹងមាំនៃភាពស៊ាំសហគមន៍របស់យើង ដើម្បីឆ្ពោះទៅរកការរស់នៅធម្មតានៅក្នុងប្រក្រតីភាពថ្មីរបស់យើងនេះ នៅក្នុងការចូលរួមបន្តទប់ស្កាត់ នូវការវ៉ៃលុកពីវីរុសកូវីដ-១៩ ជាពិសេសគឺពពួកបំប្លែងថ្មីៗ និង កាត់បន្ថយបានជាអតិបរមានូវអត្រាមរណភាពដោយសារជំងឺកូវីដ-១៩។ ថ្វីត្បិតតែស្ថានភាពនៃការឆ្លងរាតត្បាតនៃជំងឺកូវីដ-១៩ នៅកម្ពុជាមានភាពធូរស្បើយល្អប្រសើរក៏ពិតមែន ប៉ុន្ដែយើងទាំងអស់គ្នាមិនត្រូវភ្លេចខ្លួន ដោយសារនៅលើសកលលោកនេះ ស្ថានភាពឆ្លងរាតត្បាតនៃជំងឺកូវីដ-១៩ នៅមានសភាពមិនទាន់ ធូរស្បើយនៅឡើយ ហើយយើងក៏ត្រូវតែបន្តការប្រុងប្រយ័ត្នរបស់យើងធ្វើយ៉ាងណាដើម្បីកុំឱ្យមានការផ្ទុះឡើងវិញនូវការឆ្លងរាតត្បាតនៃជំងឺកូវីដ-១៩ ដែលយើងទាំងអស់គ្នាធ្លាប់ឆ្លងកាត់នៅក្នុងរយៈពេលកន្លងរួចមកហើយ។

រដ្ឋលេខាធិការក្រសួងសុខាភិបាល មានប្រសាសន៍បន្តថា៖ “ខ្ញុំសុំធ្វើការអំពាវនាវហើយអំពាវនាវទៀត សូមបងប្អូនយើងទាំងអស់យកចិត្តទុកដាក់លើការទទួលយកនូវការចាក់វ៉ាក់សាំងកូវីដ-១៩ ដូសទី៥ នេះឱ្យបានគ្រប់គ្រប់គ្នា ទៅតាមក្រុមគោលដៅ ដែល គ.វ.ក-១៩ បានចេញផ្សាយនូវសេចក្ដីជូនព័ត៌មាន តាំងពីថ្ងៃទី២០ ខែឧសភា ឆ្នាំ២០២២ កន្លងទៅនេះរួចហើយ។ ទន្ទឹមនឹងនោះខ្ញុំសូមធ្វើការអំពាវនាវដ៏ទទូចទៅដល់បងប្អូនយើងទាំងអស់នៅទូទាំងព្រះរាជាណាចក្រកម្ពុជា សូមបន្តមកទទួលយកនូវវ៉ាក់សាំងកូវីដ-១៩ ទាំងដូសទី១ ទាំងដូសទី២ ទាំងដូសទី៣ និងដូសទី៤ ឱ្យបានគ្រប់គ្រប់គ្នា ដើម្បីការពារសរីរាង្គរបស់បុគ្គល ដើម្បីចូលរួមចំណែកធ្វើយ៉ាងណាឱ្យការរស់នៅរបស់បងប្អូនមានភាពរឹងពឹង មានភាពរឹងមាំទប់ស្កាត់ពីការវ៉ៃលុកខ្លាំងក្លានៃវីរុសកូវីដ-១៩ ដែលអាចនឹងកើតមានឡើងជាយថាហេតុ។ នេះគឺជាចំណុចសំខាន់ដែលខ្ញុំសូមអំពាវនាវហើយអំពាវនាវទៀត សូមឱ្យបងប្អូនយកចិត្តទុកដាក់ខ្ពស់លើការចាក់វ៉ាក់សាំងកូវីដ-១៩ នេះឱ្យបានគ្រប់គ្រប់គ្នា”។

គិតត្រឹមព្រឹកថ្ងៃទី០៦ ខែមិថុនានេះ ចំនួនអ្នកឆ្លងជំងឺកូវីដ-១៩ នៅក្នុងប្រទេសសមាជិកអាស៊ាន បានកើនឡើងដល់ជាង ៣១,៨ លាននាក់ ក្នុងនោះអាស៊ានមានអ្នកស្លាប់ដោយជំងឺកូវីដ-១៩ សរុបជាង ៣៥ ម៉ឺននាក់។

បើតាមទិន្នន័យគេហទំព័រតាមដានការរីករាលដាលជំងឺកូវីដ-១៩ លើពិភពលោក WORLDOMETER បានបង្ហាញថា បើប្រៀបធៀបទៅនឹងទិន្នន័យនៃការឆ្លងពីម្សិលមិញ ចំនួនអ្នកឆ្លងជំងឺកូវីដ-១៩ នៅតំបន់អាស៊ាន មានការកើនឡើងប្រមាណជាង ៧ ពាន់នាក់។ វៀតណាម នៅតែបន្តជាប្រទេសមានចំនួនអ្នកឆ្លងច្រើនជាងគេក្នុងចំណោមសមាជិកអាស៊ានទាំងអស់ បន្ទាប់មកប្រទេសប្រទេសឥណ្ឌូនេស៊ី និងប្រទេសម៉ាទ្បេស៊ី។

គួរបញ្ជាក់ថា គិតត្រឹមថ្ងៃទី៥ ខែមិថុនា ម្សិលមិញនេះ ក្រសួងសុខាភិបាលកម្ពុជា បានចេញសេចក្តីប្រកាសព័ត៌មានបញ្ជាក់ថា កម្ពុជាមិនមានអ្នកឆ្លងកូវីដ-១៩ រយៈពេល២៩ថ្ងៃជាប់ៗគ្នា។ គិតត្រឹមថ្ងៃដដែលនេះ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន ១៣៦ ២៦២ នាក់ អ្នកជាសះស្បើយសរុបចំនួន ១៣៣ ២០៥ នាក់ ស្លាប់សរុបចំនួន ៣ ០៥៦ នាក់៕

អត្ថបទ៖ ច័ន្ទ វីរៈ