សៀវភៅ “កេរដំណែលស្នាដៃម្ហូបខ្មែរ” ឈ្នះជ័យលាភីធំចំនួន ២ បន្ថែមទៀត

ក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងនៅព្រឹកថ្ងៃទី០៩ ខែមិថុនានេះថា បន្ទាប់ពីទទួលបានពានរង្វាន់ជា “សៀវភៅម្ហូបអាស៊ីដ៏ល្អដាច់គេ” (Best Asian Cookbook) ក្នុងកម្មវិធី Gourmand World Cookbook Awards 2021 នៅទីក្រុងប៉ារីស កន្លងទៅនេះ សៀវភៅ “កេរដំណែលស្នាដៃម្ហូបខ្មែរ” (The Taste of Angkor) ដែលរៀបរៀងឡើងដោយក្រសួងការបរទេស និងសហប្រតិបត្តិការអន្តរជាតិ ត្រូវបានដាក់ប្រកួតសារជាថ្មីម្តងទៀត ក្នុងសន្និសីទម្ហូបអាហារអន្តរជាតិ (Umeå) នាថ្ងៃទី២-៥ ខែមិថុនា ឆ្នាំ២០២២ នៅទីក្រុង Umeå ប្រទេសស៊ុយអែត។

បើតាមក្រសួងការបរទេស សៀវភៅ “កេរដំណែលស្នាដៃម្ហូបខ្មែរ” បានឈ្នះជ័យលាភីធំៗចំនួន២ បន្ថែមទៀត រួមមាន៖ “សៀវភៅម្ហូបអាស៊ីដ៏ល្អដាច់គេ” (Best Asian Cuisine Book) និងសៀវភៅម្ហូបឆ្នើម ដែលរៀបរៀងដោយថ្នាក់ដឹកនាំនៃរដ្ឋ (Heads of State/Food)។

គួរបញ្ជាក់ផងដែរថា សៀវភៅម្ហូបនេះបានទទួលជ័យលាភី ២ឆ្នាំជាប់គ្នាពី Gourmand World Cookbook Awards។ ទន្ទឹមនឹងនេះ សៀវភៅ “តម្រាភោជនាហារ” (The Culinary Art of Cambodia) ពីប្រទេសកម្ពុជា ក៏បានទទួលជ័យលាភីពិសេស ពីគណៈវិនិច្ឆ័យ (Special Award of the Jury) នៃ Gourmand World Cookbook Awards 2022 ផងដែរ។

ស្ថាបនិកកម្មវិធី Gourmand Cookbook Awards លោក Edouard Cointreau បានលើកឡើងថា សៀវភៅ “កេរដំណែលស្នាដៃម្ហូបខ្មែរ” គឺជាឧទាហរណ៍មួយ នៃសៀវភៅម្ហូបដែលលេចធ្លោបំផុត ដោយបានឆ្លុះបញ្ចាំងពីកេរដំណែល និងភាពរុងរឿង នៃប្រវត្តិសាស្ត្រ ស្ថាបត្យកម្ម ប្រពៃណី និងសិល្បៈម្ហូបខ្មែរ ដែលគួរតែបានចែករំលែកជាមួយបណ្តាប្រទេសនានាក្នុងពិភពលោក តាមរយៈការផ្សព្វផ្សាយពីអរិយធម៌ដ៏យូរលង់របស់កម្ពុជា មានអាយុកាលជាង ១ សហស្សវត្ស។

បើតាមក្រសួងការបរទេស សមិទ្ធិផលដ៏វិសេសវិសាលនេះ ពិតជាមានសារៈសំខាន់ណាស់ក្នុងការជួយលើកតម្កើងកិត្យានុភាពជាតិកម្ពុជានៅលើឆាកអន្តរជាតិ ខណៈដែលការទូតម្ហូបអាហារ គឺជាផ្នែកមួយដ៏សំខាន់នៃយុទ្ធសាស្រ្តការទូតសេដ្ឋកិច្ចកម្ពុជា ឆ្នាំ២០២១-២០២៣ របស់ក្រសួងការបរទេស និងសហប្រតិបត្តិការអន្តរជាតិ។ 

មោទនភាពជាតិ នាពេលនេះ នឹងក្លាយជាជំហានថ្មីមួយទៀតសម្រាប់កម្ពុជា ក្នុងការពង្រឹងវិស័យការទូតម្ហូបអាហារ តាមរយៈការលើកតម្កើងកិត្តិនាមជាតិ និងការអនុវត្តយុទ្ធសាស្រ្តការទូតសេដ្ឋកិច្ចរបស់កម្ពុជា សំដៅរួមចំណែកសម្រេចបាននូវចក្ខុវិស័យជាតិ ឆ្នាំ២០៣០ និងឆ្នាំ ២០៥០៕

អត្ថបទ៖ កោះកែវ