គ.ជ.ប នឹងទទួលសម្ភារ ឯកសារ ដែលបម្រើឲ្យការបោះឆ្នោតពីគ្រប់រាជធានី-ខេត្ត រយៈពេល ៥ ថ្ងៃ

គណៈកម្មាធិការជាតិរៀបចំការបោះឆ្នោត (គ.ជ.ប) នឹងទទួលសម្ភារ និងឯកសារដែលបម្រើឲ្យកិច្ចប្រតិបត្តិការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ដែលនឹងដឹកបញ្ជូនមកពីគណៈកម្មការរាជធានី-ខេត្តរៀបចំការបោះឆ្នោត (គធខប) ទាំង ២៥ រយៈពេល ៥ ថ្ងៃ គឺចន្លោះពីថ្ងៃទី ១០ ដល់ថ្ងៃទី ១៤ ខែមិថុនា ឆ្នាំ ២០២២ ចាប់ពីវេលាម៉ោង៩ និង០០នាទីព្រឹក នៅទីស្តីការ គ.ជ.ប និងនៅឃ្លាំង គ.ជ.ប (បរិវេណក្រុមហ៊ុនគ្រីនឌូដ ផ្លូវជាតិលេខ ៥ សង្កាត់គីឡូម៉ែត្រលេខ ៦ ខណ្ឌឫស្សីកែវ)។

ជាមួយគ្នានេះ គ.ជ.ប ក៏បានជូនដំណឹងដល់គណបក្សនយោបាយ អ្នកសង្កេតការណ៍ និងប្រព័ន្ធផ្សព្វផ្សាយទាំងអស់ ចូលរួមសង្កេតមើលដំណើរការប្រគល់-ទទួល សម្ភារ និងឯកសារបោះឆ្នោតនេះផងដែរ។

សូមបញ្ជាក់ថា ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ បានប្រព្រឹត្តទៅកាលពីថ្ងៃអាទិត្យ ទី ៥ ខែមិថុនា ហើយក្រោយពីបញ្ចប់ការបោះឆ្នោត ការរាប់សន្លឹកឆ្នោត និងការបូកសរុបលទ្ធផលផ្សងៗ សន្លឹក ឆ្នោត ឯកសារ និងសម្ភារសម្រាប់បម្រើឲ្យការបោះឆ្នោតនោះ ត្រូវបានដឹកជញ្ជូនពីគណៈកម្មការឃុំ-សង្កាត់រៀបចំការបោះឆ្នោត មកកាន់គណៈកម្មការរាជធានី-ខេត្តរៀបចំការបោះឆ្នោត កាលពីថ្ងៃទី ៧ ខែមិថុនា ឆ្នាំ ២០២២៕

អត្ថបទ៖ កោះកែវ