លោក ម៉ម ប៊ុនហេង ប្រាប់ឱ្យបង្កើនល្បឿន​ចាក់វ៉ាក់សាំង​ដូសជំរុញដល់ពលរដ្ឋ​ចាប់ពីអាយុ៥ឆ្នាំឡើង

លោកសាស្ត្រាចារ្យ ម៉មប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ បានណែនាំដល់គណៈអភិបាលរាជធានី-ខេត្តទាំង ២៥ បង្កើនល្បឿនការចាក់វ៉ាក់សាំងដូសជំរុញ ទាំងដូសទី៣ ដូសទី៤ និងដួសទី៥ជូនដល់ កុមារ និងប្រជាពលរដ្ឋមានអាយុចាប់ពីអាយុ៥ឆ្នាំឡើង។

ការជំរុញរបស់ក្រសួងសុខាភិបាលនេះបានធ្វើឡើងបន្ទាប់ពីក្រសួងសង្កេតឃើញថា ការចាក់វ៉ាក់សាំងកូវីដ-១៩ ដូសជំរុញ (ទាំងដូសទី៣ ដូសទី៤ និងដូសទី៥) ដល់ក្រុមគោលដៅខាងលើនៅមានចំនួនតិចនៅឡើយ។

នៅក្នុងសេចក្តីណែនាំរបស់ក្រសួងងសុខាភិបាលចុះកាលពីយប់ថ្ងៃទី១០មិថុនា លោករដ្ឋមន្ត្រីបានមានប្រសាសន៍ថា ដើម្បីបង្កើនភាពស៊ាំរបស់បុគ្គល ក៏ដូចជា ភាពស៊ាំក្នុងសហគមន៍ សំដៅបង្កពីការយាយីធ្ងន់ធ្ងរនៃវីរុសកូវីដ-១៩ ជាពិសេសវីរុសបំប្លែងខ្លួនថ្មីៗ គ.វ.ក-១៩កំពុងបន្តផ្តល់ការចាក់វ៉ាក់សាំងដូស ទី៣នៅតាមទីតាំងចាក់វ៉ាក់សាំងកូវីដ-១៩ នៃរដ្ឋបាលរាជធានី-ខេត្តទាំង២៥ដល់ក្រុមអាយុចាប់ពី៥ឆ្នាំ ដល់អាយុក្រោម១២ឆ្នាំ។

ចំណែក ក្រុមអាយុចាប់ពី១២ឆ្នាំឡើង គ.វ.ក-១៩ កំពុងបន្តចាក់វ៉ាក់សាំងដូសទី៣ ដូសទី៤ និងដូសទី៥ នៅ តាមទីតាំងចាក់វ៉ាក់សាំងកូវីដ-១៩ នៃមន្ទីរពេទ្យជាតិ និងរដ្ឋបាលរាជធានី-ខេត្តទាំង២៥។

លោករដ្ឋមន្ត្រី បានបន្តថា ដោយបច្ចុប្បន្ននេះ ក្រសួងសុខាភិបាលសង្កេតឃើញថា ការចាក់វ៉ាក់សាំងកូវីដ-១៩ ដូសជំរុញ (ទាំងដូសទី៣ ដូសទី៤ និងដូសទី៥) ដល់ក្រុមគោលដៅខាងលើនៅមានចំនួនតិចនៅឡើយ ក្រសួងសុខាភិបាល សូមធ្វើការក្រើនរំលឹកដល់ លោក លោកស្រី សូមបន្តធ្វើការអប់រំផ្សព្វផ្សាយពីផលប្រយោជន៍ នៃការចាក់ វ៉ាក់សាំងដូសជំរុញ និងបន្តធ្វើការណែនាំ កៀរគរក្រុមគោលដៅខាងលើ ដែលមានគម្លាតចាប់ពី៣ខែឡើង បន្ទាប់ពីការចាក់វ៉ាក់សាំងកូវីដ-១៩ ដូសទី២ ឬដូសទី៣ ឬដូសទី៤ ឱ្យទៅទទួលយកការចាក់វ៉ាក់សាំងដួសទី៣ ដូសទី៤ ឬដូសទី៥ ឱ្យបានគ្រប់គ្នា។ ទន្ទឹមគ្នានេះដែរ ក្រសួងសុខាភិបាល សូមស្នើឱ្យរដ្ឋបាលរាជធានី-ខេត្ត បន្ត រៀបចំ ក្រុមការងារចាក់វ៉ាក់សាំងកូវីដ-១៩ ឱ្យចុះចាក់តាមរោងចក្រ សហគ្រាស គ្រឹះស្ថានបណ្តុះបណ្តាលនានា ឬចុះចាក់ ដល់ទីសំណាក់របស់ក្រុមគោលដៅខាងលើជាបន្តទៀត៕សំអឿន