អភិបាលខណ្ឌច្បារអំពៅ ដាក់គ្រឿងចក្រកាយប្រឡាយរំដោះទឹក ក្រោយជនលិចដោយជំនន់ទឹកភ្លៀង

ចាប់តាំងពីភ្លៀងធ្លាក់ខ្លាំងមួយមេធំកាលពីថ្ងៃទី១០ ខែមិថុនា មកដល់ថ្ងៃទី១២ ខែមិថុនានេះ បងប្អូនប្រជាពលរដ្ឋរស់នៅក្នុងមូលដ្ឋានខណ្ឌច្បារអំពៅ បានសង្កេតឃើញវត្តមានលោក ចេង មុនីរ៉ា អភិបាលខណ្ឌច្បារអំពៅ បានចុះដឹកនាំកម្លាំងចុះស្តាប្រពន្ធ័លូរហូតជួលអេស្កាវ៉ាទ័រកាយប្រឡាយបង្ហូទឹកចេញទើបអាចរំដោះទឹកចេញបាន។

តាមការអះអាងពីលោក អ៊ុន ណារ៉ាន់ ជាប្រជាពលរដ្ឋរស់នៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ បានឲ្យដឹងថា គាត់សូមកោតសសើដល់លោក ចេង មុនីរ៉ា អភិបាលខណ្ឌច្បារអំពៅ ដឹកនាំកម្លាំងអាជ្ញាធរដោយផ្ទាល់ចុះមកដល់ទីតាំងដែលរងការលិចលង់ ពិសេសតំបន់ផ្សារបឹងព្រលឹត ដើម្បីរំដោះទឹកចេញកុំឲ្យលិចលង់លំនៅដ្ឋានបងប្អូនប្រជាពលរដ្ឋចាប់តំាងពីភ្លៀងធ្លាក់ខ្លាំងនាថ្ងៃទី១០ ខែមិថុនា មកម្ល៉េះ។

លោក អ៊ុន ណារ៉ាន់ បញ្ជាក់ថា សកម្មភាពរបស់លោកអភិបាលខណ្ឌច្បារអំពៅ ចុះជួយប្រជាពលរដ្ឋពេលជួបទុក្ខលំបាកដោយជំនន់ទឹកភ្លៀងបែបនេះ ធ្វើឲ្យប្រជាពលរដ្ឋលោកគាំទ្រនិងមានទំនុកចិត្តជារៀងរហូត។ ទាក់ទិនទៅនឹងសកម្មភាពគ្រឿងចក្រចុះកាយប្រឡាយរំដោះទឹកនេះ លោក គុយ គឹមហ៊ាង ប្រធានការិយាល័យសាធារណការសាលាខណ្ឌច្បារអំពៅ បានឲ្យដឹងនៅព្រឹកថ្ងៃទី១២ ខែមិថុនា នេះ ចាប់តាំងពីថ្ងៃទី១០ រហូតដល់ថ្ងៃទី១២ ខែមិថុនា នេះ លោក ចេង មុនីរ៉ា អភិបាលនៃគណអភិបាលខណ្ឌច្បារអំពៅ បានចុះផ្ទាល់ទាំងថ្ងៃទាំងយប់បន្ទាប់ពីលំនៅដ្ឋានបងប្អូនប្រជាពលរដ្ឋរងការលិចលង់មក។

ចំពោះការដាក់គ្រឿងចក្រអុិចស្ការវ៉ាទឹរ៍ កាយប្រឡាយបង្ហូទឹកចេញពីដីលោកឧកញ៉ា ហេង លី ចុះទៅព្រែក ព្រំប្រទល់សង្កាត់ព្រែកប្រា និងព្រែកថ្មីនេះ គឺធ្វើឲ្យទឹកបានស្រកជាបណ្តើៗជំនួសឲ្យទឹកលូដែលហូយឺតពេលដែលទឹកហូកបុកខ្លាំងពេក។ក្នុងនោះអាជ្ញាធរតាមបណ្តាភូមិសង្កាត់ទាំង៨ក្នុងមូលដ្ឋានខណ្ឌច្បារអំពៅបានចុះទៅដល់ទីតាំងលិចលង់ដោយជំនន់ទឹកភ្លៀងដោយពុំចាំបាច់ឲ្យបងប្អូនប្រជាពលតដ្ឋស្រែករកឲ្យជួយទាន់ឡើយ៕

អត្ថបទ៖ នរា