កសិករ​ដាំម្នាស់​នៅឃុំទន្លេបិទ​ប្ដេជ្ញា​មិនបោះបង់​មុខរបរខ្លួន​ បើទោះបីជា​តម្លៃម្នាស់ធ្លាក់ចុះក្នុងឆ្នាំនេះ​

សិករ​ដាំម្នាស់​ចំនួន ៥ភូមិ​ ក្នុងឃុំទន្លបិទ ​ស្រុកត្បូងឃ្មុំ ​ខេត្តត្បូងឃ្មុំ​ បាន​ប្ដេជ្ញានៅតែបន្ត​អាជីព​មុខរបរ​របស់​ខ្លួន ​បើទោះបីជា​តម្លៃ​ផ្លែម្នាស់​បានធ្លាក់ចុះ​នៅឆ្នាំនេះ។ ការមិនបោះបង់ដោយសារ ដំណាំម្នាស់​ជារុក្ខជាតិ​ធននឹងអកាសធាតុ ឱ្យផលល្អ និងមានទីផ្សារ។

​ម្នាស់ស្ករ ម្នាស់កែវទឹកឃ្មុំ ដាំលើផ្ទៃដីមួយហិចតា ផ្តល់ប្រាក់ចំណូលក្នុងមួយឆ្នាំ​មិនក្រោម​៤០​លានរៀលនោះទេ។ ​ការប្រមូលផលម្នាស់ ឆ្នាំ២០២២នេះ ម្នាស់ឲ្យផលល្អជាងឆ្នាំមុន ខណៈ​តម្លៃថោកជាងឆ្នាំមុន។

​លោក ស្រេង សាវឿន អាយុ ៣៨ឆ្នាំ រស់នៅឃុំទន្លេបិទបានឱ្យដឹងថា ម្នាស់ក្នុងដីមួយហិកតា​ ដាំបានម្នាស់ចំនួន៦ម៉ឺនដើម ហើយនៅខែមិថុនានេះ កសិករចាប់ផ្តើមចុះដាំ ដោយប្រើរយៈ​ពេលមួយឆ្នាំពេញទើបទទួលបានទិន្នផល។

ពេលប្រមូលផល គេលក់គិតជាឡូ មួយឡូមាន១២ផ្លែ ជាប្រភេទលេខ១ តម្លៃ១ម៉ឺន៧ពាន់រៀល ដែលចែកចេញជា១១ប្រភេទ ហើយប្រភេទលេខ១១ ជាប្រភេទម្នាស់គ្រាប់បែក ក្នុង១ថង់​មាន​ចំនួន៤០ផ្លែ តម្លៃ៥ពាន់រៀល។

លោក ប៊ុល លីន អាយុ៣៦ឆ្នាំ កសិករឃុំទន្លេបិទ បានប្រាប់ថា ចំពោះទីផ្សារម្នាស់មិនពិបាកលក់ទេ មានម៉ូយមកទទួលទិញដល់ទីចំការតែម្តង តែតម្លៃថោកជាងឆ្នាំទៅ៥ពាន់រៀល ក្នុង១ឡូ ខណៈឆ្នាំទៅ២ម៉ឺន២ពាន់រៀល។ ហើយគេយកទៅលក់នៅផ្សារខេត្ត កំពង់ចាម ត្បូងឃ្មុំ ព្រៃវែង និងទីក្រុងភ្នំពេញ។

ម្នាស់ស្ករ ម្នាស់កែវទឹកឃ្មុំ ប្រកបដោយរសជាតិផ្អែមឆ្ងុយឆ្ងាញ់ ក្នុងមួយហិចតាវាឲ្យផលបាន ៤០លានរៀលដែរ កសិករផាត់សោហ៊ុយ ពលកម្ម កសិករអាចរកប្រាក់ចំណូលបានមិនក្រោម ៣០លានរៀលដែរក្នុងឆ្នាំ។

មេឃុំទន្លេបិទ លោក ភិន ឈុន បានឲ្យដឹងដែរថា កសិករដាំម្នាស់មានចំនួន ៥ភូមិ រួមមាន ភូមិអំពិលជ្រុំ ភូមិភ្នំ ភូមិតាអ៊ុយ ភូមិជ្រោយស្រឡៅ និងភូមិអន្លង់ពោង ដែលមានផ្ទៃដីដាំម្នាស់ ចំនួន៣៥ហិចតា។

នាពេលកន្លងមកយើងមាន មេភូមិ ក្រុមប្រឹក្សាឃុំ និងមន្ត្រីខាងកសិកម្មខេត្ត បានបើកវគ្គបណ្តុះបណ្តាលបង្រៀនដល់កសិករការដាំដំណាំគ្រប់ប្រភេទ និងផ្តល់បច្ចេកទេស ទាំងការពិនិត្យដី ការប្រើប្រាស់ជីធម្មជាតិ ការប្រើថ្នាំកំចាត់សត្វល្អិត ការជ្រើសរើសពូជដំណាំ ការថែរក្សាពូជ ការប្រមូលផល ការវេចខ្ចប់ជាដើម។

ព្រមទាំងការជ្រើសរើសដំណាំតាមតម្រូវការទីផ្សារ និងដើម្បីផ្គត់ផ្គង់ទីផ្សារផងដែរ។ ទោះបីម្នាស់ចុះ តម្លៃទាបជាងឆ្នាំទៅបន្តិចមែន តែបងប្អូនប្រជាកសិករក៏នៅ​តែទទួលបាននូវជីវភាពធូរធារ​គួរកត់​សំគាល់ផងដែរ៕

អត្ថបទ៖ សាន វិឡែម