មន្ត្រីកសិកម្ម​នឹង​ចុះផ្តល់បច្ចេកទេស​កម្ចាត់​សត្វដង្កូវ​ស៊ីបំផ្លាញ​ដំណាំពោត

មន្ត្រីមន្ទីរកសិកម្មខេត្តស្ទឹងត្រែង​នឹងចុះផ្ដល់បច្ចេកទេសដល់កសិករនៅភូមិខាំផាន់សង្កាត់សាមគ្គី​ ក្រុង ខេត្តស្ទឹងត្រែង ​ដែលប្រកបរបរដាំពោតធ្វើជាភូមិមួយ មានផលិតផលមួយ​ ដោយរង​ផលប៉ះ​ពាល់ពីសត្វដង្កូវស៊ីបំផ្លាញធ្វើឱ្យពួកគាត់ខាតបង់ថវិកា។

​លោក មាស ពិសិដ្ឋអនុប្រធានមន្ទីរកសិកម្មរុក្ខាប្រមាញ់ ​និងនេសាទ​ខេត្តស្ទឹងត្រែង​បានបញ្ជាក់​ថា កន្លងមកមន្ត្រីកសិកម្មបានចុះណែនាំ និងផ្ដល់បច្ចេកទេសដល់ពួកគាត់ជាញឹកញាប់រួចមកហើយដែរ កត្តាដែលរងផលប៉ះពាល់ពីសត្វល្អិត អាចមកពីកត្តាអាកាសធាតុក៏អាចថាបាន ដោយសាររដូវ​ភ្លៀង​ធ្លាក់ កសិករមានការធ្វេសប្រហែស មិនបានអនុវត្តតាមការណែ​នាំរបស់មន្ត្រីកសិកម្មក៏អាច​ថាបាន។

​លោកអនុប្រធានមន្ទីរកសិកម្ម​បានបញ្ជាក់បន្ថែមថា ​មានកត្តាជាច្រើន​ដែលធ្វើឱ្យរងផលប៉ះពាល់​អាចមកពីការប្រែប្រួលអាកាសធាតុកកើតជាសត្វល្អិត ដូចជាការភ្ជួរដីមិនបានហាល ដាំដុះបាន​ផ្លែផ្កាហើយ មិនបានធ្វើស្មៅបង្កឲ្យមានសត្វល្អិត កើតជារោគដង្កូវស៊ីទាំងដើមស៊ីទាំងថ្លែ ភ្លៀងខ្លាំង​មិនមានប្រឡាយបង្ហូរទឹកធ្វើឲ្យរលាំទឹកស្លឹកក្រហមងាប់ដើមក៏មាន។

​លោកថា​នឹងចាត់មន្ត្រីកសិកម្មចុះពិនិត្យជាក់ស្ដែង​ និងធ្វើការណែនាំផ្តល់បច្ចេក​ទេសបន្ថែមដល់​កសិករ ដាំដុះទទួលបានផលល្អនិងវិធីសាស្រ្តដើម្បីកម្ចាត់សត្វល្អិតផងដែរ។   

​លោកតាត យុទ្ធកសិករនៅភូមិខេបានបានទទួលស្គាល់ថារៀងរាល់រដូវវស្សាការដាំដំណាំពោត​ មិនសូវបានទទួលផលល្អទេ ដោយរងប៉ះពាល់ការប្រែប្រួលអាកាសធាតុផងមកពីសត្វល្អិត​ ដូចជាដង្កូវ​ស៊ីដើម ស៊ីផ្លែងាប់ដើមក៏មានដែរ។ លោកថាខុសពីរដូវប្រាំងដាំទទួលបានផលល្អ ពុំមានសត្វល្អិតឬដង្កូវស៊ីនោះទេ។​

​លោកបន្តថា៖កសិករប្រមាណជាង៧០%នៅក្នុងភូមិនេះបានព្យាយាមដាំពោតជាប្រចាំ​ដើម្បី​ផ្គត់ផ្គង់​ទៅកាន់ទីផ្សារប្រយោជន៍រួមគ្នាថែរក្សាឱ្យបានកេរ្ត៍ឈ្មោះភូមិ​មួយមានផលិតផល​មួយគឺពោតភូមិខាំផាន់។

​សូមបញ្ជាក់ថា៖ នៅភូមិខាំផាន់សង្កាត់សាមគ្គីមានប្រជាពលរដ្ឋរស់នៅជាង២០០គ្រួសារ បាន​ប្រកបមុខរបរដាំដំណាំរួមផ្សំ ជាពិសេសដំណាំពោត នៅតាមជួរដងទន្លេមេគង្គលើ ដែល​មាន​ផ្ទៃដីលាតសន្ធឹងជាង៨គីឡូម៉ែត្រចាប់ពីអូរ (ម៉មកើត) ទៅដល់អូរឈើទាល(កោះកី)៕

អត្ថបទ៖ងិនលីម