ព័ត៌មានជាតិ

ប្រធាន FIFA បង្ហាញនូវភាពរីករាយក្នុងដាក់ឱ្យមាន៤៨ក្រុម ប្រកួត FIFA World Cup 2026 ជាលើកដំបូង

បានផុស

៣ years មុន

នៅ

ថ្ងៃសុក្រ ១៧ មិថុនា ២០២២

ដោយ

ប្រធានសហព័ន្ធកីឡាបាល់ទាត់ពិភពលោក (FIFA) លោក Gianni Infantino កំពុងទន្ទឹងរង់ចាំព្រឹត្តិការណ៍បាល់ទាត់ដ៏រំភើបមួយនៅឆ្នាំ២០២៦ ជាមួយនឹងការអបអរសាទរដល់ទីក្រុងដែលបានជ្រើសរើសសម្រាប់ធ្វើម្ចាស់ផ្ទះ World Cup។

ទីក្រុងចំនួន១៦ នៃប្រទេសចំនួន៣ សហរដ្ឋអាម៉េរិក, ម៊ិកស៊ិកកូ និងកាណាដា ដែលត្រូវបានជ្រើសរើសធ្វើជាម្ចាស់ផ្ទះរួម FIFA World Cup ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Infantino បាននិយាយទៅកាន់ប្រព័ន្ធផ្សព្វផ្សាយថា៖ «ខ្ញុំគិតថាផ្នែកនៃពិភពលោកនេះមិនដឹងថានឹងមានអ្វីកើតឡើងនៅទីនេះនៅឆ្នាំ២០២៦។» «ប្រទេសទាំងបីនេះ នឹងប្រែផ្លាស់ ហើយពិភពលោកនឹងក្រឡេកមកមើលប្រទេសកាណាដា ម៉ិកស៊ិក និងសហរដ្ឋអាមេរិក ជាមួយនឹងរលកនៃភាពរីករាយដ៏សម្បើមអស្ចារ្យ ពីព្រោះនោះជាអ្វីដែលបាល់ទាត់។»

FIFA World Cup ឆ្នាំ២០២៦ នឹងបង្កើនចំនួនក្រុមដល់ទៅ ៤៨ក្រុម ដែលនេះគឺជាលើកដំបូងក្នុងប្រវត្តិសាស្ត្របាល់ទាត់ពិភពលោកផងដែរ ដ្បិតវាត្រូវបានអនុវត្ត ៣២ក្រុម តាំងពីឆ្នាំ១៩៩៨មក។

ប្រធាន FIFA ដដែលបាននិយាយថា៖ «ជាមួយនឹង ៤៨ប្រទេសមកលេងនៅ World Cup នេះ វានឹងអស្ចារ្យ ហើយបាល់ទាត់នៅពេលនោះ (នៅអាមេរិកខាងជើងនេះ) នឹងមានកម្រិតខុសគ្នាទាំងស្រុង។»

គួររំលឹកដែរថា នៅថ្ងៃទី១០ ខែមករា ឆ្នាំ២០១៧ ក្រុមប្រឹក្សា FIFA បានជ្រើសរើសជម្រើសទី៤ ហើយបានបោះឆ្នោតជាឯកច្ឆ័ន្ទដើម្បីពង្រីកដល់ការប្រកួតដែលមាន ៤៨ក្រុមចូលរួម។ ការប្រកួតនឹងចាប់ផ្ដើមជាមួយវគ្គចែកពូល ដែលមាន ១៦ពូល និងក្នុង១ពូលមាន ៣ក្រុម។ ហើយក្រុមលេខ១ និងលេខ២ នឹងបន្តទៅការប្រកួតជម្រុះដោយចាប់ផ្តើមពីវគ្គ ៣២ក្រុមចុងក្រោយ។

ចំនួនប្រកួតដែលលេងសរុបនឹងកើនឡើងពី ៦៤ប្រកួត ដល់ ៨០ប្រកួត។ ក្រុមនីមួយៗនឹងប្រកួតក្នុងពូលតិចជាងមុនមួយប្រកួត។ ការប្រកួតក៏នឹងត្រូវប្រើរយៈពេល ៣២ថ្ងៃដូចគ្នាទៅនឹងការប្រកួត ៣២ក្រុមពីមុនផងដែរ៕

អត្ថបទ ៖ មន្នីរ័ត្ន