សម្ដេចតេជោ ហ៊ុន សែន ៖ ខ្ញុំគ្មានសិទ្ធិដើម្បីប្រគល់ដីឲ្យវៀតណាម សូម្បីមួយមីល្លីម៉ែត្រ ហើយខ្ញុំក៏មិនចង់បានដីវៀតណាម សូម្បីមួយមីល្លីម៉ែត្រ

នៅចំពោះមុខនាយករដ្ឋមន្ត្រីវៀតណាម សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសច្បាស់ៗថា «ខ្ញុំគ្មានសិទ្ធិ ដើម្បីប្រគល់ដីឲ្យវៀតណាម សូម្បីមួយមីល្លីម៉ែត្រ ហើយខ្ញុំក៏មិនចង់បានដីវៀតណាម សូម្បីមួយមីល្លីម៉ែត្រ សូមឲ្យតែត្រូវទៅតាមក្បួនខ្នាត ដែលអាណានិគមនិយមបារាំង បានផ្ដល់បន្សល់ទុកទៅបានហើយ»។

ការប្រកាសរបស់សម្ដចតេជោ ហ៊ុន សែន បានធ្វើឡើងក្នុងពេលអញ្ជើញជាអធិបតី ខួបលើកទី ៤៥នៃទិវាការចងចាំដំណើរឆ្ពោះ ទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និងសម្ពោធសមិទ្ធផលនានា នៅតំបន់ប្រវត្តិសាស្ត្រយោធាតេជោកោះថ្ម X16  ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាព្រឹកថ្ងៃទី ២០ ខែមិថុនា ឆ្នាំ ២០២២។

ក្នុងពិធីដដែល សម្ដេចតេជោ ហ៊ុន សែន បានបញ្ជាក់បន្ថែមថា វៀតណាម ក៏មិនត្រូវការយកដីរបស់កម្ពុជា ហើយកម្ពុជា ក៏មិនត្រូវការយកដីរបស់វៀតណាមនោះដែរ ដោយសម្ដេចបញ្ជាក់ទៀតថា «មិនថាតែជាមួយវៀតណាមទេ ជាមួយព្រះរាជាណាចក្រថៃ ជាមួយនឹងឡាវ»៕

អត្ថបទ៖ ឃួន សុភ័ក្រ