អគ្គលេខាធិការ​នៃ​អង្គការ​ពិភព​ឥស្លាម​ថា នៅ​កម្ពុ​ជាមាន​សុខដុម​នីយកម្ម ផ្នែក​ជាតិ សាសន៍ និង​សាសនា

លោក Dr. Mohammad Bin Abdul Karim Alssa អគ្គលេខាធិការ​នៃ​អង្គការ​ពិភព​ឥស្លាម លើកឡើង​បែបនេះ ខណៈ​លោក​ចូលជួប​សម្ដែង​ការគួរសម និង​ពិភាក្សា​ការងារ ជាមួយ​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការ​អន្តរជាតិ​កម្ពុជា នា​រសៀល​ថ្ងៃ​អង្គារ ទី​២១ ខែមិថុនា ឆ្នាំ​២០២២​។

មានប្រសាសន៍​នៅក្នុង​ជំនួប​ពិភាក្សា​នោះ​លោក​ឧបនាយករដ្ឋមន្ត្រី ប្រាក់ សុខុន បានប្រកាស​ស្វាគមន៍​ដំណើរ​ទស្សនកិច្ច​របស់​លោក H.E. Dr. Mohammad Bin Abdul Karim Alssa អគ្គលេខាធិការ​នៃ​អង្គការ​ពិភព​ឥស្លាម មកកាន់​ប្រទេស​កម្ពុជា ។

ចំណែក​លោក Dr. Mohammad Bin Abdul Karim Alssa បាន​ថ្លែងថា លោក​សប្បាយរីករាយ ដែល​ឃើញ​ការរីកចម្រើន​នៅ​ប្រទេស​កម្ពុជា ហើយ​លោក​ក៏បាន​មើលឃើញ​ដែរ​ថា នៅ​កម្ពុ​ជាមាន​សុខដុម​នីយកម្ម ជាតិ សាសន៍ និង​សាសនា ហើយ​ការមើលឃើញ​នេះ គឺ​លោក​បាន​មើលឃើញ​តាំងតែ​ពីមុន​ដំណើរ​ទស្សនកិច្ច​របស់​លោក​មកកាន់​ប្រទេស​កម្ពុជា​ម្ល៉េះ។

ជាក់ស្តែង​នៅក្នុង​ជំនួប​សម្ដែង​ការគួរសម​ជាមួយ​សម្ដេច​តេ​ជោ ហ៊ុន សែន គឺ​សម្ដេច​ពិតជា​បាន​ផ្ដល់នូវ​ឱកាស​ដ៏​ល្អ ដើម្បី​ស្វែងយល់​ពី​សុខដុម​នីយកម្ម ជាតិ សាសន៍ និង​សាសនា នៅ​ប្រទេស​កម្ពុជា ហើយ​សម្តេច​ក៏​បង្ហាញ​នូវ​មិត្តភាព សាមគ្គីភាព និង​កិច្ចសហប្រតិបត្តិការ ក្នុងនាម​ជា​មនុស្ស​សុជាតិ​ដូចគ្នា​ផងដែរ​។

បើតាម​លោក​រដ្ឋលេខាធិការ នៅក្នុង​ដំណើរ​ទស្សនកិច្ច​នៅ​ប្រទេស​ព្រះរាជាណាចក្រ​កម្ពុជា​នេះ លោក​ក៏បាន​ចូល​ថ្វាយបង្គំ​សម្ដេចព្រះសង្ឃរាជ​រាជ​ទាំងពី​គណៈ​ផងដែរ​៕

ដោយ ៖ កោះ​កែវ