ក្រសួងសង្គមកិច្ច ចុះកិច្ចព្រមព្រៀងជាមួយអង្គការចំនួន ៥ លើកម្មវិធីជួយជនងាយរងគ្រោះតាមមូលដ្ឋាន

លោក តូច ចាន់នី អគ្គនាយក នៃអគ្គនាយកដ្ឋានបច្ចេកទេស ក្រសួងស.អ.យ តំណាងដ៏ខ្ពង់ខ្ពស់លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីចុះហត្ថលេខា លើកិច្ចព្រមព្រៀងគម្រោងកម្មវិធីបន្ត រវាងក្រសួងសង្គមកិច្ច អតីតយុទ្ធជន និងយុវនីតិសម្បទា សម្រាប់ឆ្នាំ ២០២២-២០២៥ ជាមួយនឹងអង្គការចំនួន ៥ នៅទីស្តីការក្រសួង កាលពីថ្ងៃទី ២១ ខែមិថុនា ឆ្នាំ ២០២២។

ក្នុងនាមលោករដ្ឋមន្ត្រីក្រសួងសង្គមកិច្ចលោក តូច ចាន់នី បានថ្លែងថា ក្រសួងសង្គមកិច្ច បានសម្រេចចុះកិច្ចព្រមព្រៀងជាមួយអង្គការចំនួន ៥ លើគម្រោងកម្មវិធីបន្ត ផ្នែកមនុស្សធម៌ និងជួយដល់ជនងាយរងគ្រោះ ការពារកុមារ ស្ត្រីមានផ្ទៃពោះ និងជនមានពិការភាពជាដើម ដើម្បីឲ្យពួកគាត់ទទួលបានអត្ថប្រយោជន៍ពិតៗ តាមមូលដ្ឋាន ដែលពួកគាត់រស់នៅតែម្ដង តាមគោលនយោបាយយុទ្ធសាស្ត្ររបស់រាជរដ្ឋាភិបាល។

សូមបញ្ជាក់ថា ការចុះកិច្ចព្រមព្រៀង រវាងក្រសួងសង្គកិច្ចជាមួយអង្គការចំនួន ៥នោះរួមមាន៖ អង្គការ TZU CHI CHARITY FOUNDATION ( មូលនិធិសប្បុរសធម៌ឆឺជី ) អង្គការ The Field Relief Agency អង្គការក្រុម នៃក្តីមេត្តាអន្តរជាតិ ( កម្ពុជា ) អង្គការចិត្តសង្គមអន្តរវប្បធម៌ ( ធីភីអូ ) កម្ពុជា និងអង្គការ CRM/Inner CHANGE៕

អត្ថបទ៖ វិមាន