ព័ត៌មានជាតិ

គម្រោងធំ ៣ ចាយទុនរាប់ពាន់លានដុល្លារ នឹងបង្កើតប្រវត្តិសាស្រ្តថ្មីសម្រាប់កម្ពុជា

បានផុស

៣ years មុន

នៅ

ថ្ងៃព្រហស្បតិ៍ ២៣ មិថុនា ២០២២

ដោយ

គម្រោងហេដ្ឋារចនាសម្ពន្ធធំៗចំនួន ៣ នឹងផ្លាស់ប្ដូរមុខមាត់ប្រទេសកម្ពុជា ខណៈដែលរដ្ឋាភិបាលជំរុញកំណើនសេដ្ឋកិច្ចដើម្បីប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។

គម្រោងហេដ្ឋារចនាសម្ពន្ធចំនួន ៣ ត្រូវមើលឃើញថានឹងជំរុញកំណើនសេដ្ឋកិច្ច បង្កើនការទាក់ទាញវិនិយោគបន្ថែមទៀត។

ផ្លូវល្បឿនលឿន

តាមផែនការផ្លូវល្បឿនលឿនពីភ្នំពេញទៅក្រុងព្រះសីហនុ នឹងចប់រួចរាល់ដាក់ឲ្យប្រើប្រាស់នៅអំឡុងខែកញ្ញា ឆ្នាំ២០២២ បន្ទាប់ពីបើកការដ្ឋានសាងសង់នៅថ្ងៃទី២២ ខែមីនា ឆ្នាំ២០១៩ ក្រោមការវិនិយោគដោយក្រុមហ៊ុនចិនប្រមាណ ២.០០០លានដុល្លារអាមេរិក។

ផ្លូវល្បឿនលឿននេះ មានប្រវែងសរុបជាង ១៩០ គីឡូម៉ែត្រ ដោយមានទទឹងតួផ្លូវ ២៤,៥ម៉ែត្រ អនុញ្ញាតឱ្យយានយន្តគ្រប់ប្រភេទបើកបរក្នុងល្បឿនរហូតដល់ ១០០ គីឡូម៉ែត្រ ក្នុងមួយម៉ោង និងកន្លែងខ្លះអាចបើកបរក្នុងល្បឿនដល់ ១២០គីឡូម៉ែត្រក្នុងមួយម៉ោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវល្បឿនលឿនភ្នំពេញ-ព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ។

ផ្លូវល្បឿនលឿននេះ នឹងចូលរួមចំណែកក្នុងការជំរុញឱ្យប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុ ឱ្យមានការរីកចម្រើនលឿនជាងធម្មតា ខណៈដែលរាជរដ្ឋាភិបាលដាក់ផែនការមេ ប្រែក្លាយខេត្តព្រះសីហនុក្លាយទៅជាតំបន់សេដ្ឋកិច្ចពិសេសពហុបំណង ហើយផ្លូវល្បឿនលឿននេះនឹងចូលរួមបម្រើផែនការមេនេះក្នុងការទាក់ទាញវិនិយោគិនជាតិ និងអន្តរជាតិបន្ថែមទៀតផងដែរ។

ព្រលានយន្តហោះកម្រិត 4F

ព្រលានយន្តហោះភ្នំពេញថ្មីនៅខេត្តកណ្តាលគឺជាព្រលានយន្តហោះធំកម្រិត 4F ដែលអាចនឹងស្រូបយកនិងទទួលបានការហោះហើរពីឆ្ងាយឆ្លងទ្វីបប្រភេទយន្តហោះធុនយក្សរហូតដល់ Airbus A380-800 និង យន្តហោះ Boeing 747-800 ចុះចតបាន។

អ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC ដែលទទួលបានសិទ្ធិវិនិយោគអាកាសយានដ្ឋានអន្តរជាតិថ្មីនេះ បានបង្ហាញមហិច្ឆតាអភិវឌ្ឍន៍ព្រលានយន្តហោះថ្មីនេះឲ្យធំនិងទំនើបជាងគេនៅតំបន់អាស៊ី។

ព្រលានយន្តហោះអន្តរជាតិភ្នំពេញថ្មីនេះ សាងសង់ឡើងនៅលើផ្ទៃដី ២.៦០០ហិកតា ដែលគ្រោងចំណាយថវិកាប្រមាណ ១.៥០០លានដុល្លារ។

ប្រភពពីក្រុមហ៊ុនបានអះអាងថា ក្រុមហ៊ុនបានចំណាយថវិកាប្រមាណ ៣៧៥ លានដុល្លារ ហើយឆ្នាំ២០២២ ខាងមុខ គ្រោងចំណាយថវិកាបន្ថែមប្រមាណ ៤៧៦លានដុល្លារអាមេរិកទៀត ដែលគិតជាមធ្យមចំណាយប្រមាណ ១.២៨លានដុល្លារអាមេរិកក្នុងមួយថ្ងៃ។

កំពង់ផែទឹកជ្រៅខេត្តព្រះសីហនុ

កាលវិភាគសាងសង់កំពង់ផែទឹកជ្រៅខេត្តព្រះសីហនុ គ្រោងចាប់ផ្តើមនៅពាក់កណ្តាលឆ្នាំ ២០២២ ដោយត្រូវចំណាយពេល ៣ ឆ្នាំ។

ចំណតផែទឹកជ្រៅនឹងមានប្រវែង ៣៥០ ម៉ែត្រ និងជម្រៅទឹក ១៤.៥០ ម៉ែត្រ។ ការស្ថាបនាកំពង់ផែនេះត្រូវបានគេប៉ាន់ស្មានថាមានតម្លៃ ២១៨ លានដុល្លារដែលទុនបានមកពីជំនួយអភិវឌ្ឍផ្លូវការ (ODA) ពីប្រទេសជប៉ុន។

លោក ស៊ុន ចាន់ថុល រដ្ឋមន្ត្រីក្រសួងសាធារណការបានបញ្ជាក់ថា កំពង់ផែទឹកជ្រៅនេះនឹងបម្រើសេវាដឹកជញ្ជូនប្រមាណ ៩៣% នៃនាវាធំៗទាំងអស់ដែលធ្វើដំណើរក្នុងតំបន់អាស៊ីប៉ាស៊ីហ្វិក។

តាមរយៈកំពង់ផែនេះ កម្ពុជានឹងអាចដឹកជញ្ជូនទំនិញដោយផ្ទាល់ទៅកាន់សហភាពអឺរ៉ុប និងសហរដ្ឋអាមេរិក ដោយមិនចាំបាច់ឈប់នៅសិង្ហបុរី ឬហុងកុងទៀតឡើយ៕

អត្ថបទ៖ ប៊ុណ្ណារ៉ា

Related Topics:ហេដ្ឋារចនាសម្ព័ន្ធ