រូបសំណាកព្រះស្កន្ទគង់លើក្ងោករំពឹងស្រូបទាញទេសចរបន្ថែមទៀត ក្រោយដំឡើងរួច

លោក ឃាង ភារម្យ អ្នកនាំពាក្យសាលាខេត្តព្រះសីហនុ បានមានប្រសាសន៍នៅព្រឹកថ្ងៃទី២៦មិថុនានេះថា រូបសំណាក ព្រះស្កន្ទគង់លើក្ងោក ស្ថិតនៅចំណុចប្រសព្វវិថី២ធ្នូ និងវិថីសម្តេចតេជោ នៅសង្កាត់លេខ៤ ក្រុងព្រះសីហនុ នឹងសាង សង់រួចរាល់ក្នុងពេលឆាប់ៗខាងមុខនេះ។

លោកបានបន្តថា រូបសំណាកព្រះស្កន្ទគង់លើក្ងោកនេះ គឺជារូបសំណាកទី៤ បន្ទាប់ពីរូបសំណាកធំៗចំនួន៣ផ្សេងទៀត ដែលត្រូវបានកសាងលើទឹកដី នៃខេត្តព្រះសីហនុ។

លោក ឃាង ភារម្យ បានបន្តទៀតថា រូបសំណាក៣ផ្សេង ទៀតនោះរួមមានរូបបដិមា«ព្រះថោងនាងនាគ» រូបបដិមាព្រះឧមា-មហេសូរ និងរូបបដិមាសីហរាជមុខបី ។

បើតាមអ្នកនាំពាក្យខេត្តព្រះសីហនុ ការសាងសង់រូបសំណាកទាំងនេះ គឺជាផ្នែកមួយទាក់ទាញភ្ញៀវទេសចរជាតិ និងអន្តរជាតិឱ្យមកទស្សនា ខេត្តជាប់សមុទ្រនេះផងដែរ។

គួរបញ្ជាក់ថា រូបបដិមាព្រះឧមា-មហេសូរមាន កម្ពស់៩ ម៉ែត្រ ដំឡើងនៅលើរង្វង់មូលមហាវិថីឆ្នេររាម ស្ថិតនៅទីប្រសព្វគ្នារវាងមហាវិថីឆ្នេររាម និងមហាវិថីរាម  ហើយនៅពេលដាក់លើបល្ល័ង្គកម្ពស់៨,៥ម៉ែត្រ សរុបកម្ពស់១៧,៥ម៉ែត្រ។

រូបបដិមាសីហរាជមុខបី កម្ពស់៩ម៉ែត្រ ដំឡើង​នៅ​រង្វង់​មូលសីហរាជមុខបី ស្ថិតនៅទីប្រសព្វគ្នារវាងវិថីជោត្តញ្ញាណ លេខ៧០១ នឹងផ្លូវជាតិលេខ៤  ហើយនៅពេលដាក់លើបល្ល័ង្គកម្ពស់៦,៤៣ម៉ែត្រ សរុបកម្ពស់១៥,៤៣ម៉ែត្រ។

ចំណែករូបបដិមាព្រះស្កន្ទ កម្ពស់ ៦,១៨ ម៉ែត្រដំឡើងនៅត្រីកោណប្រសព្វព្រះស្កន្ទ ស្ថិតនៅទីប្រសព្វគ្នារវាង វិថីតេជោនឹងវិថី២ធ្នូហើយនៅពេលដាក់លើបល្ល័ង្គ កម្ពស់៦,១៨ម៉ែត្រ សរុបកម្ពស់១២,៣៦ ម៉ែត្រ។

 រូបបដិមាព្រះថោងនាងនាគ កម្ពស់២១ម៉ែត្រ​ដំឡើង​នៅ​រង្វង់​មូលមហាវិថីជំទាវម៉ៅ​ ស្ថិតនៅទីប្រសព្វគ្នារវាង មហាវិថីជំទាវម៉ៅ និងមហាវិថីឆ្នេររាម ហើយនៅពេលដាក់លើបល្ល័ង្គកម្ពស់៦,៤៣ម៉ែត្រ សរុបកម្ពស់ ២៧,៤៣ ម៉ែត្រ ហើយ​រូបបដិមានេះ​មាន​តម្លៃ​ជាង ១ លាន​ដុល្លារ​​។

បើតាមលោក លី រស្មី អនុរដ្ឋលេខាធិការ​ក្រសួងដែនដី​ នគរូបនីយកម្ម និងសំណង់ធ្លាប់បានមានប្រសាសន៍​ថា រូបសំណាក ទាំង៤នេះ ត្រូវបានចំណាយថវិកាសម្រាប់ធ្វើ អស់ជាង ២លានដុល្លារអាមេរិក ។ រូបសំណាកព្រះសីហរាជមុខ៣ ព្រះឧមា-មហេសូរ និង រូបសំណាកព្រះថោង នាងនាគ ត្រូវបានធ្វើពុម្ព នៅស្រុកខ្មែរហើយ ចាក់ស្ពាន់នៅប្រទេសចិន។ ចំណែករូបព្រះស្កន្ទ ត្រូវបានធ្វើទាំងស្រុងក្នុងប្រទេសកម្ពុជា៕ សំអឿន