អាជ្ញាធរខេត្ត​អំពាវនាវ​ដល់បងប្អូន​ប្រជាពលរដ្ឋ​កុំចោលសំរាមតាមផ្លូវ​ចៀសវាងស្ទះលូ​នារដូវភ្លៀង

ប៉ុន្មានថ្ងៃមុននេះមានភ្លៀង​ធំមួយមេនៅពេលល្ងាចបណ្ដាលឱ្យ​នៅក្នុងទីក្រុងកំពង់ឆ្នាំងទឹកភ្លៀង​តាម​ផ្លូវមួយចំនួនលិចទឹកបង្កឲ្យជួបការលំបាកក្នុងការបើកបររថយន្តគ្រប់ប្រភេទ។

ករណីនេះគេពិនិត្យឃើញថា បណ្ដាលមកពីការកកស្ទះសំរាមតាមមាត់លូបង្ហូរទឹកនៅតាមផ្លូវកៅ​ស៊ូក្នុង​ក្រុង រឿងខាងលើនេះគឺជារឿងរបស់អាជ្ញាធរយើងនិងប្រ ជាពលរដ្ឋយើងទាំងអស់គ្នាត្រូវចូលរួមធ្វើ ចូលរួមគិត និងចូលរួមទទួលខុសត្រូវ ទើបទីក្រុងមាន​បរិស្ថានល្អមាន​សោភ័ណ​ភាពល្អ។

​ទាក់ទងនឹងករណីខាងលើនេះលោក ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង​បានឱ្យដឹងថា អាជ្ញាធរ​មូលដ្ឋាន ប្រជាពលរដ្ឋយើងត្រូវតែចូលរួមទាំងអស់គ្នា​ទើបដោះស្រាយបញ្ហា​ខាងលើនេះបាន។

កន្លងមកលោកធ្លាប់បានណែនាំដល់អាជ្ញាធរភូមិ សង្កាត់ក្រុង​ឲ្យ​ជួយ​ចុះពិនិត្យ​មើលនៅតាមដងផ្លូវ នៅក្នុងមូលដ្ឋានឱ្យធ្វើការ​ណែ​នាំអប់រំប្រជាពលរដ្ឋនៅតាមផ្ទះ ឱ្យចេះធ្វើ​អនាម័យ ចេះមើលមាត់លូបង្ហូរទឹកតាមមុខផ្ទះ ដើម្បីបញ្ចៀសការកកស្ទះសំរាមនារដូវធ្លាក់ភ្លៀង៕

អត្ថបទ៖ ឈៀងថារិទ្ធ