មកដឹងលម្អិត ពីករណីរកឃើញថ្មី អ្នកជំងឺកូវីដ-១៩ បន្ទាប់ពីកម្ពុជាស្ងប់ស្ងាត់ជិត ២ ខែ

នៅថ្ងៃទី២៩ ខែមិថុនា ឆ្នាំ២០២២នេះ ក្រសួងសុខាភិបាល បានចេញសេចក្តីប្រកាសព័ត៌មានបញ្ជាក់ពី ការរកឃើញអ្នកឆ្លងកូវីដ-១៩ ចំនួន១០នាក់ បន្ទាប់ពីមិនមានរកឃើញអ្នកឆ្លងចំនួន ៥២ ថ្ងៃជាប់គ្នារួចមក។

អ្នកជំងឺថ្មី ឆ្លងជំងឺ កូវីដ-១៩ ទាំង ១០ ករណីនោះ ត្រូវបានរកឃើញ ដោយ PCR និងជាប្រភេទអូមីក្រុង ទាំងអស់។ ២ នាក់ ជាករណីនាំចូល ឯ ៨ នាក់ ជាករណីរកឃើញក្នុងសហគមន៍ ដោយក្នុងនោះ ៥ នាក់ ជាករណីសុំវិញ្ញាបនបត្រចេញទៅក្រៅប្រទេស។

គិតត្រឹមការប្រកាសរបស់ក្រសួងសុខាភិបាលនៅថ្ងៃនេះ កម្ពុជារកឃើញអ្នកឆ្លងជំងឺកូវីដ១៩៖ សរុបចំនួន ១៣៦ ២៧២ នាក់, អ្នកជាសះស្បើយសរុបចំនួន ១៣៣ ២០៦ នាក់, ស្លាប់សរុបចំនួន ៣ ០៥៦ នាក់។

គួរបញ្ជាក់ថា នា​យប់មិញ ​ថ្ងៃទី​២៨ ខែមិថុនា ឆ្នាំ​២០២២ នេះ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ចេញសារជាសំឡេង​បាន​បញ្ជាក់ថា ​កម្ពុជា​បាន​ពិនិត្យឃើញ​អំពី​ការឆ្លង ជំងឺ​កូ​វីដ​-១៩ នៅក្នុង​សហគម​ន៍​ឡើងវិញ​។

បើ​តាម​សម្ដេច​តេ​ជោ ហ៊ុន សែន ការរកឃើញ​ករណី​ឆ្លង​នៅក្នុង​សហគមន៍​ឡើងវិញ​នេះ​តាមរយៈ​ការធ្វើ​តេស្ត PCR មួយចំនួន និង​អ្នក​ធ្វើតេស្ត​ដើម្បី​បំពេញ​ទម្រង់​បែបបទ​ចេញទៅ​ក្រៅប្រទេស​ជាដើម ហើយ​មួយចំនួនទៀត​តាមរយៈ​អ្នក​ត្រឡប់​មកពី​ក្រៅប្រទេស​។ ទន្ទឹមនឹងនោះ សម្ដេច​ទទួលបាន​ព័ត៌មាន​ដែរ​ថា នៅតាម​ទីកន្លែង​មួយចំនួន ក៏បាន​រកឃើញ​វិជ្ជមាន នៃ​ជំងឺ​កូ​វីដ​-១៩ ផងដែរ ដូច្នេះ​អាច​សន្មត់​ថា ជំងឺ​កូ​វីដ​-១៩ ​បានចាប់ផ្ដើម​ឡើងវិញ ទោះបី​ជាមាន​ចំនួន​តិច​ហើយ​មិន​ធ្ងន់ធ្ងរ​ក៏ដោយ​។

ជាមួយគ្នា​នោះ​សម្ដេច​បាន​អំពាវនាវ​ដល់​ប្រជាពលរដ្ឋ ឱ្យ​មានការ​ប្រុងប្រយ័ត្ន ក្នុងការ​ការពារ​សុខ​ភាព​ផ្ទាល់ខ្លួន នៅ​គ្រប់​ទីកន្លែង​ទាំងអស់ ហើយ​ត្រូវមាន​វិធានការ​ហ្មត់ចត់ ដើម្បី​បញ្ចៀស​នូវ​ការរីក​រាលដាល ចូលទៅក្នុង​សហគមន៍ និង​ចូលទៅក្នុង​គ្រួសារ៕

អត្ថបទ៖ ច័ន្ទ វីរៈ