សម្តេច ហ៊ុន សែន បញ្ជាក់ថា អាជ្ញាធរបានចាប់ខ្លួនបុគ្គលម្នាក់ដែលបង្ហោះព័ត៌មានក្លែងក្លាយថាមានមនុស្សស្លាប់ដោយសារកូវីដ១៩

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជានៅព្រឹកនេះ បានបញ្ជាក់ឲ្យដឹងថា អាជ្ញាធរកម្ពុជាបានចាប់ខ្លួនបុគ្គលម្នាក់នៅខេត្តត្បូងឃុំ ដែលបានបង្ហោះព័ត៌មានក្លែងក្លាយដោយថា មានអ្នកស្លាប់ដោយសារតែជំងឺកូវីដ១៩។ សម្តេចនាយករដ្ឋមន្រ្តីបានអះអាងថា ការប្រឌិតព័ត៌មានក្លែងក្លាយបែបនេះ គឺមិនអាចលើកលែងបាននោះទេ ពោល គឺត្រូវអនុវត្តច្បាប់។

ពីវេទិកាអបអរសាទរទិវាមច្ឆជាតិ ០១ កក្កដា ឆ្នាំ២០២២ ដែលប្រារព្ធឡើងនៅទីតាំងអាងទឹកត្រពាំងថ្ម ភូមិ​ត្រពាំងថ្ម ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ នៅព្រឹកថ្ងៃសុក្រនេះ សម្តេចតេជោ ហ៊ុន សែន បានគូសបញ្ជាក់ថា ការចាប់ខ្លួននេះ មិនមែនជាការរំលោភសិទ្ធិ សេរីភាពបញ្ចេញមតិទេ។ សម្តេចថា បុគ្គលរូបនោះ បានប្រឌិតព័ត៌មានក្លែងក្លាយនេះ ធ្វើឲ្យបំពុលសង្គម ធ្វើឲ្យប្រជាពលរដ្ឋមានការភ័យខ្លាច ដែលមិនអាចអត់អោនឲ្យបាន។

បើតាមសម្តេចតេជោ នៅពេលនេះ កម្ពុជាគ្មានឡើយអ្នកជំងឺកូវីដ១៩នៅក្នុងមន្ទីរពេទ្យ គឺពួកគេបានព្យាបាលនៅផ្ទះ ដោយអ្នកជំងឺកូវីដ១៩ទាំងនោះ ជាប្រភេទអូមីក្រុង។

ដោយ៖ វណ្ណ សុគន្ធា