បាត់ដំបងសម្បូរសម្បត្តិធម្មជាតិ និងសំណល់​វប្បធម៌បុរាណទាក់ទាញទេសចរ​ជំរុញកំណើនសេដ្ឋកិច្ច

ខេត្តបាត់ដំបង គឺជាខេត្តមួយនៅភាគពាយ័ព្យនៃព្រះរាជាណាចក្រកម្ពុជា។ ខេត្តបាត់ដំបង មានទីប្រជុំជនធំនៅក្នុងក្រុង។ បាត់ដំបងមានព្រំប្រទល់ ខាងជើងជាប់ខេត្តបន្ទាយមានជ័យ ខាងកើតជាប់ខេត្តសៀមរាបនិងបឹងទន្លេសាប ខាងត្បូងជាប់ខេត្តពោធិ៍សាត់ ខាងលិចជាប់ខេត្តប៉ៃលិន។

ក្រសួងទេសចរណ៍ បានឱ្យដឹងថា ខេត្ត​បាត់ដំបង ជា​​ខេត្ត​មួយ​ក្នុងចំណោម​ខេត្តទាំង​អស់​នៃព្រះរាជាណាចក្រ​កម្ពុជាដែលមាន​វិសាលភាព​ផ្ទៃដីធំ មាន​ភោគសម្បត្តិ​ធម្មជាតិ​ និង​សំណល់​វប្បធម៌​បុរាណ​ជា​ច្រើន។ ប្រាសាទ​បុរាណ​ជាច្រើន​ស្ថាបនា​រាយ​ប៉ាយ​លើភ្នំ លើទួល និង​តំបន់​លិចទឹក។​ ទាំងអស់នេះហើយ​គឺ​ជា​សក្តានុពលទាក់ទាញភ្ញៀវទេសចរណ៍ចង់មកទស្សនា។

បើតាមក្រសួងទេសចរណ៍ ខេត្តបាត់ដំបងមានអំណោយផលច្រើន ទាំងតំបន់ទេសចរណ៍ ការរស់នៅរបស់ប្រជាជន សិល្បៈ វប្បធម៌ ប្រពៃណី និងម្ហូបអាហារ ជាដើម។

ដោយឡែកតំបន់ទេសចរណ៍ ដែលកំពុងទាក់ទាញចំណាប់អារម្មណ៍ភ្ញៀវទេសចរ នាពេលបច្ចុប្បន្ន មានដូចជា ភ្នំទាក់ទ្រាំង ដែលត្រូវបានរាជរដ្ឋាភិបាល សម្រេចបង្កើតជាតំបន់បេតិកភណ្ឌធម្មជាតិ ក្នុងឃុំត្រែង ស្រុករតនមណ្ឌល, រមណីយដ្ឋានស្ទឹងក្រញូង, រមណីយដ្ឋានធម្មជាតិថ្វាកស្រុករតនមណ្ឌល, រមណីយដ្ឋានភ្នំព្រះ, រមណីយដ្ឋានធម្មជាតិ​ភ្នំកាច់ផ្កា, វត្តឈើខ្មៅ, រមណីយដ្ឋានទេសចរណ៍អាងកំពីងពួយ, រមណីយដ្ឋានទេសចរណ៍វប្បធម៌​ធម្មជាតិប្រសាទ​បាណន់, រមណីដ្ឋានធម្មជាតិភ្នំសំពៅ, រមណីយដ្ឋានធម្មជាតិល្អាងភ្នំរំសាយសក់ និងរមណីយដ្ឋានទេសចរណ៍​ល្អាងភ្នំក្រពើ។

លើសពីនេះទៀត អគារ សំណង់បុរាណ គឺជាផ្នែកមួយជួយស្រូបទាញចំណូលតាមរយៈវិស័យទេសចរណ៍ នៅក្នុងខេត្តបាត់ដំបង។

លោក សុខ លូ អភិបាលខេត្តបាត់ដំបង បានឱ្យដឹងកាលពីពេលថ្មីៗនេះថា កន្លងមករដ្ឋបាលខេត្តបានហាមឃាត់ប្រជាពលរដ្ឋជួសជុលផ្ទះ ដែលជាសំណង់បុរាណខុសពីទម្រង់ដើមនៃអគារ និងបានពិនិត្យចំពោះផ្ទះដែលបានកែប្រែខុសពីទម្រង់ដើម។ លោកបន្តថា រដ្ឋបាលខេត្ត បានខិតខំក្នុងការថែរក្សាសំណង់អគារបុរាណមួយនេះ ដែលមានបញ្ហាមួយចំនួនពាក់ព័ន្ធទៅនឹងបច្ចេកទេស និងថវិកា ដើម្បីអភិវឌ្ឍន៍តំបន់អភិរក្ស។

សូមបញ្ជាក់ថា ខេត្តបាត់ដំបង មានស្ថានីយបុរាណចំនួន២១ ប្រាសាទដែលនៅមានរូបរាងចំនួន៥ ប្រាសាទបាក់បែកសល់គ្រឹះចំនួន១៦ ទួលបុរាណចំនួន៤១៥ និងវត្តបុរាណចំនួន៣២៦។ សំណង់បុរាណទាំងនេះ បានទាក់ទាញភ្ញៀវទេសចរជាតិ និងអន្តរជាតិជាច្រើនឱ្យកម្សាន្តនៅខេត្តបាត់ដំបង។ ជាក់ស្តែង កាលពីពិធីបុណ្យចូលឆ្នាំប្រពៃណីជាតិខ្មែរកន្លងទៅ ខេត្តបាត់ដំបងទទួលបានភ្ញៀវទេសចរ ទៅកម្សាន្តច្រើនជាងគេ គឺមានចំនួន ៥៦៥ ៦១៨នាក់ ក្នុងនោះភ្ញៀវទេសចរបរទេស ១ ១១១នាក់៕