គម្រោងកែលម្អ​គ្រប់គ្រង​បរិស្ថាន​ក្រុងជុំវិញ​បឹងទន្លេសាប​នៅកំពង់ឆ្នាំងសាងសង់ឡើង​ក្រោមកម្ចី​ឥណទាន​សម្បទាន​របស់​ ADB

សាលាខេត្តកំពង់ឆ្នាំងនៅព្រឹកថ្ងៃទី០៤ ខែកក្កដា ឆ្នាំ២០២២ បានបើកកិច្ចប្រជុំស្ដីពីវឌ្ឍនភាពនៃការកសាង និងគ្រប់គ្រងទីលានទុកដាក់សំរាមក្រុងកំពង់ឆ្នាំងនៃគម្រោង កែលម្អគ្រប់គ្រងបរិស្ថានក្រុងជុំវិញបឹងទន្លេសាបក្រោមវត្តមានលោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង និងលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង។

កិច្ចប្រជុំក៏មានការអញ្ជើញចូលរួមពីតំណាងក្រសួងមហាផ្ទៃ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងបរិស្ថាន អភិបាលរងខេត្ត នាយក នាយករងរដ្ឋបាលសាលាខេត្ត ទីប្រឹក្សាបច្ចេកទេសគម្រោងប្រធានមន្ទីរអាជ្ញាធរពាក់ព័ន្ធ និងក្រុមការងារបច្ចេកទេសគម្រោងផងដែរ។

កិច្ចប្រជុំនេះបានឱ្យដឹងថា គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ី អនុវត្តនៅក្រុងកំពង់ឆ្នាំង ផ្ដោតលើអនុគម្រោងចំនួន ២ គឺគម្រោងសាងសង់ទីលានទុកដាក់សំរាម ដែលបានបញ្ចប់ការសាងសង់ និងគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ ដែលនឹងចាប់ផ្ដើមអនុវត្តការសាងសង់នាពេលខាងមុខនេះ។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងសូមអំពាវនាវដល់ប្រជាពលរដ្ឋទូទាំងខេត្តកំពង់ឆ្នាំង ឱ្យចូលរួមថែរក្សាអនាម័យ បរិស្ថាន និងទុកដាក់សំរាមឲ្យបានត្រឹមត្រូវ ដើម្បីលើកកម្ពស់សណ្ដាប់ធ្នាប់ សោភ័ណភាព អនាម័យ បរិស្ថានទីក្រុងទីប្រជុំជន និងសហគមន៍ព្រមទាំងសុខុមាលភាពក្រុមគ្រួសាររបស់យើងទាំងអស់គ្នា។

សូមបងប្អូនប្រជាពល រដ្ឋកុំចោលសំរាមពាសវាលពាសកាល នៅតាមទីសាធារណៈ តាមដងផ្លូវ និងសូមភ្ជាប់សេវាដឹកជញ្ជូនសំរាមឲ្យបានគ្រប់គេហដ្ឋាន ដើម្បីមូលដ្ឋានយើងទីក្រុងយើងមានសោភ័ណភាព និងបរិស្ថានល្អ៕

អត្ថបទ៖ ឈៀងថារិទ្ធ