សម្ដេចតេជោ ហ៊ុន សែន យល់ស្របឲ្យម្ចាស់រថយន្តចង្កូតស្ដាំចូលមកបង់ពន្ធ តែមិនចាំបាច់ដូរចង្កូតទេ

ស​ម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចតាមការស្នើសុំរបស់ម្ចាស់រថយន្ដចង្កូតស្ដាំ ដោយមិនចាំបាច់កែចង្កូតនោះទេ ដោយគ្រាន់តែចូលមកបង់ពន្ធជូនរដ្ឋទៅបានហើយ។

សម្ដេចតេជោ ហ៊ុន សែន បានថ្លែងនៅក្នុងពិធីសំណេះសំណាល និងផ្តល់នូវដំបូន្មានមួយចំនួនជូនដល់គណៈប្រតិភូកីឡាអាស៊ានប៉ារ៉ាហ្គេម (ASEAN Para Games) នាព្រឹកថ្ងៃទី ៦ ខែកក្កដានេះថា សម្ដេចបានតាមដានយ៉ាងយកចិត្តទុកដាក់ ទៅលើការតវ៉ារបស់ម្ចាស់រថយន្ដចង្កូតស្ដាំ កាលពីថ្ងៃម្សិលមិញ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ឥឡូវខ្ញុំយល់ស្របជាមួយនឹងសំណូមពររបស់បងប្អូន បងប្អូនត្រូវចូលមកបង់ពន្ធ បងប្អូនមិនចាំបាច់ដូរចង្កូតទេ សម្រាប់អ្នកដែលមិនទាន់បានដូរ អ្នកដែលបានដូរហើយ គួរឲ្យវាចប់ទៅ ដើម្បីយើងមានឡានចង្កូតឆ្វេងប្រើនឹងគេ»៕

អត្ថបទ៖​ ឃួន សុភ័ក្រ