នាយករដ្ឋមន្ត្រី សំណូមពរអ្នកប្រើ Tik Tok រក្សាប្រពៃណីខ្មែរ ដោយមិនត្រូវនិយាយពាក្យអាសអាភាសនោះឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសំណូមពរអ្នកប្រើប្រាស់បណ្ដាញសង្គម Tik Tok មិនត្រូវយកបណ្ដាញសង្គមនេះធ្វើជាមធ្យោបាយ ដើម្បីនិយាយពាក្យ​ចំអេះចំអាសឲ្យសោះ ដោយត្រូវរក្សាគោរពប្រពៃណីខ្មែរ។

សម្ដេចតេជោនាយករដ្ឋមន្ត្រី បានថ្លែងនៅក្នុងពិធីសំណេះសំណាល និងផ្តល់នូវដំបូន្មានមួយចំនួនជូនដល់គណៈប្រតិភូកីឡា អាស៊ានប៉ារ៉ាហ្គេម (ASEAN Para Games) នាព្រឹកថ្ងៃទី ៦ ខែកក្កដានេះថា សម្ដេចសូមផ្ដាំផ្ញើអ្នកប្រើប្រាស់បណ្ដាញសង្គម Tik Tok ជាពិសេសនារីៗ ឲ្យរក្សាគោរពវប្បធម៌ប្រពៃ​ណីរបស់ខ្មែរ ដោយមិនត្រូវនិយាយពាក្យអាសអាភាសនោះឡើយ។

សម្ដេចតេជោ ហ៊ុន សែន បានថ្លែងថា​ «ខ្លះចេញមកគឺថា អារឿង​ចំអេះចំអាសហ្នឹងតែម្ដង ចឹងខ្ញុំសុំអង្វរករឲ្យរក្សាគោរពប្រពៃណីរបស់ខ្លួន»។ ជាមួយគ្នានេះ សម្ដេចតេជោនាយករដ្ឋមន្ត្រី បានបញ្ជាក់ថា រាជរដ្ឋាភិបាលកម្ពុជា មិនមានផែន ការបិទបណ្ដាញសង្គម Tik Tok នោះទេ ក៏ប៉ុន្តែមិនត្រូវយកធ្វើជាមធ្យោបាយ ដើម្បីនិយាយពាក្យ​ចំអេះចំអាសឲ្យសោះ៕

អត្ថបទ៖ ឃួន សុភ័ក្រ