សម្តេចតេជោ ហ៊ុន សែន ៖ មាន​មនុស្សខ្លះ​ចង់បង្អាប់ ចង់រិះគន់សម្តេច តែបែរជាផ្តល់ពិន្ទុឲ្យ​សម្តេច​ទៅវិញ

មានប្រសាសន៍នៅក្នុង​ពិធីសំណេះសំណាល និងផ្តល់នូវដំបូន្មាន​ដល់ប្រតិភូកីឡាអាស៊ានប៉ារ៉ាហ្គេម មុន​ចេញទៅប្រកួតកីឡាពិការអាស៊ាន ឬអាស៊ានប៉ារ៉ាហ្គេមលើកទី ១១ នៅព្រឹក​​ថ្ងៃទី ៦ ខែកក្កដា ឆ្នាំ ២០២២នេះ សម្តេច​តេជោ ហ៊ុន សែន នាយករដ្ឋមន្ត្រីនៃកម្ពុជា​​ បាន​លើកឡើងថា មានមនុស្សមួយចំនួនចង់រិះគន់សម្ដេច បែរជាវ៉ៃខុសរឿងខុសទិស ដែលការធ្វើបែបនេះមិនចំណេញទេ ហើយ​ជា​ការ​ដាក់ពិន្ទុឲ្យសម្តេចទៅវិញ។ ​

បើតាមសម្ដេចតេជោ ហ៊ុន សែន មានមនុស្សខ្លះ ដើម្បីបន្ទុះបង្អាប់សម្តេចបានផលិតវីដេអូ​​​​ ប្រើប្រាស់​រូបភាព​ទឹកលិចនៅពេលភ្លៀង ហើយ​ស្រែកពាក្យជយោសម្ដេចតេជោ មានសម្តេច​តេ​ជោ មាន​ការ​អភិវឌ្ឍ…​មួយទៀត​ប្រើរូបភាព​ម៉ូតូថ្មីជាប់ភក់នៅលើផ្លូវលំ។ សម្តេចតេជោ បានថ្លែងថា ​ការធ្វើបែបនេះ​មិនត្រូវទេ ដោយសារប្រើរូបភាពខុស ពីព្រោះនៅលើផ្លូវលំនោះ គេបានដាក់ម៉ូតូថ្មី ដែលជាប់ផុង ដូច្នេះមានន័យថា​ ជាប់ផុងនៅលើផ្លូវលំ​ ហើយម៉ូតូថ្មីទៀត​។​

សម្ដេចតេជោនាយករដ្ឋមន្ត្រី បាន​បញ្ជាក់ថា កម្ពុជា​សម័យមុន ជាកម្ពុជាប្រើផ្លូវរទេះ មិនមែន​​ជាផ្លូវលំ​​ទេ ហើយប្រើ​កង់ទៀត។ សម្ដេចតេជោ ផ្ដល់ជា​​អនុសាសន៍ថា បើចង់រិះគន់សម្ដេច គួរតែប្រើរូបភាពជិះកង់វិញ ហើយស្រែកទៅ (មានសម្ដេចតេជោ ​មានសន្តិភាព មានការអភិវឌ្ឍ…។ បើធ្វើបែបនេះមានន័យថា សម័យតេជោ អ្នកក្រមានម៉ូតូថ្មីជិះ។​

សម្ដេចតេជោ ហ៊ុន សែន​ បានលើកឡើងទៀតថា ​ការធ្វើបែបនេះ ជាការដាក់ពិន្ទុឲ្យសម្ដេចទៅវិញទេ ហើយក៏ជាការធ្វើឲ្យចំណេញដល់សម្ដេចផងដែរ។ ម្យ៉ាងទៀត ការប្រើរថយន្តលិចទឹកនៅពេលភ្លៀង ដូច្នេះ​មានន័យថា គ្រាន់បើជាងសម័យមុនឆ្ងាយណាស់ ពីព្រោះសម័យតេជោ​មានឡានលិចទឹក។​ សម្ដេចតេជោ បានប្រាប់ទៅក្រុមអ្នករិះគន់ទាំងនោះវិញថា «អ្នកឯងធ្វើបែបនេះ មិនចេះឃោសនា ហើយក៏មិនចេះរិះគន់ដែរ»៕

អត្ថបទ៖ កោះកែវ ​