គិតត្រឹមថ្ងៃទី ៣០ មិថុនា មានរថយន្តចង្កូតស្ដាំចំនួន ៧០៤០ គ្រឿង បានចូលទៅកក់ប្រាក់ និងបង់ពន្ធ

អគ្គនាយកដ្ឋានគយ និងរដ្ឋាករកម្ពុជា ​បានប្រកាសថា គិតត្រឹមថ្ងៃទី ៣០មិថុនា ឆ្នាំ ២០២២ ដែលជាថ្ងៃឱសានវាទចុងក្រោយ នៃការអនុញ្ញាតឲ្យម្ចាស់រថយន្តគ្មានពន្ធមានស្រាប់ ចូលមកបំពេញកាតព្វកិច្ចពន្ធអាករទាំងចង្កូតឆ្វេង និងចង្កូតស្ដាំ ដែលមកបង់ពន្ធ និងកក់ប្រាក់មានចំនួន ៩៧៥៣គ្រឿង។ ក្នុងនោះ រថយន្តចង្កូតស្ដាំដែលត្រូវកែចង្កូត និងបានចូលមកកក់ប្រាក់មានចំនួន ៧០៤០គ្រឿង។

ការឲ្យដឹងរបស់លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជានេះ ធ្វើឡើងក្នុងសន្និសីទសារព័ត៌មាន ស្ដីពី លទ្ធផលនៃការអនុវត្តការប្រមូលពន្ធលើយានយន្តគ្មានពន្ធ និងអាករនាំចូលដែលមានស្រាប់ក្នុងប្រទេស នាព្រឹកថ្ងៃទី ៧ ខែកក្កដា ឆ្នាំ ២០២២នេះ។

លោកបន្តថា រថយន្តចង្កូតឆ្វេងដែលគ្មានពន្ធ និងដែលម្ចាស់បានយកមកបង់ពន្ធ មានចំនួន ២៧១៣គ្រឿង និងប្រមូលបានប្រាក់ពន្ធអាករប្រមាណជា ៣៥លានដុល្លារ។ ចំណែកឯការប្រមូលចំណូលពីរថយន្តចង្កូតស្ដាំទាំង ៧០៤០គ្រឿង ដែលចូលមកកក់ប្រាក់វិញ ស្ថាប័នគយ និងរដ្ឋាករកម្ពុជាប្រមូលចំណូលបានចំនួន ៤១.៥៦លានដុល្លារអាមេរិក។

លោក គុណ ញឹម បន្តថា តួលេខចំណូលរួម ដែលប្រមូលបានពីពន្ធអាករ លើរថយន្តទាំងពីរប្រភេទខាងលើ មានចំនួន ៧៦.៣៣លានដុល្លារអាមេរិក។ ក្នុងនោះ ១៤លានដុល្លាជាប្រាក់កក់។ ដោយឡែកនៅមានរថយន្តចង្កូតស្ដាំចំនួន ២៥៤៧គ្រឿង ក្នុងចំណោមរថយន្តចង្កូតស្ដាំ ៧០៤០គ្រឿង មិនទាន់បានកែចង្កូតរួចរាល់ និងបើគិតជាទឹកប្រាក់ គឺប្រមាណជា ១៤លានដុល្លារ ដែលប្រាក់កក់នេះបានមកដល់ដៃអគ្គនាយកដ្ឋានគយ និងរដ្ឋាករកម្ពុជារួចហើយ។

គិតចាប់ពីការចាប់ផ្ដើមយុទ្ធនាការនៃការអនុវត្ត ការប្រមូលពន្ធលើយានយន្តគ្មានពន្ធ និងអាករនាំចូលដែលមានស្រាប់ ក្នុងប្រទេសចំនួនជិត ១០ខែមកនេះ រថយន្តគ្មានពន្ធ និងរថយន្តចាស់ៗ ដែលបានមកបង់ពន្ធ និងកក់ប្រាក់នោះមានចំនួន ៩៧៥៣គ្រឿង។ ស្របពេលជាមួយគ្នានេះផងដែរ ការអនុវត្តនូវយុទ្ធនាការខាងលើ គឺមិនមានការបង្ក្រាបទៅលើម្ចាស់យានយន្តគ្មានពន្ធនោះទេ ដោយអគ្គនាយកដ្ឋានគយទុកលទ្ធភាពជួនម្ចាស់រថយន្ត ស្ម័គ្រចិត្តចូលមកបង់ពន្ធអាករដោយខ្លួនឯង។

សូមជម្រាបថា ចាប់ពីខែមករា ដល់ខែមិថុនា អគ្គនាយកដ្ឋានគយ និងរដ្ឋាករកម្ពុជា បានបង្រ្កាបរថយន្តគ្មានពន្ធក្នុងប្រទេសចំនួន ៣៤២គ្រឿង ដែលក្នុងនោះ មានរថយន្តចង្កូតស្ដាំតែ ៧គ្រឿងប៉ុណ្ណោះ ខណៈការបង្ក្រាបនេះ មិនបានអនុវត្តវិធានការតឹងរ៉ឹងខ្លាំងនោះទេ៕

អត្ថបទ៖ លន់ សេនី