ព័ត៌មានជាតិ

កងកម្លាំងសឹករងឧត្តរមានជ័យ ចូលរួមទទួលប្រជាពលរដ្ឋខ្មែរមកពីប្រទេសថៃ ទៅកាន់ទីតាំងធ្វើចត្តាឡីស័ក

បានផុស

៤ years មុន

នៅ

ថ្ងៃពុធ ២៣ ធ្នូ ២០២០

ដោយ

កងកម្លាំងរបស់តំបន់ប្រតិបត្តិការសឹករងឧត្តរមានជ័យ បានចូលរួមទទួលប្រជាពលរដ្ឋខ្មែរមកពីប្រទេសថៃ ដើម្បីមកកាន់ទីតាំងធ្វើចត្តាឡីស័ក បន្ទាប់ពីមានការផ្ទុះជំងឺកូវីដ១៩ នៅប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២២ ខែធ្នូ ឆ្នាំ២០២០នេះ ឧត្ដមសេនីយ៍ទោ តន់ ញាន មេបញ្ជាការតំបន់ប្រតិបត្តិការសឹករងឧត្តរមានជ័យ បានចាត់តាំងកម្លាំងចំនួន១២នាក់ និងរថយន្តចំនួន០៤គ្រឿង ដឹកនាំដោយលោកវរសេនីយ៍ឯក គង់ ខ្នា មេបញ្ជការរង ដោយសហការជាមួយ កងពលតូចដឹកជញ្ជូនលេខ៩៩ ចូលរួមដឹកជញ្ជូនប្រជាពលករខ្មែរ ដែលត្រឡប់មកពីប្រទេសថៃ តាមច្រកអន្តរជាតិអូរស្មាច់ មកកាន់ទីតាំងធ្វើចត្តាឡីស័កចំនួន០៤គោលដៅ(វិទ្យាល័យ ហ៊ុន សែន សំរោង, វិទ្យាល័យ ហ៊ុន សែន ឧត្តរមានជ័យ, ផ្ទះសំណាក់ ឧត្តម រដ្ឋា និងមន្ទីរពេទ្យ បង្អែកខេត្ត) ក្រុងសំរោង ខេត្តឧត្តរមានជ័យ។

នេះជាថ្ងៃទីពីរហើយ ដែលកងកម្លាំងរបស់តំបន់ប្រតិបត្តិការសឹករងឧត្តរមានជ័យ សហការជាមួយ កងពលតូចដឹកជញ្ជូនលេខ៩៩ ដែលរង់ចាំទទួលប្រជាពលរដ្ឋមកពីប្រទេសថៃ នៅច្រកអន្តរជាតិអូរស្មាច់។ គិតត្រឹមម៉ោង១៤និង៣០នាទីល្ងាច ថ្ងៃនេះ មានបងប្អូនប្រជាពលរដ្ឋសរុបចំនួន២២៣នាក់ ស្រីចំនួន៥៥នាក់ ដែលបានឆ្លងដែនពីប្រទេសថៃ មកដល់ទឹកដីកម្ពុជា តាមច្រកអន្តរជាតិអូរស្មាច់ និងបានដឹកជញ្ជូនពួកគាត់មកកាន់ទីតាំងចត្តាឡីស័ក ដែលបានកំណត់ទុកតាមផែនការ៕