​អភិបាលខេត្តស្ទឹងត្រែង​ជំរុញឱ្យក្រុមប្រឹក្សា​ឃុំសង្កាត់​រួមគ្នា​អនុវត្តការងារ​បម្រើប្រជាពលរដ្ឋ​ដោយស្មោះសរ

អភិបាលខេត្តស្ទឹងត្រែងបានជំរុញឲ្យក្រុមប្រឹក្សាដែលចូលកាន់តំណែងដឹកនាំក្នុងឃុំសង្កាត់នៅ​អាណត្តិទី៥ ត្រូវរួមគ្នាអនុវត្តការងារបម្រើប្រជាពលរដ្ឋដោយស្មោះសរ ដោយបំពេញ​កាតព្វកិច្ច​ជូនម្ចាស់ឆ្នោតឱ្យបានឆ្លើយតបទៅតាមសំណូមពរ។

លោក ស្វាយ សំអ៊ាង អភិបាលខេត្តស្ទឹងត្រែងមានប្រសាសន៍ថា៖ អាណត្តិទី ៥សមាជិកក្រុមប្រឹក្សា​ទាំងអស់ត្រូវសហការគ្នាដោយយកចិត្តទុកដាក់ខិតខំប្រឹងប្រែងបំពេញ​កាតព្វកិច្ចរបស់​ខ្លួនជាថ្នាក់​ដឹកនាំ ដើម្បីធ្វើឱ្យឃុំសង្កាត់មានការអភិវឌ្ឍរីកចម្រើនជាងអាណត្តិកន្លងមក។   

លោកអភិបាលខេត្តក៏មានប្រសាសន៍សាទរចំពោះការចូលកាន់តំណែងថ្មីនេះ ហើយចៅសង្កាត់ ជំទប់ ទាំងអស់ត្រូវដើរតួនាទីសំខាន់ក្នុងការលើកកម្ពស់អភិបាលកិច្ចល្អ អនុវត្តគោលការណ៍​អភិវឌ្ឍ​តាមបែបប្រជាធិបតេយ្យនៅថ្នាក់មូលដ្ឋាន មិនប្រកាន់បក្សពួក និន្នាការនយោបាយអ្វីឡើយ។

លោក ស្វាយ សំអ៊ាងមានប្រសាសន៍បន្ថែមថា៖ នៅអាណត្តិថ្មីនេះ ត្រូវពិនិត្យមើល​គ្រប់ហេដ្ឋា​រចនា​សម្ព័ន្ធហើយរៀបចំផែនការអភិវឌ្ឍជាអទិភាព ឱ្យបានទៅតាមសំណូមពររបស់បងប្អូនប្រជា​ពលរដ្ឋ​យើង ដើម្បីឈានឆ្ពោះទៅរួមចំណែក  ក្នុងការកាត់បន្ថយភាពក្រីក្រ​របស់ប្រជាពលរដ្ឋ​នៅ​តាមមូលដ្ឋាន។

លោក ជា ម៉ាលីចៅសង្កាត់សាមគ្គីក្រុងស្ទឹងត្រែង អាណត្តិទី ៥បានធ្វើការប្តេជ្ញា​ចិត្តនិងសហការគ្នា​ប្រឹងប្រែងដឹកនាំការងារបម្រើប្រជាពលរដ្ឋនៅក្នុងសង្កាត់​ឱ្យបានកាន់តែប្រសើរ​ឡើងជាង​អាណត្តិ​កន្លងមក ជាពិសេសបម្រើសេវាតម្រូវការ និងសេវាសាធារណផ្សេងៗទៀតឱ្យ​បានឆ្លើយតបតាម​សំណូមរបស់ប្រជាពលរដ្ឋយើង ដែលបានបោះឆ្នោតផ្តល់សេចក្តីទុកចិត្ត កាលពីថ្ងៃទី០៥មិថុនា​កន្លងមកនោះ។

សូមបញ្ចាក់ថា៖គ្រប់សង្កាត់ទាំងបួននៅក្នុងក្រុងស្ទឹងត្រែងបានប្រកាសទទួលស្គាល់សមាសភាព ចៅសង្កាត់- ជំទប់ទី១-ជំទប់ទី២-សមាជិកក្រុមប្រឹក្សា អណត្តិទី៥ គ្រប់ សង្កាត់ រួមហើយតាមសេចក្តីប្រកាសរបស់ក្រសួងមហាផ្ទៃ ដើម្បីបំពេញលក្ខខណ្ឌឱ្យក្រុមប្រឹក្សាទាំងអស់ចូល​បំពេញ​ការងារជូនប្រជាពលរដ្ឋប្រកបដោយតម្លាភាព៕

អត្ថបទ៖ ងិនលីម

​